ឯកឧត្តម ខៀវ កាញារីទ្ធ រដ្ឋមន្រ្ដីក្រសួងព័ត៌មានបានស្នើដល់ភាគីវៀតណាមជួយធ្វើការសម្របសម្រួលដើម្បីឱ្យភាគីកម្ពុជា ខាងផ្នែកបច្ចេកទេស និងអ្នកយកព័ត៌មាន ទូរទស្សន៍ជាតិកម្ពុជាបានទៅធ្វើការដកស្រង់បទពិសោធន៍អំពីព្រឹត្តិការណ៍ស៊ីហ្គេម ខណៈប្រទេសវៀតណាម ធ្វើជាម្ចាស់ផ្ទះស៊ីហ្គេម នៅឆ្នាំ២០២២នេះ។ ការស្នើសុំរបស់ឯកឧត្ដមរដ្ឋមន្រ្ដីនេះ ក្នុងឱកាសអនុញ្ញាតឱ្យ ឯកឧត្តម ង្វៀន ហ្វីតាំង(Nguyen Huy Tang) ឯកអគ្គរដ្ឋទូតតែងតាំងថ្មីនៃសាធារណរដ្ឋសង្គមនិយមវៀតណាមប្រចំានៅកម្ពុជា ចូលជួបសម្ដែងការគួរសម និងពិភាក្សាការងារ កាលពីថ្ងៃទី២៨ ខែកុម្ភ: ឆ្នាំ២០២២ នៅស្តីការក្រសួងព័ត៌មាន ។
ឯកឧត្តម ខៀវ កាញារីទ្ធ បានស្វាគមន៍ចំពោះបេសកកម្មការទូតរបស់ ឯកឧត្តម ង្វៀន ហ្វីតាំង នៅកម្ពុជា ដើម្បីបន្តពង្រឹង និងពង្រីកនូវរាល់កិច្ចសហប្រតិបត្តិការលើគ្រប់ផ្នែកគ្រប់វិស័យ ក្នុងនោះវិស័យព័ត៌មាន ក៏ជាផ្នែកមួយដែលត្រូវបន្តធ្វើឱ្យកាន់តែប្រសើរបន្ថែមទៀត។ ឯកឧត្ដមរដ្ឋមន្រ្ដីបន្ដថា ការដកស្រង់បទពិសោធន៍អំពីព្រឹត្តការណ៍ស៊ីហ្គេមរបស់កម្ពុជា ដែលប្រទេសវៀតណាមធ្វើជាម្ចាស់ផ្ទះ នៅឆ្នាំ២០២២នេះ គឺដើម្បីជាទុកជាបទពិសោធន៍ និងសុំជាកិច្ចសហការក្នុងផ្នែកណាមួយ សម្រាប់កម្ពុជា ដែលត្រូវធ្វើជាម្ចាស់ផ្ទះ រៀបចំការប្រកួតកីឡា អាស៊ីអាគ្នេយ៍លើកទី៣២ ឆ្នាំ២០២៣ ខាងមុខ។
ឯកឧត្តម Nguyen Huy Tang បានសម្ដែងនូវការរីករាយ ដែលបានមកបំពេញបេសកកម្មការទូតនៅកម្ពុជា ក្នុងនោះឯកឧត្ដមបាន លើកពីប្រវត្តិដែលធ្លាប់មកបំពេញកិច្ចការងារនៅកម្ពុជាតាំងពីឆ្នាំ១៩៨០ មកដល់ ពេលនេះមានរយ:ពេលជាង ៤០ ឆ្នាំ ។
