ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានកោតសរសើរពីគំនិតច្នៃប្រឌិតរបស់យុវជនខ្មែរ ដែលយកសម្បកពោតមកច្នែជាផ្កាតាំងលម្អយ៉ាងស្រស់ស្អាត ដោយ សារតែសម្បកពោតត្រូវបានគេមើលរំលង និងមិនមាន តម្លៃអ្វីនោះឡើយ ។
ឯកឧត្តមរដ្ឋមន្ត្រី ខៀវ កាញារីទ្ធ មានប្រសាសន៍បែបនេះ ក្នុងឱកាសដែលឯកឧត្តមរដ្ឋមន្ត្រី អនុញ្ញាតឱ្យមន្ត្រីយកព័ត៌មាននៃអគ្គនាយកដ្ឋានវិទ្យុជាតិកម្ពុជា ជូនកន្ត្រក់ផ្កាដែលទទួលបានពីហាងផ្កាខ្មែរ និងគោរពសុំអនុសាសន៍ណែនាំបន្ថែមពីឯកឧត្តមរដ្ឋមន្ត្រី ដើម្បីឱ្យក្រុមការងារអនុវត្តន៍ការងារកាន់តែល្អប្រសើរជាងមុន សម្រាប់បម្រើដល់ការស្តាប់និងទស្សនារបស់ប្រជាពលរដ្ឋនៅទូទាំងប្រទេស តាមរយៈប្រព័ន្ធផ្សព្វផ្សាយជាតិ ទាំងវិទ្យុជាតិកម្ពុជា វិទ្យុជាតិវត្តភ្នំ ហ្វេសប៊ុកផេករបស់អគ្គនាយកដ្ឋានវិទ្យុជាតិកម្ពុជា អេបវិទ្យុជាតិកម្ពុជា និងអេបក្រសួងព័ត៌មាន ។
ឯកឧត្តមរដ្ឋមន្ត្រី បានគាំទ្រផលិតផលទាំងអស់ដែលជាស្នាដៃកូនខ្មែរផលិត ដើម្បីជាការលើកទឹកចិត្តដល់យុវជនខ្មែរដ៏ទៃទៀត ក្នុងការចូលរួមកែច្នៃរបស់មិនមានតម្លៃ ឱ្យទៅជាវត្ថុតាំងលម្អដ៏ស្រស់ស្អាត ឱ្យបានកាន់តែច្រើនបន្ថែមទៀត ដោយសារតែបច្ចុប្បន្ននេះយុវជនម្នាក់ៗ មានការយល់ដឹងច្បាស់ពីបច្ចេកទេសកែច្នៃដ៏សម្បូរបែប និងត្រឹមត្រូវតាមស្តង់ដារយ៉ាងច្បាស់លាស់ ។
ក្នុងឱកាសនោះ ឯកឧត្តមរដ្ឋមន្ត្រីក្រសួងព័ត៌មាន ក៏បានកោតសរសើរដល់ក្រុមការងារផលិតព័ត៌មានរបស់វិទ្យុជាតិកម្ពុជា ដែលបានផលិតព័ត៌មានថ្មីៗ ប្លែកៗ និងទាន់ពេលវេលា ពីគំនិតច្នៃប្រឌិតរបស់ប្រជាពលរដ្ឋខ្មែរ សម្រាប់ដាក់ផ្សាយនៅក្នុងប្រព័ន្ធផ្សព្វផ្សាយជាតិ ទំាងវិទ្យុជាតិកម្ពុជា វិទ្យុវត្តភ្នំ ហ្វេសប៊ុកផេករបស់អគ្គនាយកដ្ឋានវិទ្យុជាតិកម្ពុជា អេបវិទ្យុជាតិកម្ពុជា និងអេបក្រសួងព័ត៌មាន ។
ជាងនេះទៅទៀត ឯកឧត្តមក៏បានជំរុញឱ្យបន្តកិច្ចខិតខំប្រឹងប្រែង ផលិតព័ត៌មាននេះឱ្យកាន់តែល្អ និងមានគុណភាពបន្ថែមទៀត ដើម្បីបំរើដល់ការស្តាប់និងការទស្សនារបស់ប្រជាពលរដ្ឋ ៕
