ទីប្រឹក្សារដ្ឋ និងជារដ្ឋមន្ត្រីការបរទេសចិន លោក វ៉ាង យី បាននិយាយកាលពីថ្ងៃសៅរ៍ថា គោលជំហររបស់ចិនចំពោះបញ្ហាអ៊ុយក្រែន គឺជាកម្មវត្ថុ និងយុត្តិធម៌ ហើយពេលវេលានឹងបង្ហាញថា វាស្ថិតនៅខាងភាពត្រឹមត្រូវនៃប្រវត្តិសាស្ត្រ។
លោក វ៉ាង បានធ្វើការកត់សម្គាល់ខាងលើនេះនៅពេលដែលលោកសង្ខេបដល់អ្នកសារព័ត៌មានអំពីការផ្លាស់ប្តូរទស្សនៈរវាងប្រមុខរដ្ឋាភិបាលចិន និងសហរដ្ឋអាមេរិកទៅលើបញ្ហាអ៊ុយក្រែន ក្នុងអំឡុងពេលនៃកិច្ចសន្ទានតាមហៅជាវីដេអូដែលបានធ្វើឡើងនៅថ្ងៃទី១៨ ខែមីនា។
ដោយកត់សម្គាល់ថា ប្រទេសចិនបានពន្យល់យ៉ាងច្បាស់ និងមានភាពទូលំទូលាយអំពីគោលជំហររបស់ខ្លួនទៅលើបញ្ហាអ៊ុយក្រែន លោក វ៉ាង បាននិយាយថា ចំណុចសំខាន់បំផុតគឺថាប្រទេសចិនតែងតែជាកម្លាំងដើម្បីការពារសន្តិភាពពិភពលោក។
លោកបាននិយាយបន្ថែមថា ប្រទេសចិនតែងតែតស៊ូមតិដើម្បីសន្តិភាព និងប្រឆាំងនឹងសង្គ្រាម ដែលមិនត្រឹមតែជាប្រពៃណីដែលចាក់ឫសក្នុងប្រវត្តិសាស្ត្រ និងវប្បធម៌របស់ប្រទេសប៉ុណ្ណោះទេ ប៉ុន្តែវាក៏ជាគោលនយោបាយការបរទេសរបស់ខ្លួនផងដែរ។
លោក វ៉ាង បាននិយាយថា ប្រទេសចិននឹងនៅតែបន្តធ្វើការវិនិច្ឆ័យដោយឯករាជ្យ និងក្នុងគោលបំណងយុត្តិធម៌ដោយផ្អែកទៅលើគុណសម្បត្តិនៃបញ្ហា ដោយលោកបាននិយាយបន្ថែមថា ប្រទេសចិននឹងមិនទទួលយកការបង្ខិតបង្ខំ និងសម្ពាធពីខាងក្រៅណាមួយឡើយ ហើយថែមទាំងប្រឆាំងទៅនឹងការចោទប្រកាន់ និងការសង្ស័យដែលគ្មានមូលដ្ឋានទៅលើប្រទេសចិនទៀតផង។
លោក វ៉ាង បានកត់សម្គាល់ថា ក្នុងអំឡុងពេលនៃការហៅវីដេអូកាលពីពេលថ្មីៗនេះ ប្រទេសចិនបានស្នើឡើងនូវដំណោះស្រាយរបស់ចិនចំពោះវិបត្តិអ៊ុយក្រែន ដែលរួមមានទិដ្ឋភាពពីរ។
លោកបាននិយាយថា អាទិភាព គឺជាអ្វីដែលភាគីទាំងអស់ត្រូវតែជំរុញឱ្យមានកិច្ចសន្ទនា និងកិច្ចចរចារវាងភាគីពាក់ព័ន្ធជាបន្ទាន់ ដោយបញ្ឈប់អរិភាពឱ្យបានឆាប់តាមដែលអាចធ្វើទៅបាន ជៀសវាងការស្លាប់ និងរបួសជនស៊ីវិល និងទប់ស្កាត់វិបត្តិមនុស្សធម៌។
លោក វ៉ាង បាននិយាយបន្ថែមថា ដំណោះស្រាយដ៏យូរអង្វែងមួយស្ថិតនៅក្នុងការបដិសេធចិត្តគំនិតនៃសង្រ្គាមត្រជាក់ ការបដិសេធពីការប្រឈមមុខដាក់គ្នាក្នុងប្លុក និងការកសាងស្ថាបត្យកម្មសន្តិសុខក្នុងតំបន់ប្រកបដោយតុល្យភាព ប្រសិទ្ធភាព និងនិរន្តរភាព ដើម្បីសម្រេចបាននូវសន្តិភាពយូរអង្វែងនៅអឺរ៉ុប៕(ប្រភព People’s Daily បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល
