ភ្នំពេញ៖ រាជរដ្ឋាភិបាលកម្ពុជា អនុញ្ញាតឱ្យចាក់វ៉ាក់សាំងជំងឺកូវីដ-១៩ដូសទី៣ជូនប្រជាពលរដ្ឋហើយ ប៉ុន្តែជំហានដំបូងនេះ ផ្តោតសំខាន់ទៅលើក្រុមជួរមុខដែលមានប្រមាណ៥០ម៉ឺននាក់ទៅ១លាននាក់ជាមុនសិន ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា ការចាក់វ៉ាក់សាំងកូវីដ១៩ដូសទី៣ គឺផ្តោតសំខាន់ទៅលើក្រុមមនុស្សជួរមុខ ពិសេសនៅតាមព្រំដែនកម្ពុជា-ថៃ ដែលមានប្រមាណ៥០ម៉ឺននាក់ទៅ១លាននាក់ជាមុនសិន ហើយសម្រាប់អ្នកបានចាក់វ៉ាក់សាំងស៊ីណូហ្វាម និងស៊ីណូវ៉ាក់ ទាំង២ដូសរួចហើយ គឺត្រូវយកវ៉ាក់សាំង AstraZeneca ធ្វើជាដូស ទី៣ ដែលជាដូសជំរុញ ។ ម្យ៉ាងវិញទៀត សម្រាប់អ្នកចាក់ អាស្រ្តាហ្សេនីកា (AstraZeneca) ទាំង២ដូសរួចរាល់វិញនោះ គឺអាចនឹងប្រើវ៉ាក់សាំងស៊ីណូវ៉ាក់ឬស៊ីណូហ្វាម ជាដូសទី៣
។
ក្នុងពិធីអញ្ជើញប្រកាសបើកយុទ្ធនាការចាក់វ៉ាក់សាំងកូវីដ១៩ ជូនកុមារនិងយុវវ័យ អាយុចាប់ពី១២ឆ្នាំដល់ក្រោម ១៨ឆ្នាំ នៅព្រឹកថ្ងៃអាទិត្យ ទី០១ ខែសីហា ឆ្នាំ២០២១ ឆ្នាំ២០២១នេះ សម្តេចតេជោ ហ៊ុន សែន បានមានប្រសាស ន៍ថា ការអនុញ្ញាតនេះធ្វើឡើងបន្ទាប់ពីមានការពិភាក្សាយ៉ាងល្អិតល្អន់ ដើម្បីធ្វើយ៉ាងណាជំរុញប្រសិទ្ធភាពវ៉ាក់សាំងឱ្យកាន់តែមានប្រសិទ្ធភាពខ្ពស់បន្ថែមទៀត ជាពិសេសផ្តល់វ៉ាក់សាំងដូសទី៣ឱ្យបានទាន់ពេលវេលា មុននឹងប្រសិទ្ធភាពវ៉ាក់សាំងដែលប្រជាពលរដ្ឋបានចាក់ទាំង២ដូសហើយនោះ មានការថយចុះ
។
« សម្រាប់ដូសទីបីគឺត្រូវបានសម្រេចកាលពីម្សិលមិញ ក្រោយការរាយការ ណ៍ពីគណៈកម្មការរាយការ ណ៍ឱ្យប្រធានគណៈប្រចាំការ គឺឯកឧត្តមឧបនាយករដ្ឋមន្ត្រី អូនព័ន្ធ មុនីរ័ត្ន រដ្ឋមន្ត្រីក្រសួង សេដ្ឋកិច្ចនិងហិរញ្ញវត្ថុបានជួបប្រជុំពិភាក្សាហើយលើកមកខ្ញុំ ហើយខ្ញុំក៏បានចារយល់ព្រម ហើយចំណារទៅ លោកជំទាវ ឱ វណ្ណឌីន ថាឱ្យដូរផែនការភ្លាម កន្លែងដែលយើងគ្រោងដាក់អាស្ត្រាសេនីកា គឺត្រូវទៅដាក់ជំនួសដោយស៊ីណូហ្វាមឬស៊ីណូវ៉ាក់ ហើយដកអាស្រ្តាយកមក ព្រោះការពិតនេះមិន ទាន់មកដល់ផងនិងវ៉ាក់សាំងមកដល់ហើយនោះ គឺនៅក្រចេះនិងរតនគិរីមិនអាចដកយកមកវិញបានទេ ដូច្នេះយើងត្រូវការប្រើប្រាស់ ហើយយើងត្រូវការទិញខ្លួនឯង ហើយទិញតាមរយៈកូវ៉ាក់មួយផ្នែកនិងមួយផ្នែកទៀតយើងអាចទាក់ទងទៅដល់រោងចក្រដែលផលិត ពីព្រោះជប៉ុនក៏មាន កូរ៉េខាងត្បូងក៏មាន ឥណ្ឌាក៏មាន ប្រទេសណាទទួលទិញគឺយើងទិញពីប្រទេសនោះ ដូច្នេះទេយើងត្រូវចំណាយថវិកាបន្ថែមទៀត ព្រោះដើម្បីកុំឱ្យយើងចាក់ពីរដូសទៅហើយ ព្រោះនៅពេលណាមួយប្រសិទ្ធភាពរបស់វាថយ ដូច្នេះយើងយកដូសថ្មីមកជំរុញវាឱ្យកើនឡើងវិញ ព្រោះនៅពេលណាមួយដែលវាថយចុះបន្តិចម្តងៗ ចឹងត្រូវមានដូសជំរុញទី៣ » ៕
