ប្រទេសសិង្ហបុរី និងបារាំង បានចុះហត្ថលេខាលើភាពជាដៃគូឌីជីថល និងបៃតង (DGP) ដែលមានគោលបំណងពង្រឹងកិច្ចសហប្រតិបត្តិការនៅក្នុងវិស័យដែលកំពុងមានការរីកចម្រើនយ៉ាងឆាប់រហ័សទាំងនេះ។
ភាពជាដៃគូនេះត្រូវបានចុះហត្ថលេខានៅក្នុងពិធីនិម្មិតមួយដោយរដ្ឋមន្ត្រីទទួលបន្ទុកទំនាក់ទំនងពាណិជ្ជកម្មរបស់ប្រទេសសិង្ហបុរី លោក S. Iswaran និងរដ្ឋមន្ត្រីពាណិជ្ជកម្មរបស់ប្រទេសបារាំង លោក Franck Riester កាលពីថ្ងៃទី១៤ ខែមីនា។
ប្រទេសទាំងពីរកំពុងបង្កើតផែនការការងារ ដែលរួមមានគម្រោងសហប្រតិបត្តិការជាមួយនឹងលទ្ធផលច្បាស់លាស់ និងជាក់ស្តែងក្នុងវិស័យផ្សេងៗ ដែលរួមមានវិស័យដឹកជញ្ជូនឆ្លាតវៃ សេវាហិរញ្ញវត្ថុ និងបច្ចេកវិទ្យាវេជ្ជសាស្ត្រ។ ប្រទេសទាំងពីរនឹងបង្កើតក្រុមការងាររួមមួយដែលមានអ្នកតំណាងមកពីប្រទេសនីមួយៗ ដើម្បីត្រួតពិនិត្យការអនុវត្តគំនិតផ្តួចផ្តើមក្រោមភាពជាដៃគូឌីជីថល និងបៃតងនេះ។
លោក Iswaran បាននិយាយថា ភាពជាដៃគូនេះ គឺជាផ្នែកមួយនៃយុទ្ធសាស្រ្តធំជាងរបស់ប្រទេសសិង្ហបុរីក្នុងការកសាងបណ្តាញនៃភាពជាដៃគូអន្តរជាតិដែលអាចឱ្យបណ្តាក្រុមហ៊ុនរបស់ខ្លួន ជាពិសេសសហគ្រាសធុនតូច និងមធ្យមអាចចាប់យកឱកាសកំណើននៅក្នុងសេដ្ឋកិច្ចឌីជីថល និងបៃតង។
លោកបាននិយាយថា វាក៏ជាគំនិតផ្តួចផ្តើមថ្មីបំផុតក្នុងការបន្តធ្វើបច្ចុប្បន្នភាព និងពង្រឹងភាពជាដៃគូសេដ្ឋកិច្ចដ៏រឹងមាំរវាងប្រទេសបារាំង និងសិង្ហបុរី ដោយលោកបាននិយាយបន្ថែមថា DGP ក៏នឹងបំពេញបន្ថែមនូវកិច្ចពិភាក្សានៅកម្រិតពហុភាគី តំបន់ និងទ្វេភាគី រួមទាំងកិច្ចខិតខំប្រឹងប្រែងបន្តជាមួយសហភាពអឺរ៉ុបផងដែរដើម្បីអភិវឌ្ឍភាពជាដៃគូឌីជីថលរវាងសហភាពអឺរ៉ុប-សិង្ហបុរី។
បច្ចុប្បន្ននេះ ប្រទេសបារាំង គឺជាដៃគូពាណិជ្ជកម្មធំលំដាប់ទីពីររបស់ប្រទេសសិង្ហបុរី និងជាដៃគូពាណិជ្ជកម្មធំលំដាប់ទីបួនរបស់សហភាពអឺរ៉ុបនៅក្នុងវិស័យមុខទំនិញ និងសេវាកម្មរៀងៗខ្លួន។ សិង្ហបុរី គឺជាដៃគូពាណិជ្ជកម្ម និងការវិនិយោគកំពូលរបស់ប្រទេសបារាំងនៅក្នុងសមាគមប្រជាជាតិអាស៊ីអាគ្នេយ៍។ មានក្រុមហ៊ុនអាជីវកម្មរបស់បារាំងជាង ២ ៥០០ និងក្រុមហ៊ុនដែលទើបចាប់ផ្តើមអាជីវកម្មរបស់បារាំងចំនួន ៣០០ នៅក្នុងប្រទេសសិង្ហបុរី៕
