ភ្នំពេញ៖ថ្ងៃ អាទិត្យ ៨រោច ខែទុតិយាសាឍ ឆ្នាំឆ្លូវ ត្រីសក័ ពុទ្ធសករាជ ២៥៦៥ ត្រូវនឹងថ្ងៃទី០១ ខែសីហា ឆ្នាំ២០២១
។
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា វ៉ាក់សាំងកូវីដ១៩ ដែលជាប្រភទវ៉ាក់សាំងចាក់១ដូស Johnson & Johnson ដែលជាជំនួយរបស់សហរដ្ឋអាមេរិក នឹងត្រូវចាក់ជូនជនជាតិដើមភាគតិច និងពលករកម្ពុជាដែលវិលត្រឡប់មកពីប្រទេសថៃ ហើយមិនទាន់បានចាក់វ៉ាក់សាំងនោះ
។
ក្នុងសន្និសីទសារព័ត៌មាន និងពិធីប្រកាសបើកយុទ្ធនាការចាក់វ៉ាក់សាំងកូវីដ១៩ ដល់កុមារ និងយុវវ័យ ដែលមានអាយុចាប់ពី១២ឆ្នាំដល់ក្រោម ១៨ឆ្នាំ នៅវិមានសន្តិភាព នាព្រឹក ថ្ងៃទី០១ ខែសីហា ឆ្នាំ២០២១ សម្ដេចតេជោនាយករដ្ឋមន្ត្រីមានប្រសាសន៍គូសបញ្ជាក់ថា ការចាក់ទៅលើជនជាតិដើមភាគតិចនេះ គឺដោយសារវ៉ាក់សាំង Johnson&Johnson តម្រូវឱ្យចាក់តែមួយលើកប៉ុណ្ណោះ វាងាយស្រួលក្នុងការចំណាយពេលវេលា ទាំងក្រុមគ្រូពេទ្យ និងជនជាតិដើមភាគតិច។ សម្តេចតេជោបានបន្ថែមថា គោលដៅចាក់ចំពោះប្រជាពលរដ្ឋ ជាជនជាតិដើមភាគតិចនោះ រួមមាននៅខេត្តស្ទឹងត្រែង ខេត្តរតនគិរី ខេត្តព្រះវិហារ និងនៅតំបន់មួយចំនួនទៀត
។
សម្តេចតេជោបានថ្លែងបញ្ជាក់ថា «ពាក់ព័ន្ធនឹងវ៉ាក់សាំង Johnson & Johnson ខ្ញុំបានឱ្យយោបល់ទៅលោកជំទាវ ឱ វណ្ឌឌីន ហើយនោះ គឺបញ្ជូនទៅចាក់ នៅតំបន់ជនជាតិដើមភាគតិច…ព្រោះវាងាយស្រួល ដោយចាក់តែមួយដូស អីចឹង កុំឱ្យពេទ្យទៅយូរ សម្រួលឱ្យពេទ្យបានម្ខាង និងជនជាតិភាគតិចបានម្ខាង»។ សម្តេចតេជោនាយករដ្ឋមន្ត្រី បានបញ្ជាក់ដែរថា ប្រហែលមិនអាចរកប្រជាពលរដ្ឋ ជនជាតិដើមភាគតិច ចំនួន១លាននាក់ ដើម្បីទទួលវ៉ាក់សាំង Johnson & Johnson អស់នោះទេ។ ក្នុងន័យនេះ សម្តេចតេជោបានថ្លែងបន្ដថា បើវ៉ាក់សាំងនៅសល់ ហើយកាលបរិច្ឆេទផុតកំណត់របស់វ៉ាក់សាំងនៅរយៈពេលវែងនោះ នឹងត្រូវយកទៅចាក់ឱ្យប្រជាពលរដ្ឋកម្ពុជា ជាពិសេសពលករខ្មែរ ដែលត្រលប់មកពីថៃ
។
គួរបញ្ជាក់ដែរថា វ៉ាក់សាំងកូវីដ១៩ ដែលជាប្រភទវ៉ាក់សាំងចាក់១ដូស Johnson & Johnson ចំនួន ៤៥៥ ០០០ ដូសជំហានទីមួយ ក្នុងចំណោមវ៉ាក់សាំងចំនួន ១ ០៦០ ១០០ដូស ដែលជាជំនួយរបស់សហរដ្ឋអាមេរិកផ្ដល់ឱ្យរាជរដ្ឋាភិបាល និងប្រជាជនកម្ពុជាតាមរយៈយន្តការ COVAXនោះ បានដឹកមកដល់កម្ពុជាហើយ កាលពីព្រឹកថ្ងៃទី៣០ ខែកក្កដាឆ្នាំ២០២១តាមជើងយន្តហោះពិសេស ហើយរំពឹងថា ជំនួយវ៉ាក់សាំងជំហានទីពីរ នឹងមកដល់កម្ពុជា នៅថ្ងៃទ០២ ខែសីហា ឆ្នាំ២០២១៕
