ក្រុមហ៊ុនឱសថរដ្ឋ PT Bio Farma របស់ប្រទេសឥណ្ឌូណេស៊ី នឹងផលិតវ៉ាក់សាំងការពារជំងឺកូវីដ-១៩ ដោយប្រើបច្ចេកវិទ្យា mRNA បន្ទាប់ពីប្រទេសនៅក្នុងតំបន់អាស៊ីអាគ្នេយ៍មួយនេះត្រូវបានចាត់តាំងដោយអង្គការសុខភាពពិភពលោក (WHO) ជាអ្នកទទួលផលពីការផ្ទេរបច្ចេកវិទ្យានៃការផលិតវ៉ាក់សាំងនេះ។
នាយកក្រុមហ៊ុនឱសថនេះ លោក Honesti Basyir បាននិយាយនៅក្នុងសេចក្តីថ្លែងការណ៍មួយថា ក្រុមហ៊ុនឱសថ PT Bio Farma គឺជាក្រុមហ៊ុនផលិតវ៉ាក់សាំងតែមួយគត់នៅក្នុងប្រទេសឥណ្ឌូណេស៊ីដែលត្រូវបានជ្រើសរើសដើម្បីទទួលបានបច្ចេកវិទ្យា mRNA ពីអង្គការ WHO ។
លោកបាននិយាយថា ក្រុមហ៊ុនរបស់លោកខ្លួនឯងបានរៀបចំអ្វីៗគ្រប់យ៉ាងដែលទាក់ទងនឹងការអភិវឌ្ឍបច្ចេកវិទ្យា mRNA នេះ ដូចជាការកសាងកន្លែងផលិត ការផលិតសាកល្បង និងទំហំពាណិជ្ជកម្មមានកម្រិត។
លោកបាននិយាយបន្ថែមថា កាលពីមុន ក្រុមហ៊ុនឱសថនេះបានស្វែងរកដៃគូសម្រាប់ការអភិវឌ្ឍតាមរយៈការស្វែងរកកិច្ចសហប្រតិបត្តិការជាមួយសាកលវិទ្យាល័យ Manchester ដែលមានមូលដ្ឋាននៅចក្រភពអង់គ្លេសសម្រាប់ជំនាញនៃបច្ចេកវិទ្យា mRNA ដូច្នេះក្រុមហ៊ុន Bio Farma មានមូលដ្ឋានរួចជាស្រេចសម្រាប់បច្ចេកវិទ្យា mRNA នេះ។
លោកបាននិយាយបន្ថែមថា ជាជំហានដំបូង ក្រុមហ៊ុនឱសថ Bio Farma នឹងរៀនធ្វើជាម្ចាស់ទៅលើវេទិកាបច្ចេកវិទ្យា mRNA នេះ សម្រាប់ប្រភេទវ៉ាក់សាំងផ្សេងៗទៀតក្រៅពីវ៉ាក់សាំងការពារជំងឺកូវីដ-១៩ ព្រោះបច្ចេកវិទ្យា mRNA គឺជាការឆ្លើយតបយ៉ាងឆាប់រហ័ស និងជាបច្ចេកវិទ្យាលឿនក្នុងការអភិវឌ្ឍ និងផលិតវ៉ាក់សាំង។
ក្រៅពីការផលិតវ៉ាក់សាំង បច្ចេកវិទ្យា mRNA នេះក៏អាចប្រើប្រាស់ដើម្បីផលិតនូវផលិតផលព្យាបាលផ្សេងទៀត ដូចជាឱសថព្យាបាលជំងឺមហារីក និងឱសថព្យាបាលជំងឺដទៃៗទៀតដែរ។
ក្រុមហ៊ុនឱសថ Bio Farma គឺជាក្រុមហ៊ុនផលិតវ៉ាក់សាំងធំជាងគេនៅអាស៊ីអាគ្នេយ៍ ដែលមានសមត្ថភាពផលិតប្រចាំឆ្នាំបានដល់ទៅ ៣,២ប៊ីលានដូស៕
