ពាណិជ្ជកម្មសរុបរបស់ប្រទេសថៃជាមួយបណ្តាប្រទេសជិតខាង ដែលរួមទាំងពាណិជ្ជកម្មឆ្លងព្រំដែនផងនោះ មានចំនួន ១៤១,០៧ប៊ីលានបាត (៤,២២ប៊ីលានដុល្លារអាម៉េរិក) កាលពីក្នុងខែមករា ដោយកើនឡើង ៩,៤៩ភាគរយ។
ក្រសួងពាណិជ្ជកម្មថៃបានរាយការណ៍កាលពីថ្ងៃទី១៥ ខែមីនាថា ពាណិជ្ជកម្មកាលពីក្នុងខែមករារបស់ប្រទេសថៃជាមួយប្រទេសម៉ាឡេស៊ីមានចំនួន ៣០,៥៤ប៊ីលានបាត (កើនឡើង ១៤,២៦ភាគរយ) ជាមួយប្រទេសកម្ពុជាមានចំនួន ១៧,៧៦ប៊ីលានបាត (កើនឡើង ១៧,៩៤ភាគរយ) ជាមួយប្រទេសឡាវមានចំនួន ២៣,៤៥ប៊ីលានបាត (កើនឡើង ៣៩,៨៦ភាគរយ) ជាមួយប្រទេសមីយ៉ាន់ម៉ាមានចំនួន ១៨,៦០ប៊ីលានបាត (កើនឡើង ៣៦,២៦ភាគរយ) ជាមួយប្រទេសសិង្ហបុរីមានចំនួន ១០,២៧ប៊ីលានបាត (កើនឡើង ២៦,០៥ភាគរយ) ជាមួយប្រទេសវៀតណាមមានចំនួន ៨,០៦ប៊ីលានបាត (កើនឡើង ៣៦,១៩ភាគរយ) និងជាមួយប្រទេសចិនមានចំនួន ១៦,៩៨ប៊ីលានបាត (ធ្លាក់ចុះ ២៤,៣៤ភាគរយ)។
ឧបនាយករដ្ឋមន្រ្តី និងជារដ្ឋមន្ត្រីក្រសួងពាណិជ្ជកម្មថៃ លោក Jurin Laksanawisit បាននិយាយថា លោកបានស្នើឱ្យក្រសួងកសិកម្ម និងក្រសួងការបរទេស តាមដានការនាំចេញផ្លែឈើទៅកាន់ប្រទេសចិន ដែលជាទីផ្សារដ៏ធំសម្រាប់ផ្លែឈើថៃ ប៉ុន្តែគោលនយោបាយនៃជំងឺកូវីដកម្រិតសូន្យរបស់វាមានភាពតឹងរ៉ឹងយ៉ាងខ្លាំង ជាពិសេសនៅក្នុងលក្ខខណ្ឌនៃការដឹកជញ្ជូនតាមផ្លូវគោក។
លោកបាននិយាយថា ក្រៅពីការអនុវត្តវិធានការតឹងរ៉ឹងមុននឹងបិទការដឹកជញ្ជូនកុងតឺន័រ ប្រទេសថៃក៏បានស្នើសុំផ្លូវពិសេសមួយដែលត្រូវបានបង្កើតឡើងដើម្បីដឹកជញ្ជូនផ្លែឈើរបស់ខ្លួនទៅកាន់ប្រទេសចិនផងដែរ។ ក្រសួងកសិកម្ម និងសហករណ៍ នឹងទទួលខុសត្រូវចំពោះបញ្ហានេះ។
ក្រសួងពាណិជ្ជកម្មនឹងពន្លឿនការបើកច្រកព្រំដែនឡើងវិញ ហើយនឹងចរចាដើម្បីបើកផ្លូវថ្មីសម្រាប់ពាណិជ្ជកម្ម ដោយក្រសួងនេះបាននិយាយបន្ថែមថា ផ្លូវដែករវាងចិន-ឡាវនឹងត្រូវបានប្រើប្រាស់ជាផ្លូវមួយផ្សេងទៀតសម្រាប់ការនាំចេញរបស់ប្រទេសថៃនាពេលអនាគត៕(ប្រភព VNA បកប្រែដោយលោក យា ចិន្តាខន្តី)
