កណ្តាល៖រសៀលថ្ងៃព្រហស្បតិ៍ ៤កើត ខែស្រាពណ៍ ឆ្នាំឆ្លូវ ត្រីសក័ ពុទ្ធសករាជ ២៥៦៥ ត្រូវនឹងថ្ងៃទី១២ ខែសីហា ឆ្នាំ២០២១
។
ឯកឧត្តម គង់ សោភ័ណ្ឌ អភិបាលខេត្តកណ្តាល និងជាប្រធានកណៈកម្មាធិការសាខាកាកបាទក្រហមកម្ពុជាខេត្តកណ្តាល បានចាត់ទុកវិស័យពុទ្ធចក្រ និងវិស័យអាណាចក្រដើរទន្ទឹមគ្នា មិនអាចកាត់ផ្តាច់គ្នាបានឡើយគឺជួយគ្នាទៅវិញទៅមក ក្នុងស្ថានភាពដែលប្រទេសជាតិ ជួបគ្រោះអាសន្ន រាប់ទាំង ប្រជាពលរដ្ឋរងគ្រោះដោយ គ្រោះមហន្តរាយផ្សេងៗ ប្រជាពលរដ្ឋ ក្រីក្រលំបាកខ្វះខាត ក្នុងអំឡុងពេល វិបត្តិជម្ងឺកូវិដ១៩ នាពេលនេះ
។
ឯកឧត្ដមអភិបាលខេត្តចាត់ទុកបែបនេះ ក្នុងឱកាសប្រគល់និងទទួលអំណោយមនុស្សធម៌ពី សម្ដេចព្រះឧត្តមមុនី ជា សំអាង ព្រះមេគណខេត្តកណ្តាលគណៈមហានិកាយ និងជាចៅអធិការវត្តសុវណ្ណវារី ហៅវត្តព្រែកតាទែន ស្ថិតនៅឃុំព្រែកតាទែន ស្រុកពញាឮ ម្សិលមិញនេះ
។
មានសង្ឃដីកា នាឱកាសនោះ សម្ដេចព្រះមុនី ជា សំអាង បានសម្ដែងការគាំទ្រក្នុងការងារមនុស្សធម៌ របស់កាកបាទក្រហមកម្ពុជា ក្នុងការជួយដល់ប្រជាពលរដ្ឋទីទ័លក្រ ប្រជាពលរដ្ឋរងគ្រោះដោយគ្រោះមហន្តរាយនានា និងដើម្បីជួយគាំទ្រដល់សកម្មភាពប្រយុទ្ធប្រឆាំងការរីករាលដាលនៃជំងឺកូវីដ-១៩។ សម្តេចឧត្តមមុនី ជា សំអាង មានសង្ឃដីកាទៀតថា៖ចំពោះអំណោយដែលបានមកនៅពេលនេះ គឺបានពីទឹកព្រះទ័យ និងទឹកចិត្តជ្រះថ្លា ពីសំណាក់ព្រះសង្ឃគ្រប់ព្រះអង្គ ក៏ដូចជាសប្បុរសជន និងពុទ្ធបរិស័ទនានានៅក្នុងខេត្ត
។
ឯកឧត្តមអភិបាលខេត្តបានថ្លែងអំណរព្រះគុណដ៏ថ្លៃថ្លាចំពោះទឹកព្រះទ័យយកចិត្តទុកដាក់ខ្ពស់របស់សម្ដេចព្រះឧត្តមមុនី ជា សំអាង ដែលបានឧបត្ថម្ភអំណោយជាសម្ភារៈ និងថវិកា ជូនដល់សាខាកាកបាទក្រហមកម្ពុជាខេត្តក្នុងឱកាសនេះ។សកម្មភាពដ៏ថ្លៃថ្លានេះ បង្ហាញឲ្យឃើញនូវវប្បធម៌នៃការចែករំលែក និងចូលរួមចំណែកក្នុងវិស័យមនុស្សធម៌ រវាងពុទ្ធចក្រ និងអាណាចក្រ ក្នុងការជួយដល់ប្រជាពលរដ្ឋរងគ្រោះ និងងាយរងគ្រោះបានទាន់ពេលវេលា
។
ឯកឧត្ដមបានសន្យាថានឹងនាំយកអំណោយទាំងអស់នេះ ជូនដល់ដៃប្រជាពលរដ្ឋ ដើម្បីជួយសម្រាលការលំបាកជូនជនងាយរងគ្រោះដោយគ្រោះមហន្តរាយផ្សេងៗនៅគ្រប់ទីកន្លែង គ្រប់សហគមន៍ នៅក្នុងខេត្តកណ្ដាល អោយបានទាន់ពេលវេលា ដោយគ្មានការរើសអើងចំពោះជាតិសាសន៍ សាសនា ឬនិន្នាការនយោបាយឡើយ
។
គួរបញ្ជាក់ថា៖អំណោយដែលសាខាកាកបាទក្រហមកម្ពុជាខេត្ត ទទួលបាននាពេលនេះរួមមាន៖ អង្ករ ០១តោន ទឹកក្រូច ៥០កេស ទឹកសុទ្ធ៥០កេស ក្រមា២០០និងថវិកា ចំនួន ៨លានរៀល៕
