ភ្នំពេញ÷សម្ដេចក្រឡាហោម ស ខេង បានណែនាំឲ្យក្រុមនិស្សិតជ័យលាភីស្វែងយល់ពីភាពខ្លាំងនៃប្រទេសជឿនលឿន ដើម្បីយកមកអភិវឌ្ឍសេដ្ឋកិច្ចកម្ពុជាឲ្យកាន់តែរីកចម្រើនបន្ថែមទៀត
។
ក្នុងឱកាសអនុញ្ញាតឱ្យបេក្ខជនជ័យលាភីអាហារូបករណ៍អភិវឌ្ឍន៍ធនធានមនុស្សផ្ដល់ដោយប្រទេសជប៉ុន ហៅកាត់ថា JDS ចំនួន២៦រូប ជួបសម្ដែងការគួរសម កាលពីរសៀលថ្ងៃទី១៨ ខែសីហា តាមប្រព័ន្ធវីដេអូអនឡាញ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏បានផ្ដល់អនុសាសន៍ឲ្យក្រុមនិស្សិតជ័យលាភីទាំងអស់ ខិតខំកសាងទំនាក់ទំនងល្អជាមួយមិត្តនិស្សិតមកពីបណ្ដាប្រទេសផ្សេងទៀត រួមទាំងនិស្សិតជនជាតិជប៉ុន និងបានបន្ថែមក្នុងន័យដើមថា«ទំនាក់ទំនងល្អមានប្រយោជន៍ច្រើនណាស់ ម្យ៉ាងអាចជាកញ្ចក់ឱ្យគេឆ្លុះឃើញថាគំនិតមារយាទ អាកប្បកិរិយារបស់ជនជាតិកម្ពុជាយើង គឺស្លូតបូត សុភាពរាបសា ឧស្សាហ៍ព្យាយាម និងតស៊ូក្នុងជីវិត»
។
សម្ដេចក្រឡាហោម ឧបនាយករដ្ឋមន្រ្តីបានបន្តថា ក្រៅពីការសិក្សារៀនសូត្រមុខជំនាញ របស់យើង យើងក៏មានឱកាសបានឃើញស្រុកគេ ហើយបត្រូវ ដាក់សំណួរ និងរកចម្លើយ ថាហេតុអ្វីបានជាប្រទេសជប៉ុន ជនរួមជាតិជប៉ុន អាចធ្វើឲ្យប្រទេសរបស់ខ្លួនរីកចម្រើន និងទៅជាមហាអំណាចសេដ្ឋកិច្ច? ដូច្នេះត្រូវតែឆ្លៀតស្វែងរកមូលហេតុ។ ជាការពិតហើយសុខសន្តិភាពវាជារឿងមួយ ប៉ុន្តែមានកត្តាអ្វីផ្សេងទៀត?
។
ជាមួយគ្នានោះ សម្ដេចក្រឡាហោម ស ខេង ឧបនាយករដ្ឋមន្ត្រី បានសម្ដែងនូវការអបអរសាទរ និងកោតសរសើរចំពោះនិស្សិតជ័យលាភីអាហារូបករណ៍ទាំងអស់ ដែលបានតស៊ូសិក្សារៀនសូត្រយកចំណេះវិជ្ជាក្នុងរយៈពេលកន្លងមករហូតអាចទទួលបានអាហារូបករណ៍ទៅសិក្សានៅប្រទេសជប៉ុន
។
សម្ដេចបានចាត់ទុកជោគជ័យនៃការទទួលបានអាហារូបករណ៍ នេះថាក៏ជាជោគជ័យសម្រាប់ក្រុមគ្រួសារ សាលារៀន សម្រាប់អង្គភាព ក្រសួងស្ថាប័ន និងសម្រាប់រាជរដ្ឋាភិបាលដែរ។ រាជរដ្ឋាភិបាល បានខិតខំកសាងបរិយាកាសសុខសន្តិភាព ស្ថិរភាពធ្វើឲ្យប្រជាពលរដ្ឋមានឱកាសគ្រប់ៗគ្នាដើម្បីកសាងជីវភាពរស់នៅបានកាន់តែល្អប្រសើរ រួមទាំងការសិក្សារៀនសូត្រ៕