ដូច្នេះ ក្នុងអាណត្តិ ការបំពេញបេសកកម្មការទូតនេះ ឯកឧត្តម នឹងប្រឹងប្រែងធ្វើនូវរាល់កិច្ចសហការលើវិស័យព័ត៌មាន នៃប្រទេសទាំងពីរដែលមានស្រាប់ឱ្យបានកាន់តែរឹងមាំបន្តទៅមុខទៀត។ ទន្ទឹមនេះ ភាគីវៀតណាម បានធ្វើការជំរុញឱ្យមានការផ្លាស់ប្តូរដំណើរទស្សនកិច្ចទៅវិញទៅមករវាងគណ:ប្រតិភូថ្នាក់ដឹកនាំ និងមន្រ្តីនៃក្រសួងព័ត៌មាន ប្រទេសទាំងពីរ វៀតណាម និងកម្ពុជា ក៏ដូចជាអ្នកសារព័ត៌មាន ផងដែរ ។
ឯកឧត្ដមឯកអគ្គរដ្ឋទូតក៏បានជំរុញការផ្លាស់ប្តូរឯកសារផ្សព្វផ្សាយពីគ្នាទៅវិញទៅមក ក្នុងទិសដៅប្រយុទ្ធប្រឆាំងព័ត៌មានក្លែងក្លាយ និងឆ្លើយតបជាមួយក្រុមប្រឆាំង ដែល មានបំណងចង់បំបែកបំបាក់ចំណងមិត្តភាព និងកិច្ចសហប្រតិបត្តិការ នៃប្រទេសទាំងពីរ វៀតណាម និងកម្ពុជា។ ជាមួយគ្នានេះ សម្រាប់ឆ្នាំ២០២២នេះ គឺជាខួបនៃទំនាក់ទំនង និង កិច្ចសហប្រតិបត្តិការលើកទី ៥៥ឆ្នាំ រវាងកម្ពុជា និងវៀតណាម និងខួបលើកទី៤៥ ឆ្នាំ នៃការចេញដំណើររបស់សម្តេចតេជោ ហ៊ុន សែន ទៅរកផ្លូវរំដោះជាតិ ពីរបបខ្មែរក្រហម ។
បើតាមឯកឧត្ដមឯកអគ្គរដ្ឋទូតវៀតណាម សម្រាប់ជាជំហ៊ានបន្តបន្ទាប់ទៅមុខទៀតនោះ គឺការពង្រឹងកិច្ចសហការគ្នា រវាងប្រព័ន្ធផ្សព្វផ្សាយ នៃប្រទេសទាំងពីរ ដើម្បីឱ្យប្រជាជន វៀតណាម និងកម្ពុជាបានកាន់ជិតស្និទ្ធជាមួយគ្នា ហើយអ្វីសំខាន់គឺ ក្នុងទិសដៅផ្លាស់ប្តូរ ការផ្សាយពីប្រព័ន្ធ អាណូឡូក ទៅជាឌីជីថល។
ឯកឧត្តម ខៀវ កាញារីទ្ធ រដ្ឋមន្រ្ដីក្រសួងព័ត៌មានបានសម្ដែងនូវការអរគុណចំពោះភាគីវៀតណាម ដែលជានិច្ចកាលតែងតែបានគាំទ្រដល់ដំណើរការស្ដារ និងអភិវឌ្ឍន៍ប្រទេសម្ពុជា តាំងពីដើម រហូតមដល់បច្ចុប្បន្ននេះ ហើយក្នុងនោះ ក៏បានជួយច្រើននៅលើវិស័យព័ត៌មាន ដោយបានធ្វើការបណ្តុះបណ្តាលខាងផ្នែកព័ត៌មាន និងផ្នែកបច្ចេកទេស រួមទាំងបានផ្តល់នូវឧបករណ៍ សម្ភារ ម៉ាស៊ីន ផ្សាយវិទ្យុ និងទូរទស្សន៍ ដល់ក្រសួងព័ត៌មាន កម្ពុជា ដើម្បីដំឡើងនៅតាមបណ្តាខេត្ត រាជធានី ។
ឯកឧត្ដមរដ្ឋមន្រ្ដីសង្ឃឹមថា ភាគីវៀតណាម នឹងបន្តជួយដល់កម្ពុជា លើផ្នែកការងារផ្សព្វផ្សាយ វិទ្យុ និងទូរទស្សន៍ បន្ថែមទៀត៕
