រដ្ឋាភិបាលឥណ្ឌូណេស៊ីប្តេជ្ញាចាក់វ៉ាក់សាំងការពារជំងឺកូវីដ-១៩ ដល់ប្រជាជនគោលដៅឱ្យបានគ្រប់អស់នៅចុងខែមីនានេះ។
យោងតាមតួលេខដែលបានរាយការណ៍ដោយរដ្ឋាភិបាលបានឱ្យដឹងថា យ៉ាងហោចណាស់ប្រជាជនចំនួន ៩២ភាគរយនៃប្រជាជនគោលដៅដែលមានសិទ្ធិទទួលបានការចាក់វ៉ាក់សាំងជាង ២០៨លាននាក់បានទទួលការចាក់វ៉ាក់សាំងការពារជំងឺកូវីដ-១៩ យ៉ាងហោចណាស់មួយដូស គិតត្រឹមថ្ងៃទី៥ ខែមីនា ហើយ ៧០,៧ភាគរយនៃប្រជាជនគោលដៅបានទទួលការចាក់វ៉ាក់សាំងគ្រប់ដូស។
អ្នកនាំពាក្យក្រសួងសុខាភិបាលឥណ្ឌូណេស៊ី លោកស្រី Siti Nadia Tarmizi បាននិយាយថា រដ្ឋាភិបាលមានគោលបំណងចាក់វ៉ាក់សាំងគ្រប់ដូសឱ្យដល់ប្រជាជនយ៉ាងហោចណាស់ ៧០ភាគរយនៃចំនួនប្រជាជនឥណ្ឌូណេស៊ីទាំងមូល ហើយវ៉ាក់សាំងដូសជំរុញអាចត្រូវបានចាក់ក្នុងរយៈពេល ៣ខែបន្ទាប់ពីការចាក់វ៉ាក់សាំងដូសចុងក្រោយ។
នៅចុងឆ្នាំ២០២១ រដ្ឋាភិបាលឥណ្ឌូណេស៊ីបានពង្រីកក្រុមគោលដៅសម្រាប់ចាក់វ៉ាក់សាំងដល់ក្រុមកុមារដែលមានអាយុចាប់ពី ៦ឆ្នាំទៅ ១១ឆ្នាំ។ វាត្រូវបានគេជឿថានៅពេលដែលប្រជាជនចំនួន ៧០ភាគរយនៃចំនួនប្រជាជនសរុបត្រូវបានចាក់វ៉ាក់សាំងគ្រប់ដូស នោះប្រទេសក្នុងតំបន់អាស៊ីអាគ្នេយ៍មួយនេះនឹងឈានដល់ភាពស៊ាំប្រឆាំងនឹងជំងឺរាតត្បាត។
យោងតាមគេហទំព័រ worldometers.info បានឱ្យដឹងថា ប្រទេសឥណ្ឌូណេស៊ីបានកត់ត្រានូវករណីឆ្លងសរុបនៃជំងឺកូវីដ-១៩ ចំនួន ៥ ៧៤៨ ៧២៥នាក់ ដោយក្នុងនោះមានអ្នកស្លាប់សរុបចំនួន ១៥០ ១៧២នាក់ ដោយ គិតត្រឹមថ្ងៃទី៦ ខែមីនា៕
