សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជាបានប្រកាសមិនអនុញ្ញាតឱ្យចាក់វ៉ាក់សាំង សម្រាប់ការពារជំងឺកូវីដ១៩ ដែលហួសសុពលភាពជូនប្រជាពលរដ្ឋឡើយ។
ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការមន្ទីពេទ្យមិត្តភាពកម្ពុជា-ចិន ត្បូងឃ្មុំ នាព្រឹកថ្ងៃ ទី០៧ ខែមីនា ឆ្នាំ២០២២ សម្តេចតេជោ ហ៊ុន សែន បានគូសបញ្ជាក់ថា “អាហ្នឹងដូចជាគេយកវ៉ាក់សាំងយកមកបោះចោលក្នុងស្រុកយើង ខ្ញុំអត់ឱ្យចាក់ទេ ដែលវ៉ាក់សាំងខ្លះអស់សុពលភាពនៅចុងខែ៣ បើអស់សុពលភាពចុងខែ៣ យើងទទួលយកអត់បានទេ ពីព្រោះឡូវពេលវេលាមកដល់ក៏មិនទាន់ជាក់លាក់”។
សម្ដេចតេជោបានស្នើឱ្យក្រសួងសុខាភិបាល ត្រូវពិភាក្សា និងជជែកគ្នាឡើងវិញជាមួយដៃគូ ដែលត្រូវផ្ដល់វ៉ាក់សាំងមកឱ្យកម្ពុជា។ សម្ដេចតេជោបានថ្លែងបញ្ជាក់ថា “កាលពីសួរយោបល់ខ្ញុំសួរក្នុងខែ២ ឥឡូវវាចូលថ្ងៃទី០៧ ខែមីនាហើយនេះ ស្អែកនេះ ៨មីនា សិទ្ធិនារីហើយ។ អីចឹងសូមជជែកឡើងវិញ ប្រសិនបើវ៉ាក់សាំងហ្នឹងវានៅមានសុពលភាពត្រឹមចុងខែ៣ តែបើអាខែ៤ អាចយក បើចុងខែ៣ មិនអាចយកទេ គឺយកមិនទាន់ទេ។ អីចឹងសុំចរចាអាហ្នឹងឡើងវិញ។”
សម្ដេចតេជោនាយករដ្ឋមន្រ្ដីបានលើកឡើងថា បើយកវ៉ាក់សាំងមកគ្រាន់តែឱ្យប្រជាពលរដ្ឋកម្ពុជាចាក់វ៉ាក់សាំង ហើយការចាក់វ៉ាក់សាំងសុវត្ថិភាពពេញមួយប្រទេស អត់មានអ្នកណាម្នាក់ស្លាប់ដោយការចាក់វ៉ាក់សាំងនោះទេ។ ប៉ុន្ដែឥឡូវបែរជាយើងចាក់វ៉ាក់សាំងធ្វើឱ្យស្លាប់មនុស្ស ឬក៏វ៉ាក់សាំងខ្វះសុវត្ថិភាពទៅវិញ ដែលវាអត់សមហេតុសមផល នៅពេលដែលប្រជាពលរដ្ឋលើកឡើងថា ថ្នាំ ឬវ៉ាក់សាំងហួសសុពលភាព យកទៅចាក់ទៀត វារឹតតែពិបាក។ សម្ដេចតេជោក៏បានអរគុណចំណោះមិត្ដភក្ដិ និងដៃគូដែលបានផ្ដល់វ៉ាក់សាំងជូនមកកម្ពុជា ក៏ប៉ុន្ដែបើយើងយកវ៉ាក់សាំងដែលហួសសុពលភាពចាក់ជូនប្រជាពលរដ្ឋ នោះប្រជាពលរដ្ឋនឹងជេរយើងវិញ។
សម្ដេចតេជោក៏បានសង្កត់ធ្ងន់ថា ប្រសិនបើមានរឿងអីកើតឡើងដោយវ៉ាក់សាំងគឺងាប់បណ្ដោយ ខូចឈ្មោះកងទ័ពអាវស ទៀត និងបង្កើតជារឿង”៕
