បាត់ដំបង៖ ព្រះសង្ឃចំនួន ៥ អង្គ គង់នៅវត្តសំរោងលើ ស្ថិតក្នុងភូមិសំរោង ឃុំឆ្នាល់មាន់ ស្រុកគាស់ក្រឡ ខេត្តបាត់ដំបង ត្រូវបានអនុវត្តវិធានការផ្សឹក និងប្រគល់ជូនសមត្ថកិច្ច ក្រោយការធ្វើតេស្តទឹកនោមរកឃើញមានសារធាតុញៀនក្នុងខ្លួន។
ប្រតិបត្តិការនេះធ្វើឡើងកាលពីថ្ងៃទី១៨ ខែមិថុនា ឆ្នាំ២០២៦ បន្ទាប់ពីអាជ្ញាធរ និងមន្ទីរធម្មការ និងសាសនាខេត្តបាត់ដំបង បានចុះស្រាវជ្រាវ និងពិនិត្យជាក់ស្តែង ក្រោយមានការផ្សព្វផ្សាយវីដេអូតាមបណ្ដាញសង្គម ពាក់ព័ន្ធនឹងព្រះសង្ឃមួយអង្គដែលត្រូវបានចោទប្រកាន់ថា មានសកម្មភាពចាក់សាក់លើរាងកាយស្ត្រី។
យោងតាមលទ្ធផលនៃការត្រួតពិនិត្យ ព្រះសង្ឃចំនួន ៥ អង្គ ត្រូវបានរកឃើញថាមានសារធាតុញៀនក្នុងខ្លួន រួមមាន៖ តោ សុផាត, ចាន ឌីណា, យួន មករា, វ៉ាត សុវណ្ណ និង កែ សុខហេង។
ក្នុងប្រតិបត្តិការដដែល សមត្ថកិច្ចក៏បានដកហូតថ្នាំញៀនចំនួន ៣ កញ្ចប់ ស្រាថ្នាំចំនួន ២ ដប ព្រមទាំងសម្ភារៈសម្រាប់ប្រើប្រាស់ និងជក់ថ្នាំញៀនមួយចំនួនទៀត។
ក្រោយបញ្ចប់ការស្រាវជ្រាវ និងពិនិត្យ ព្រះសង្ឃទាំង ៥ អង្គ ត្រូវបានផ្សឹកស្របតាមវិន័យសង្ឃ មុនប្រគល់ជូនអធិការដ្ឋាននគរបាលស្រុកគាស់ក្រឡ ដើម្បីបន្តនីតិវិធីតាមផ្លូវច្បាប់។
អាជ្ញាធរពាក់ព័ន្ធបានបញ្ជាក់ថា នឹងបន្តស្រាវជ្រាវ និងអនុវត្តវិធានការតាមច្បាប់យ៉ាងម៉ឺងម៉ាត់ ចំពោះរាល់បទល្មើសដែលប៉ះពាល់ដល់សណ្តាប់ធ្នាប់សង្គម និងកិត្យានុភាពព្រះពុទ្ធសាសនា៕ប្រភពពី SN TV ព័ត៌មាន
