ខេត្តកណ្ដាល៖ ព្រឹកថ្ងៃអង្គារ ១៣កើត ខែផល្គុន ឆ្នាំឆ្លូវ ត្រីសក័ ពុទ្ធសរាជ ២៥៦៥ ត្រូវនឹងថ្ងៃទី១៥ ខែមិនា ឆ្នាំ២០២២
ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកណ្ដាល ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានជំរុញដល់រដ្ឋបាលខេត្តកណ្ដាល ក្រុង-ស្រុក ខិតខំសម្របសម្រួល និង ពង្រឹងការផ្តល់សេវាតាមអង្គភាពច្រកចេញចូល តែមួយនៅសាលាខេត្ត ដើម្បីបង្កលក្ខណៈងាយស្រួលជូនប្រជាពលរដ្ឋ។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានជំរុញបែបនេះ ក្នុងឱកាសឯកឧត្តមអញ្ជើញជាអធិបតីភាព ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ ២០២១ និង លើកទិសដៅការងារឆ្នាំ ២០២២ របស់រដ្ឋបាលខេត្តកណ្តាល នៅសាលាខេត្តកណ្ដាល។
ឯកឧត្តមអគ្គបណ្ឌិតសភាចារ្យ បន្តថា ដើម្បីបង្កលក្ខណៈងាយស្រួលជូនប្រជាពលរដ្ឋ រដ្ឋបាលខេត្តត្រូវខិតខំសម្របសម្រួល និង ពង្រឹងការផ្តល់សេវាតាមអង្គភាពច្រកចេញចូលតែមួយ ព្រមទាំងពិនិត្យ តាមដាន និង គាំទ្រដល់ដំណើរការការិយាល័យច្រកចេញចូលតែមួយ និង ការិយាល័យប្រជាពលរដ្ឋនៅរដ្ឋបាលក្រុង-ស្រុក ដើម្បីធានាថា ការផ្តល់សេវារដ្ឋបាលទាំងនេះ ដំណើរការប្រកបដោយតម្លាភាព និងគណនេយ្យភាព ស្របតាមគោលការណ៍ បែបបទ និងនីតិវិធី ដែលត្រូវបានកំណត់ ។ ទន្ទឹមនេះ ត្រូវខិតខំជំរុញ និង សម្របសម្រួលជាមួយមន្ទីរ និងអង្គភាពជំនាញពាក់ព័ន្ធ ដើម្បីពន្លឿនការផ្ទេរសេវានានាដែលនៅសេសសល់ មកឱ្យអង្គភាពច្រកចេញចូលតែមួយនៅសាលាខេត្ត រួមទាំងផ្តល់ការគាំទ្រខាងបច្ចេកទេស និង ការកសាងសមត្ថភាពដល់ការ ផ្តល់សេវាទាំងនេះឱ្យកាន់តែមានប្រសិទ្ធភាពថែមទៀត។ ត្រូវបន្តពង្រឹងសមត្ថភាពដល់មន្ត្រីផ្ដល់សេវា នៅថ្នាក់ក្រោមជាតិ ក្នុងការបំពេញការងារប្រកបដោយក្រមសីលធម៌វិជ្ជាជីវៈ ព្រមទាំងខិតខំកែលម្អឥរិយាបថក្នុងការ ប្រាស្រ័យទាក់ទងជាមួយប្រជាពលរដ្ឋ រួមគ្នាដោះស្រាយសំណើ, សំណូមពរ និង បញ្ហាប្រឈម នានានៅមូលដ្ឋានប្រកបដោយតម្លាភាព, គណនេយ្យភាព និង យុត្តិធម៌ ដោយមិនត្រូវមានការ រើសអើង, ការបែងចែកប្រកាន់បក្សពួក, គ្រួសារនិយម និង និន្នាការនយោបាយ ដើម្បីបង្កើនជំនឿ ទុកចិត្ត និង ការគាំទ្រពីប្រជាពលរដ្ឋ ។
ក្រៅពីនេះ ឯកឧត្តមអគ្គបណ្ឌិតសភាចារ្យ បានស្នើដល់រដ្ឋបាលខេត្តកណ្ដាល ត្រូវខិតខំដោះស្រាយបញ្ហាវិវាទដីធ្លីឱ្យបានឆាប់រហ័ស ជៀសវាងទុកវិវាទទាំង នោះឱ្យរីករាលដាល និង កាន់តែស្មុគស្មាញ ពិបាកក្នុងការដោះស្រាយ ។ រដ្ឋបាលខេត្តកណ្តាលចាំបាច់ត្រូវបន្តយកចិត្តទុកដាក់ ក្នុងការដោះស្រាយបញ្ហាសំរាម កាកសំណល់រឹង សំណល់រាវ និង ការសម្អាតទីក្រុង ដើម្បីឱ្យខេត្តកណ្តាលមានសោភ័ណភាពល្អ សណ្ដាប់ធ្នាប់ អនាម័យ និង បរិស្ថានស្អាត ក្លាយជាទីក្រុងបៃតង ដែលជាទីកន្លែងផ្តល់នូវសុខុមាលភាពរស់នៅរបស់ប្រជាពលរដ្ឋ ភ្ញៀវ ទេសចរជាតិ និង អន្តរជាតិ។ កងកម្លាំងមានសមត្ថកិច្ចគ្រប់លំដាប់ថ្នាក់ ក្នុងខេត្តកណ្តាល ត្រូវបន្តចូលរួម ថែរក្សាការពារសុខសន្តិភាព ស្ថិរភាពនយោបាយ ឯករាជ្យ បូរណភាពទឹកដី អធិបតេយ្យភាព ជាតិ និង ត្រូវការពារសន្តិសុខជាតិ ឱ្យបានរឹងមាំ សំដៅធានាបាននូវប្រក្រតីភាពនៃស្ថាប័នជាតិ ការពារព្រះមហាក្សត្រ ការពាររបបរាជានិយមអាស្រ័យរដ្ឋធម្មនុញ្ញ។
ឯកឧត្តមអគ្គបណ្ឌិតសភាចារ្យ បន្ថែមថា ថ្នាក់ដឹកនាំរដ្ឋបាលគ្រប់ថ្នាក់ត្រូវពង្រឹងរបៀប របបធ្វើការងារ ទំនាក់ទំនងការងារ សាមគ្គីភាព ឯកភាពផ្ទៃក្នុងឱ្យបានល្អ ត្រូវធ្វើជាស្នូលក្នុងការពង្រឹងរបៀបរបបការងារផ្ទៃក្នុង ក្រុមប្រឹក្សា និង គណៈអភិបាលរបស់ខ្លួនស្របតាមច្បាប់ និង លិខិតបទដ្ឋាននានាជាធរមាន ។
