ចាប់ពីថ្ងៃទី៣ ខែមីនា អ្នកដំណើរពីបរទេសដែលទៅដល់ប្រទេសម៉ាឡេស៊ីតាមរយៈកម្មវិធីជាក់លាក់មួយចំនួននឹងមិនតម្រូវឱ្យធ្វើតេស្តរកជំងឺកូវីដ-១៩ ទេក្នុងរយៈពេលមួយសប្តាហ៍បន្ទាប់ពីការទៅដល់របស់ពួកគេ។
រដ្ឋមន្ត្រីក្រសួងសុខាភិបាលម៉ាឡេស៊ី លោក ឃែរី ចាម៉ាលូដឌីន បាននិយាយកាលពីថ្ងៃទី២៨ ខែកុម្ភៈថា នីតិវិធីថ្មីបានអនុវត្តចំពោះភ្ញៀវទេសចរដែលចូលមកក្នុងប្រទេសម៉ាឡេស៊ីតាមរយៈកម្មវិធីផ្លូវធ្វើដំណើរសម្រាប់អ្នកដែលបានចាក់វ៉ាក់សាំងរួចរាល់ (Vaccinated Travel Lane (VTL)) រវាងប្រទេសម៉ាឡេស៊ី និងសិង្ហបុរី អ្នកដំណើរដែលមកដល់តាមរយៈមជ្ឈមណ្ឌលច្រកចេញចូលតែមួយ (OSC) សម្រាប់ភ្ញៀវទេសចរអាជីវកម្មរយៈពេលខ្លី និងអ្នកដំណើរដែលមកពីចក្រភពអង់គ្លេស។
លោកបាននិយាយថា ក្រសួងសុខាភិបាល (MOH) ក៏បានលើកលែងនូវលក្ខខណ្ឌនៃតម្រូវការសម្រាប់ការធ្វើតេស្ត RT-PCR ឬ RTK-Ag រកជំងឺកូវីដ-១៩ សម្រាប់អ្នកដំណើរដែលមកដល់ប្រទេសម៉ាឡេស៊ីតាមរយៈកម្មវិធី Langkawi International Tourism Bubble (LITB) មុនពេលចាកចេញពីកោះឡាំងកាវីផងដែរ។
យោងតាមរដ្ឋមន្ត្រីរូបនេះបានឱ្យដឹងថា អ្នកដំណើរទាំងនោះនឹងមិនត្រូវបានតម្រូវឱ្យធ្វើតេស្តដោយខ្លួនឯងនៅថ្ងៃទីពីរ ថ្ងៃទីបួន និងថ្ងៃទីប្រាំមួយបន្ទាប់ពីការមកដល់របស់ពួកគេ ក៏ដូចជាការធ្វើតេស្តរកជំងឺកូវីដ-១៩ ប្រកបដោយវិជ្ជាជីវៈនៅថ្ងៃទីបី និងថ្ងៃទីប្រាំនោះទេ។ អ្នកទេសចរមកពីចក្រភពអង់គ្លេសនឹងត្រូវបានលើកលែងសម្រាប់ការធ្វើតេស្តដោយខ្លួនឯងក្នុងអំឡុងពេលនៃការធ្វើចត្តាឡីស័ក។
ទោះជាយ៉ាងណាក៏ដោយ លោករដ្ឋមន្ត្រីម៉ាឡេស៊ីរូបនេះបាននិយាយថា តម្រូវការសម្រាប់ការធ្វើតេស្ត PCR ក្នុងរយៈពេលពីរថ្ងៃមុនពេលចេញដំណើរ និងភ្លាមៗនៅពេលពួកគេមកដល់ប្រទេសម៉ាឡេស៊ី នៅតែរក្សានៅនឹងកន្លែងដដែល។
លោកបានសង្កត់ធ្ងន់ថា ការបន្ធូរបន្ថយនៃនីតិវិធីប្រតិបត្តិស្តង់ដារ (SOPs) នេះ អនុវត្តចំពោះតែអ្នកដំណើរដែលចូលក្នុងប្រទេសម៉ាឡេស៊ីក្រោមកម្មវិធី VTL, LITB និង OSC ប៉ុណ្ណោះ ដោយលោកបាននិយាយបន្ថែមថា SOP និងពិធីសារផ្សេងៗទៀតនៅតែជាធរមានសម្រាប់អ្នកទេសចរដែលចូលក្នុងប្រទេសម៉ាឡេស៊ីក្រៅពីកម្មវិធីទាំងបីខាងលើ៕
