កណ្ដាល៖ គ្រឿងចក្រជាច្រើនគ្រឿងត្រូវបានឈ្មួញកំពុងសម្រុកឈូសឆាយវាទទន្ទ្រានកាប់បំផ្លាញយកដីព្រៃលិចទឹក ដែលជាជម្រកត្រីពងកូននៅរដូវទឹកឡើង ដែលបច្ចុប្បន្នបានក្លាយជាវាលរហោស្ថាន ទៅជាដីនិងស្រះសម្រាប់ជួលបាត់ទៅហើយ។
បើតាមប្រភពពីពលរដ្ឋដែលរស់នៅក្នុងតំបន់នោះបានប្រាប់ភ្នាក់យកព័ត៌មានថា រយ:ពេលពីរបីខែកន្លងមកហើយ ដែលក្រុមឈ្មួញដឹកគ្រឿងចក្រជាច្រើនគ្រឿងចូលទៅតាមមាត់បឹងហើយសម្រុកជីកកាយ កាប់គាស់វាទទីយកដីមាត់បឹង ដែលជាដែនពួកគាត់ធ្លាប់អាស្រ័យផល និងតែងតែប្រកបមុខរបរនេសាទនារដូវទឹកឡើង។
ប្រភពដដែលបានបន្ថែមទៀតថា តំបន់មាត់បឹងនោះអ្នកស្រុកតែងឲ្យឈ្មោះថា បឹងស្លាបចង្វា ឬទំនប់ទទឹង ដែលស្ថិតនៅក្នុងភូមិគគីធំ២ ឃុំគគីរធំ ស្រុកកៀនស្វាយ ខេត្តកណ្ដាល។ ហើយបច្ចុប្បន្នដីនេះ បានប្រែកាយក្លាយខ្លួនជាកម្មសិទ្ធរបស់ក្រុមឈ្មួញបាត់ទៅហើយដែលក្រុមឈ្មួញទាំងនោះមិនអនុញ្ញាតិឲ្យពលរដ្ឋចូលអាស្រ័យផល និងរកត្រីដូចសព្វដងទៀតទេ។
បើតាមលោក ចាន់ ធូ មេឃុំគគីរធំ បានឲ្យដឹងដែរថា ដីបឹងនោះ វាអញ្ចេះទេ ពេលក្រុមហ៊ុន ដឹកគ្រឿងចក្រចូលមកឈូសឆាយទើបគេយកច្បាប់មកឲ្យលោកសុីញ៉េ ហើយលោកបានប្រាប់ថា លោកមិនហ៊ានសុីញ៉េទេ ទាល់តែសុំច្បាប់ពីស្រុកយកមកសិន ទើបលោកហ៊ានសុីញ៉េប្រថាប់ត្រា ហើយមកទល់និងថ្ងៃនេះហើយ លោកនៅមិនទាន់ឃើញច្បាប់ធ្លាក់មកទេ ប៉ុន្តែក្រុមហ៊ុននៅតែបន្តធ្វើសកម្មភាពឈូសឆាយដដែល ហើយក្រុមហ៊ុននោះជារបស់លោកជំទាវ ឡោកខេង លោកអត់ហ៊ានសុីញ៉េទេ តែលោកបានថាឲ្យទៅសុំស្រុកសិនមក។
បើតាមលោក ឡូវ សុខសាន្ត អភិបាលស្រុកកៀនស្វាយបានឲ្យដឹងកាលពីល្ងាចថ្ងៃទី២៤ ខែឧសភានេះ លោកសួរចំណុចនេះខុសហើយ គឺជាដីក្នុងចំណុច ពោធិ៍មៀវ ទំនប់ទទឹង មិនមែនទទឹងថ្ងៃទេ បងចុះទៅយកព័ត៌មានចុះ ដោយសារតែកន្លែងនោះវាពុំមែនដីរដ្ឋទេ ហើយដីនេះទៀតសោធន៍ គឺកំណត់ខាងធនធានទឹកគេបានទទួលស្គាល់ហើយ និងខាងខេត្តក៏បានចេញនៅ ស.ជ.ណ ហើយដែរ ហើយដីនេះក៏ជាដីរបស់ប្រជាពលរដ្ឋលក់ឲ្យលោកជំទាវ ឡោក ខេង អស់ហើយដែរ ពួកគាត់មិនប្ដឹងផ្ដល់អីដែរ។
ទាក់ទិនករណីខាងលើនេះ បើយោងតាមសម្ដីរបស់លោកមេឃុំគគីរធំ ចាន់ ធូ ឃើញថា ក្រុមហ៊ុនខាងលើនេះដឹកគ្រឿងចក្រយកមកឈូសឆាយទាំងបំពាន ដោយមិនទាន់បង្ហាញច្បាប់ជូនអាជ្ញាធរមូលដ្ឋានឲ្យបានឃើញផង ថ្លើមធំហ៊ានឈូសឆាយទាំងបំពាន អាងអំណាច បុណ្យស័ក្ត លុយកាកជាអ្នកធំ យកមកគ្របលើអាជ្ញាធរទាំងស្រុងតែម្ដង៕(នៅមានវីដេអូ)
អង្គភាពអ្នកសារព័ត៌មានយើងខ្ញុំផ្សព្វផ្សាយគ្រាន់តែជាកញ្ចក់ឆ្លុះបញ្ចាំង រិះគុនក្នុងន័យស្ថាបនា ចូលរួមចំណែកជាមួយរាជរដ្ឋាភិបាល។ជុំវិញការចុះផ្សាយខាងលើនេះអង្គភាពសារព័ត៌មានយើងខ្ញុំ នឹងរងចាំទទួលការស្រាយបំភ្លឺ ពីសំណាក់សមត្ថកិច្ចពាក់ពន្ធ័នឹងម្ចាស់ទីតាំង រៀងរាល់ម៉ោងធ្វើការ ដើម្បីឆ្លុះបញ្ចាំងពីការពិត សុក្រឹតនិងយុត្តិធម៌តែប៉ុណ្ណោះ សូមអរគុណ!!!
