ខេត្តកណ្ដាល៖ ឯកឧត្តម គង់ សោភ័ណ្ឌ អភិបាល នៃគណ:អភិបាលខេត្តកណ្ដាល កាលពីរសៀលថ្ងៃទី១៩ ខែមិថុនា ឆ្នាំ២០២៤នេះ បានអញ្ជើញអធិបតី ក្នុងពិធីប្រកាសជ័យលាភី និងប្រគល់ពានរង្វាន់ សម្រាប់ការប្រឡងប្រណាំង ភូមិ ឃុំ សង្កាត់ មានសុវត្ថិភាព និងការងារសេវាសង្គម របស់រដ្ឋបាលខេត្តកណ្ដាល ដោយមានការអញ្ជើញចូលរួមពី ឯកឧត្តម លោកជំទាវសមាជិកក្រុមប្រឹក្សាខេត្ត អភិបាលរងខេត្ត មន្ទីរជុំវិញខេត្ត អាជ្ញាធរក្រុង ស្រុកឃុំ សង្កាត់ និងកងកម្លាំងមានសមត្ថកិច្ចផងដែរ។
ឯកឧត្តម គង់ សោភ័ណ្ឌ បានថ្លែងនូវការកោតសរសើរ និងការវាយតម្លៃខ្ពស់ ចំពោះក្រុមប្រឹក្សា គណៈអភិបាលខេត្ត មន្ទីរ-អង្គភាពជុំវិញខេត្ត ការិយាល័យជំនាញជុំវិញរដ្ឋបាលក្រុង ស្រុក មេឃុំ ចៅសង្កាត់ មន្ត្រីរាជការ, និងកងកម្លាំងមានសមត្ថកិច្ចពាក់ព័ន្ធគ្រប់ផ្នែក គ្រប់លំដាប់ថ្នាក់ ក្នុងខេត្ត ដែលបានខិតខំសហការរួមគ្នាយ៉ាងសកម្ម ក្នុងការបំពេញតួនាទី និងភារកិច្ចរបស់ខ្លួនបានយ៉ាងល្អ ប្រកបដោយស្មារតីទទួលខុសត្រូវខ្ពស់ រហូត ធ្វើឱ្យខេត្តកណ្ដាល ទទួលបាន ចំណាត់ថ្នាក់លេខ១ទូទាំងប្រទេស ក្នុងការប្រឡងប្រណាំង ការងារសេវាសង្គម និងចំណាត់ថ្នាក់ល្អ ក្នុងការប្រឡងប្រណាំង ភូមិ ឃុំ សង្កាត់ មានសុវត្ថិភាព។
ឯកឧត្តមអភិបាលខេត្ត បានបញ្ចាក់ថា ការខិតខំប្រឹងប្រែង រួមគ្នា យ៉ាងសកម្មទាំងនេះ ពិតជាបានចូលរួមចំណែកក្នុងការថែរក្សាសុខសន្តិភាព ស្ថិរភាព នយោបាយ សន្តិសុខ សណ្តាប់ធ្នាប់សាធារណៈ និង សុវត្ថិភាពសង្គម ការលើកកម្ពស់លទ្ធិប្រជាធិបតេយ្យសេរីពហុបក្ស ការពង្រឹងនីតិរដ្ឋ និងការអភិវឌ្ឍសង្គម-សេដ្ឋកិច្ចរបស់ ក្រុង ស្រុក និងខេត្ត ឱ្យកាន់តែរឹងមាំ ប្រកបដោយចីរភាព និងបរិយាបន្ន។
ឯកឧត្តមអភិបាលខេត្ត បានជំរុញ និងលើកទឹកចិត្តដល់ រដ្ឋបាលក្រុង ស្រុក ឃុំ សង្កាត់ ក៏ដូចជាការិយាល័យជំនាញ និងអង្គភាព ពាក់ព័ន្ធ នៅក្នុងក្រុង ស្រុក ត្រូវចូលរួមសហការជិតស្និទ្ធ និងគាំទ្រឱ្យបានពេញលេញដល់ ការអនុវត្តកម្មវិធីគោលនយោបាយអាទិភាព នៃយុទ្ធសាស្ត្របញ្ចកោណដំណាក់កាលទី១ ព្រមទាំងវិធានការគន្លឹះទាំងឡាយ ដែលពាក់ព័ន្ធនឹងសមត្ថកិច្ចរបស់ខ្លួន ប្រកបដោយស្មារតីទទួលខុសត្រូវខ្ពស់ សំដៅបម្រើប្រជាពលរដ្ឋ ប្រកបដោយវិជ្ជាជីវៈ តម្លាភាព និងគណនេយ្យភាព ជាពិសេសត្រូវខិតខំថែរក្សាបាននូវចំណាត់ថ្នាក់ល្អ សម្រាប់ការប្រឡងប្រណាំង ភូមិ ឃុំ សង្កាត់ មានសុវត្ថិភាព និងការងារសេវាសង្គម របស់រដ្ឋបាលខេត្តកណ្ដាលជាបន្តបន្ទាប់ទៀត។
សូមបញ្ចាក់ថា លទ្ធផលប្រកួតប្រជែងពានរង្វាន់សេវាសង្គម ឆ្នាំ២០២២-២០២៣ រដ្ឋបាលខេត្តកណ្ដាល ទទួលបានពានរង្វាន់កម្រិត ផ្កាយ៣ និងជាជ័យលាភីជើងឯកលេខ១ ពានរង្វាន់សេវាសង្គម ក្នុងចំណោម ៧ រាជធានី ខេត្ត គោលដៅ។ ថ្នាក់ក្រុង/ស្រុក ប្រភេទជ័យលាភីពានរង្វាន់កម្រិតផ្កាយ៣ មានចំនួន ១០។ ថ្នាក់ឃុំ សង្កាត់ មានចំនួន ៩៧/១២៧ ឃុំ សង្កាត់ ទទួលបានជ័យលាភីពានរង្វាន់កម្រិតផ្កាយ ៣។ ប្រភេទជ័យលាភីពានរង្វាន់កម្រិតផ្កាយ២
ថ្នាក់ក្រុង ស្រុក គឺរដ្ឋបាលស្រុកស្អាង ទទួលបានជ័យលាភីពានរង្វាន់កម្រិតផ្កាយ២។ ថ្នាក់ឃុំ សង្កាត់ មានចំនួន ២៦ឃុំ សង្កាត់ ទទួលបានជ័យលាភីពានរង្វាន់កម្រិត ផ្កាយ២។ ប្រភេទជ័យលាភីពានរង្វាន់កម្រិតផ្កាយ១ មានចំនួន ៤ឃុំ សង្កាត់ ទទួលបានជ័យលាភីពានរង្វាន់កម្រិត ផ្កាយ១។
ដោយឡែក លទ្ធផលប្រឡងប្រណាំង ភូមិ ឃុំ មានសុវត្ថិភាព ក្នុងខេត្តកណ្តាល ប្រភេទ១ មាន១១៣ឃុំ-សង្កាត់ ប្រភេទ២ មាន១៤ឃុំ-សង្កាត់ ។
