កិច្ចប្រជុំអគ្គមេបញ្ជាការកងទ័ពអាស៊ានលើកទី១៩ (ACDFM-19) បានចាប់ផ្តើមបើកជាផ្លូវការហើយ នាព្រឹកថ្ងៃទី១៧ ខែមីនា ឆ្នាំ២០២២នេះ តាមទម្រង់ចូលរួមផ្ទាល់ នៅរាជធានីភ្នំពេញ។
ឯកឧត្ដម នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងក្នុងនាមជាប្រធានកិច្ចប្រជុំ បានថ្លែងថា នេះជាលើកដំបូងដែលកងទ័ពអាស៊ានអាចជួបប្រជុំផ្ទាល់ជាមួយគ្នា បន្ទាប់ពីស្ថានភាពនៃការឆ្លងរាលដាលជំងឺកូវីដ-១៩ នៅកម្ពុជាបានធូរស្រាល។
ឯកឧត្ដម នាយឧត្តមសេនីយ៍បានគូសបញ្ជាក់ថា សម្រាប់កិច្ចប្រជុំឆ្នាំនេះ កងយោធពលខេមរភូមិន្ទ បានជ្រើសរើសយកមូលបទ “សាមគ្គីភាពដើម្បីសន្តិសុខប្រកបដោយភាពសុខដុម” ដែលគូសបញ្ជាក់ពីសារៈសំខាន់នៃតួនាទី និងកិច្ចខិតខំប្រឹងប្រែងផ្នែកយោធា ប្រកបដោយស្មារតីសុឆន្ទៈ ក្រោមគោលការណ៍មជ្ឈភាពអាស៊ាន និងដឹកនាំដោយអាស៊ាន ដើម្បីដោះស្រាយបញ្ហាសន្តិសុខប្រពៃណី និងមិនប្រពៃណី ពិសេសជំងឺឆ្លងកូវីដ-១៩។
ទន្ទឹមនេះ ប្រធានបទខាងលើ នឹងប្រុងប្រៀបខ្លួនជាស្រេចសម្រាប់បញ្ហាប្រឈមនានាក្នុងពេលអនាគត ដោយសម្រេចឱ្យបាននូវសន្តិភាព ស្ថិរភាព ភាពសុខដុមតំបន់ និងផលប្រយោជន៍រួម តាមរយៈកិច្ចសហប្រតិបត្តិការ និងយន្តការនានាដែលអាចទទួលយកបានពីគ្រប់ភាគី ។
ឯកឧត្ដម នាយឧត្តមសេនីយ៍បានបង្ហាញក្តីសង្ឃឹមថា តាមរយៈកិច្ចប្រជុំថ្ងៃនេះ កងទ័ពអាស៊ាននឹងបន្តពិភាក្សាផ្លាស់ប្ដូរទស្សនៈ ការចែករំលែកព័ត៌មាន និងគំនិតផ្តួចផ្តើមថ្មីៗក្នុងលក្ខណៈបើកចំហ មិត្តភាព ដើម្បីសម្រេចឱ្យបានប្រសិទ្ធភាព លទ្ធផលផ្លែផ្កា ក្នុងការពង្រឹងកិច្ចសហប្រតិបត្តិការ និងការរួបរួមស្អិតរមួតនៅតំបន់អាស៊ីអាគ្នេយ៍៕
