បាត់ដំបង ៖ កសិករមួយចំនួនរស់នៅឃុំព្រែកជីក ស្រុករុក្ខគិរី ខេត្តបាត់ដំបង នាំគ្នាដាំម្នាស់ ជាមុខរបរបន្ថែម បន្ទាប់ពីធ្វើស្រែ ដើម្បីបង្កើនចំណូល ផ្គត់ផ្គង់គ្រួសារប្រចាំថ្ងៃ ខណៈដែលមានអតិថិជនតាមបណ្តាខេត្តរាជធានីនានានៅតែគាំទ្រ រសជាតិផ្អែមឈ្ងុយរបស់ម្នាស់នៅតំបន់នេះ ។
លោក ស៊ាប ទីន ជាកសិករ រស់នៅភូមិព្រែកជីក ឃុំ ព្រែក ជីក ស្រុករុក្ខគិរី ខេត្តបាត់ដំ បង រៀបរាប់ថា ការដាំម្នាស់ គឺជាមុខរបរបន្ថែម បន្ទាប់ពីធ្វើស្រែ ដែលចម្ការម្នាស់របស់លោក ក្នុងមួយកន្លែង មានទំហំ ប្រមាណ ទទឹង ៣០ ម៉ែត្រ បណ្តោយជាង ១០០ ម៉ែត្រ ។ លោកមានទីតាំងដាំម្នាស់ ចំនួន បីកន្លែង ធ្វើការដាំឆ្លាស់គ្នា ដើម្បីប្រមូលផល បានចំណូលជាប្រចាំ សម្រាប់ផ្គត់ផ្គង់ ជីវភាពក្នុងគ្រួសារ ។
លោកថា សព្វថ្ងៃនេះម្នាស់ មួយកន្លែងរបស់លោក ត្រៀមប្រមូលផលហើយ ដោយឈ្មួញធ្វើការម៉ៅតែម្ដង មិនពិបាកលោកយកទៅលក់នៅទីផ្សារនោះទេ ។ ចំណែកតម្លៃ វិញ លោកទទួលបាន ៩លាន ៥សែនរៀល ខណៈ ពីមុនធ្លាប់លក់បានប្រមាណ ១៥ លាន រៀល ហើយតម្លៃលក់ រាយវិញ មួយផ្លែ ៥០០ រៀល បច្ចុប្បន្ននេះ បើម្នាស់បានថ្លៃអាចបាន ១០០០ រៀល ។
ការធ្លាក់ថ្លៃនេះ អាចបណ្តាលមកពី រដូវប្រមូលផល ផ្លែឈើ ស្របគ្នា ជាមួយ សាវម៉ៅ ស្វាយ ទុរេន ជាដើម នេះតាមការយល់ឃើញពីកសិករ ស៊ាប ទីន ។
រីឯការដាំម្នាស់វិញ កសិកររូបនេះ បង្ហាញថា ត្រូវចំណាយ ដើមទុន ប្រមាណជាង ៤ លានរៀល ទៅលើកម្មករដាំ ធ្វើស្មៅ ជី និង ការភ្ជួរដី លើផ្ទៃដីមួយកន្លែងៗ ។ ម្យ៉ាងទៀតលោកថាដំណាំម្នាស់ មានរយៈពេលយូរ រហូតដល់ ១ ឆ្នាំកន្លះ ទើប បានប្រមូលផល តែត្រង់ថាម្នាស់ ធន់នឹងជំងឺផ្សេងៗមិនងាយងាប់ និយាយរួមស្រួលមើលថែ ។
ទោះយ៉ាងណា លោក ស៊ាប ទីន យល់ថា របរដាំម្នាស់ អាចជួយសម្រាលជីវភាព ក្នុងគ្រួសារ កូនទៅរៀន ថ្លៃម្ហូប អាហារ ក្នុងការចំណាយជាប្រចាំថ្ងៃ បន្ទាប់ពីធ្វើស្រែ ហើយលោកនៅតែដាំម្នាស់បន្តទៀត បើទោះជាទីផ្សារធ្លាក់ចុះក៏ដោយ លោករំពឹងថា វាអាចនឹងឡើងវិញ នៅពេលប្រមូលផលម្នាស់ក្រោយៗទៀត ។
លោក ស្រី ផាន់ ម៉ាច មេឃុំព្រែកជីក បានឱ្យដឹងថា ឃុំនេះ សម្បូរកសិករ ដាំម្នាស់ ជាច្រើន ដោយគ្រាន់តែក្នុងឃុំ ព្រែកជីក មានផ្ទៃដីប្រមាណ ៥០ ហិកតា កសិករកំពុងដាំ ដំណាំម្នាស់ ។ម្យ៉ាងទៀតលោកស្រី ទទួលស្គាល់ថា ក្នុងអំឡុងខែមិថុនានេះ តម្លៃម្នាស់ពិតជា ធ្លាក់ពិតមែន ៕
