របាយការណ៍មួយបានបង្ហាញកាលពីថ្ងៃសុក្រថា អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សរបស់ប្រទេសកូរ៉េខាងជើងបានអំពាវនាវម្តងទៀតឱ្យសហគមន៍អន្តរជាតិបញ្ជូនវ៉ាក់សាំងជំងឹកូវីដ-១៩ ឱ្យបានគ្រប់គ្រាន់ទៅកាន់ប្រទេសផ្តាច់ការមួយនេះ។
លោក Tomas Ojea Quintana បានពណ៌នាថាវាជាវិធីថ្មីដើម្បីចូលរួមជាមួយកូរ៉េខាងជើងនៅក្នុងរបាយការណ៍របស់លោក ស្តីពីស្ថានភាពសិទ្ធិមនុស្សនៅក្នុងប្រទេសកូរ៉េខាងជើង ដែលត្រូវដាក់ជូនក្រុមប្រឹក្សាសិទ្ធិមនុស្សអង្គការសហប្រជាជាតិនៅសប្តាហ៍ក្រោយ ដោយអាណត្តិរយៈពេលប្រាំមួយឆ្នាំរបស់លោកនឹងបញ្ចប់នៅក្នុងខែសីហាខាងមុខនេះ។
របាយការណ៍នោះបានសរសេរថា «វិធីថ្មីនៃការគិតត្រូវតែចាប់យក។ វាអាចចាប់ផ្តើមជាមួយនឹងការផ្តល់ជូនវ៉ាក់សាំងចំនួន ៦០លានដូសដើម្បីដោះស្រាយបញ្ហាជំងឺកូវីដ-១៩ ដែលជាច្រកឆ្ពោះទៅរកកិច្ចសន្ទនាកាន់តែទូលំទូលាយទៅលើការអភិវឌ្ឍសមត្ថភាព រួមទាំងការផលិតចំណីអាហារ ការថែទាំសុខភាព ទឹក និងអនាម័យ ដើម្បីបង្កើនសមត្ថភាពរបស់រដ្ឋក្នុងការបំពេញកាតព្វកិច្ចសិទ្ធិមនុស្សរបស់ខ្លួន»។
លោកបានធ្វើដំណើរទៅកាន់ទីក្រុងសេអ៊ូលកាលពីខែមុន ដើម្បីប្រមូលព័ត៌មានសម្រាប់របាយការណ៍ប្រចាំឆ្នាំ។ កូរ៉េខាងជើងដែលមានប្រជាជនជាង ២៥លាននាក់ ហើយមិនទាន់បានចាប់ផ្តើមកម្មវិធីចាក់វ៉ាក់សាំងប្រឆាំងនឹងជំងឺរាតត្បាតកូវីដ-១៩ នៅឡើយទេ។
របាយការណ៍នោះក៏បានកត់សម្គាល់ផងដែរនូវការចុះខ្សោយបន្ថែមទៀតនៃស្ថានភាពសិទ្ធិមនុស្សនៅកូរ៉េខាងជើងក្នុងរយៈពេលប្រាំមួយឆ្នាំចុងក្រោយនេះ ដោយបាននិយាយបន្ថែមថា ទីក្រុងព្យុងយ៉ាងបានបរាជ័យក្នុងការធ្វើកំណែទម្រង់ដ៏មានអត្ថន័យ។ វាបានអំពាវនាវឱ្យប្រទេសនេះធ្វើការវិនិយោគជាបន្ទាន់នូវធនធានដែលមាន ដើម្បីធានាបាននូវតម្រូវការជាមូលដ្ឋាន និងត្រូវបើកព្រំដែនរបស់ខ្លួនឡើងវិញជាបណ្តើរៗ៕(ប្រភព Yonhab បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល
