ប្រព័ន្ធផ្សព្វផ្សាយក្នុងស្រុកបានរាយការណ៍ថា ប្រជាជនប្រហែល ១២ ០០០នាក់នៅក្នុងប្រទេសម៉ាឡេស៊ីត្រូវបានជម្លៀសចេញពីផ្ទះរបស់ពួកគេ បន្ទាប់ពីមានភ្លៀងធ្លាក់ខ្លាំងបានបណ្តាលឱ្យមានគ្រោះទឹកជំនន់នៅក្នុងរដ្ឋភាគខាងជើងរបស់ប្រទេសនេះកាលពីចុងសប្តាហ៍។
ទិន្នន័យផ្លូវការបានបង្ហាញថា ប្រជាជនចំនួន ១១ ៨៣១នាក់កំពុងរស់នៅក្នុងមជ្ឈមណ្ឌលសង្គ្រោះទឹកជំនន់នៅភាគខាងជើងរដ្ឋ Kelantan និងរដ្ឋ Terengganu ដោយគិតត្រឹមម៉ោង ៤:៣០នាទីល្ងាចថ្ងៃទី២៧ ខែកុម្ភៈ។
នាយករដ្ឋមន្ត្រីម៉ាឡេស៊ី លោក Ismail Sabri Yaakob បានសរសេរនៅក្នុងបណ្តាញសង្គម Facebook ថា អាជ្ញាធរកំពុងត្រូវបានចល័តដើម្បីជម្លៀសជនរងគ្រោះ ដោយលោកបាននិយាយបន្ថែមថា អ្នករងគ្រោះជាច្រើននាក់កំពុងត្រូវបានជួយសង្គ្រោះ និងត្រូវបានបញ្ជូនទៅកន្លែងមានសុវត្ថិភាព។
នាយកដ្ឋានឧតុនិយមរបស់ប្រទេសម៉ាឡេស៊ីបានព្រមានថា អាកាសធាតុអាក្រក់នឹងបន្តកើតមាននៅក្នុងរដ្ឋទាំងនេះ ដោយនឹងមានភ្លៀងធ្លាក់ខ្លាំងនៅក្នុងឧបទ្វីបជាច្រើន ក៏ដូចជាផ្នែកខ្លះនៃកោះ Borneo ផងដែរ។
ការព្រមានចំពោះកម្លាំងខ្យល់បក់ខ្លាំង និងខ្យល់ព្យុះនៅសមុទ្រ ជាពិសេសនៅសមុទ្រខាងកើត និងចុងខាងជើងនៃច្រកសមុទ្រម៉ាឡាកាក៏ត្រូវបានដាក់ចេញផងដែរ។
នៅពេលមុននេះ ភ្លៀងមូសុងខ្លាំងចាប់ពីពាក់កណ្តាលខែធ្នូដល់ដើមខែមករា បាននាំឱ្យមានគ្រោះទឹកជំនន់ដ៏អាក្រក់បំផុតមួយចំនួននៅក្នុងប្រទេសម៉ាឡេស៊ីក្នុងរយៈពេលជាច្រើនទសវត្សរ៍មក។
ប្រជាជនប្រហែល ៥០នាក់បានស្លាប់ និង ១២៥ ០០០នាក់ត្រូវបានបង្ខំឱ្យចាកចេញពីផ្ទះរបស់ពួកគេ ដោយអាជ្ញាធរបានកត់ត្រានូវការខូចខាតជាង ១,៤៥ប៊ីលានដុល្លារអាម៉េរិក៕
