អាជ្ញាធរខេត្តកណ្តាលត្រៀមទីតាំងរួចជាស្រេច ដើម្បីចាក់វ៉ាក់សាំងដល់ក្រុមប្រជាពលរដ្ឋអាយុចន្លោះ១២ឆ្នាំដល់១៧ឆ្នាំ

ខេត្តកណ្តាល៖ អភិបាលខេត្តកណ្តាលបានឱ្យដឹងថា អាជ្ញាធរមូលដ្ឋានបានត្រៀមទីតាំងរួចជាស្រេចហើយ ដើម្បីចាក់វ៉ាក់សាំង ជូនកុមារ និងយុវវ័យអាយុ១២ ដល់១៧ឆ្នាំ ដើម្បីង្កើតភាពស៊ាំក្នុងសង្គម និងឈានទៅដល់ការបើកសកម្មភាពសង្គមឱ្យកាន់តែទូលាយ ជាពិសេសការបើកសាលារៀនឡើងវិញ
។

ថ្លែងប្រាប់អ្នកសារព័ត៌មាន ឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្តាល មានប្រសាសន៍ថា នៅទូទាំងខេត្តកណ្តាល ក្រុមមនុស្សដែលមានអាយុចន្លោះចាប់ពី១២ដល់១៧ឆ្នាំ មានចំនួនជាង១៧ម៉ឺននាក់ ។ ដូចនេះដើម្បីបង្កភាពងាយស្រួលទៅដល់កុមារនិងយុវវ័យដែលត្រូវមកទទួលវ៉ាក់សាំងបង្ការកូវីដ១៩ គឺអាជ្ញាធរខេត្តបានត្រៀមទីតាំងសាលារៀន មន្ទីរពេទ្យបង្អែក មណ្ឌលសុខភាព និងវត្តអារាមមួយចំនួនទៀតដែលមានការសហការរៀបចំដោយអាជ្ញាធរក្រុងស្រុក ។ ពោលកន្លងមក រដ្ឋបាលខេត្ត បានយកទីតាំងទាំងនោះ ចាក់វ៉ាក់សំាងជូនប្រជាពលរដ្ឋ ដែលមានអាយុចាប់ពី១៨ឆ្នាំឡើងទៅរួចមក ហើយ
។

« ទីតាំងដែលយើងធ្លាប់ធ្វើកន្លងមក គឺយើងយកទីតាំងនោះដដែលទេ ដែលទីតាំងទាំងនោះធំ ទូលាយ ដែលអាចរក្សាគម្លាតសុវត្ថិភាព នៅពេលដែលមកចាក់ដោយយើងបាន ត្រៀមលក្ខណៈដូច មុនអ៊ីចឹង ហើយ ការរៀបរយក៏យើងបានត្រៀបអស់ហើយ ពិសេសគឺអាជ្ញាធរស្រុកតែម្ដង ដែលគេម្ចាស់ការបាន ដែលធ្វើអីធ្វើបានហើយប្រជាពលរដ្ឋគឺទទួលយកបាន។ ហើយអ្នកបញ្ជូលទិន្នន័យសញ្ញាណអ្នកមកចាក់ក៏មានជំនាញហើយស្រេច ដោយសារពួកគេឆ្លងកាត់មកហើយ។ ហើយដោយឡែកទិន្នន័យរបស់កុមារដែលត្រូវចាក់ នៅតាមទីតាំងមូលដ្ឋាននីមួយៗ ក៏យើងមានហើយរួចជាស្រេច ក្នុងនោះក៏ យើងបានត្រៀមកំណត់ចំនួនអ្នកដែលត្រូវមកចាក់ត្រឹមកម្រិតណា ១ថ្ងៃប៉ុន្មាននាក់ ទីតាំងណាជិតឆ្ងាយ មកប៉ុន្មានក្នុងមួយថ្ងៃ ពេលព្រឹកនិងពេលល្ងាច ក៏យើងបានគិតគូររួចហើយ»
។

ឯកឧត្តមអភិបាលខេត្ត អំពាវនាវដល់មាតាបិតានិងអាណាព្យាបាល ដែលមានកូនអាយុចាប់ពី ១២ឆ្នាំ ដល់អាយុក្រោម១៨ឆ្នាំទៅទទួលវ៉ាក់សាំងកូវីដ-១៩ ដោយស្ម័គ្រចិត្ត និងឥតគិតថ្លៃ
។

សូមជម្រាបថា សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា នឹងអញ្ជើញបើកយុទ្ធនាការចាក់វ៉ាក់សាំងជូនកុមារ និងយុវវ័យអាយុ១២ដល់១៧ឆ្នាំ នៅថ្ងៃទី១ ខែសីហា ឆ្នាំ២០២១ នៅវិមានសន្តិភាព ព្រមទាំងធ្វើសន្និសិទកាសែតផងដែរ។  ជាមួយគ្នានេះសម្តេចនឹងនាំយកចៅៗរបស់សម្តេចទាំងអស់ ដែលមានអាយុ១២ដល់១៧ឆ្នាំ ទៅទទួលវ៉ាក់សាំងនៅថ្ងៃនោះតែម្តង ហើយក្រៅពីចៅរបស់សម្តេចក៏នៅមានចៅៗ របស់ថ្នាក់ដឹកនាំសំខាន់ៗជាច្រើនរូបទៀតទៅទទួលវ៉ាក់សាំងដែរ៕