ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ថា ប្រធានអាស៊ានគ្មានសិទ្ធក្នុងការកំណត់ពេលវេលាកិច្ចប្រជុំកំពូលអាស៊ាន-អាមេរិកនោះទេ ខណៈដែលអ្នកដែលសម្របសម្រលពេលវេលានៃកិច្ចប្រជុំនេះ គឺប្រទេសឥណ្ឌូនេស៊ី។
ការបញ្ជាក់បែបនេះរបស់សម្តេចតេជោ ហ៊ុន សែនបានធ្វើឡើង ខណៈដែលមានអ្នកវិភាគមួយចំនួនបានបកស្រាយខុស ដោយនិយាយថា ប្រធានអាស៊ានមិនយល់ស្របក្នុងការប្រជុំកំពូលអាស៊ាន-អាមេរិក។ សម្តេចតេជោបានបកស្រាយថា អ្នកសម្របសម្រួលគឺឥណ្ឌូនេស៊ី នោះទេ សូមកុំភាន់ច្រឡំ ហើយសូមអ្នកដែលមិនយល់ សូមទៅរៀនពីការងារអាស៊ានឡើងវិញ ។
ថ្លែងក្នុងពិធីសម្ពោធដាក់ឱ្យប្រើប្រាស់ភូមិកុមារ SOS ព្រៃវែង ក្រុងព្រៃវែង ខេត្តព្រៃវែង ថ្ងៃទី១៧ ខែមីនា ឆ្នាំ២០២២ សម្តេចតេជោ ហ៊ុន សែន បានមានប្រសាសន៍ថា មានការបកស្រាយខុសពីការពិត ទៅលើការប្រជុំកំពូលពិសេសអាស៊ានអាមេរិក ដែលគ្រោងប្រព្រឹត្តិទៅនៅថ្ងៃទី២៨-២៩ ខែមីនា ខណៈដែលមនុស្សមួយចំនួនបកស្រាយថា ប្រធានអាស៊ាន មិនយល់ស្របក្នុងការប្រជុំរវាងអាស៊ាននិងអាមេរិកនោះទេ។ សម្តេចតេជោ បានបញ្ជាក់ថា កម្ពុជាជាសមាជិកម្នាក់និងជាប្រធានអាស៊ាន ប៉ុន្តែប្រធានអាស៊ាននេះគ្មានសិទ្ធក្នុងការកំណត់កាលបរិច្ឆេទនោះទេ ប្រធានអាស៊ានមានសិទ្ធត្រឹមតែបញ្ជេញយោបល់លើការសម្របសម្រួលអំពីពេលវេលា ដើម្បីមានកុងសង់ស៊ីសក្នុងចំណោមអាស៊ានទាំង១០។
សម្តេចតេជោ បានឱ្យដឹងថា កម្ពុជាជាប្រធានអាស៊ាន ប៉ុន្តែក្នុងអាស៊ានគេបានបែងចែក ឱ្យប្រទេសមួយៗទទួលខុសត្រូវក្នុងការសម្របសម្រួលរវាងអាស៊ាន ខណៈដែលកិច្ចប្រជុំកំពូលរវាងអាស៊ាន-អាមេរិកគឺប្រទេសឥណ្ឌូនេស៊ី ដើរតួនាទីជាអ្នកសម្របសម្រួលពេលវេលារវាងអាស៊ាន-អាមេរិក។
សម្តេចតេជោ បានឱ្យដឹងទៀតថា សហរដ្ឋអាមេរិកបានប្រកាសថ្ងៃទី២៨-២៩ ខែមីនា ប្រជុំកំពូលរវាងអាស៊ាន-អាមេរិក គឺនៅពេលដែលឥណ្ឌូនេស៊ីមិនទាន់បានសម្របសម្រួលជាមួយសមាជិកអាស៊ាននោះទេ ហើយនៅពេលដែលឥណ្ឌូនេស៊ីធ្វើការសម្របសម្រួលជាមួយសមាជិកអាស៊ាន ខណៈដែលមានប្រទេស៤មិនអាចទៅចូលរួមប្រជុំនៅថ្ងៃនោះបាន។ បន្ថែមពីនោះទៀត មានប្រទេសមួយចំនួន បានស្នើសុំឱ្យប្រជុំថ្ងៃទី២៦-២៧ ខែមីនាជំនួសវិញ ប៉ុន្តែខាងអាមេរិកបានប្រាប់វិញថា ថ្ងៃនោះមិនអាចប្រជុំបាន នោះទេ ដូច្នេះជម្រើសដ៏ល្អ ភាគីទាំង២ស្នើលើកពេលប្រជុំ និងធ្វើការសម្របសម្រួលតាមក្រោយ។
« យើងមិនដឹងថាកិច្ចប្រជុំអាស៊ាន-អាមេរិកនឹងកើតឡើងនៅពេលណា ទុក លទ្ធភាពឱ្យឥណ្ឌូនេស៊ីធ្វើការ នៅពេលដែលមានកុងសង់ស៊ីរួចហើយទើបយើងរៀបចំ អំពីពេលវេលាជាក់លាក់ម្តងទៀត រវាងអាស៊ាន-អាមេរិក អ៊ីចឹងកុំភាន់ច្រឡំថា ប្រធានអាស៊ានមិនព្រមប្រជុំ អាស៊ាន-អាមេរិក អ្នកទទួលបន្ទុកគឺឥណ្ឌូនេស៊ីក្នុងការសម្របសម្រួល ប្រធានអាស៊ានគឺជាសមាជិកអាស៊ានមួយ ដែលត្រូវធ្វើការសម្របសម្រួលក្រោមភាពជាអ្នកសម្របសម្រួលរបស់ឥណ្ឌូនេស៊ីតែប៉ុណ្ណោះ អ៊ីចឹងសង្ឃឹមថាលោកបណ្ឌិត សាស្ត្រាចារ្យ គឺរៀនយល់ពីអាស៊ាន » ៕
