ខណៈដែលជម្លោះយោធារវាងប្រទេសរុស្ស៊ី និងអ៊ុយក្រែននៅតែបន្តកាន់តែខ្លាំង ភាគីទាំងពីរបានបង្ហាញឆន្ទៈក្នុងការពិភាក្សាគ្នាដើម្បីដោះស្រាយវិបត្តិតាមរយៈកិច្ចសន្ទនា។
បើទោះបីជាមានការដាក់ទណ្ឌកម្មដោយប្រទេសលោកខាងលិចមួយចំនួនក៏ដោយ ក៏នៅតែមានសមាជិកនៃសហគមន៍អន្តរជាតិអំពាវនាវឱ្យមានដំណោះស្រាយដោយសន្តិវិធីចំពោះបញ្ហាដែលកំពុងកើតមានឡើងនេះ។
អ្នកនាំពាក្យក្រសួងការពារជាតិរុស្ស៊ី លោក Igor Konashenkov បាននិយាយកាលពីយប់ថ្ងៃសុក្រថា កងកម្លាំងប្រដាប់អាវុធរុស្ស៊ីបានកម្ទេចទីតាំងហេដ្ឋារចនាសម្ព័ន្ធយោធាចំនួន ២១១កន្លែងក្នុងប្រទេសអ៊ុយក្រែន ចាប់តាំងពីប្រតិបត្តិការបានចាប់ផ្តើមកាលពីដើមថ្ងៃព្រហស្បតិ៍មក ពោលគឺកើនឡើងពីចំនួន ១១៨កន្លែងដែលត្រូវបានរាយការណ៍របស់លោកនៅក្នុងសន្និសីទខ្លីមួយកាលពីព្រឹកថ្ងៃសុក្រ។
លោក Konashenkov ក៏បានប្រកាសផងដែរនៅថ្ងៃដដែលនោះថា កងកម្លាំងរុស្ស៊ីបានដណ្តើមយកអាកាសយានដ្ឋាន Hostomel នៅភាគពាយព្យនៃទីក្រុងគៀវ និងបានបិទរដ្ឋធានីអ៊ុយក្រែនពីភាគខាងលិច ហើយនឹងបន្តអនុវត្តការងារនៅក្នុងតំបន់នានានៃទីក្រុងផ្សេងៗទៀត។
ប្រទេសរុស្ស៊ីក៏បានគ្រប់គ្រងទាំងស្រុងនូវរោងចក្រថាមពលនុយក្លេអ៊ែរ Chernobyl និងអង្គភាពយោធានៃភាគីទាំងពីរនៅទីនោះដែលបានឈានដល់កិច្ចព្រមព្រៀងមួយ ស្តីពីការការពាររោងចក្រនុយក្លេអ៊ែរ។
ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ត្រូវបានដកស្រង់សម្តីដោយទីភ្នាក់ងារសារព័ត៌មាន Interfax-Ukraine ដែលបាននិយាយកាលពីថ្ងៃសុក្រថា «ការប្រយុទ្ធកំពុងកើតមានឡើងនៅទូទាំងប្រទេសអ៊ុយក្រែន។ ចូរយើងអង្គុយនៅតុចរចា»។ លោកបានអំពាវនាវឱ្យមានកិច្ចចរចាដើម្បីបញ្ចប់ជម្លោះដ៏តានតឹងនេះ។
កាលពីល្ងាចថ្ងៃសុក្រ អ្នកនាំពាក្យវិមានក្រឹមឡាំង លោក ឌ្មីទ្រី ប៉េស្កូវ បានបញ្ជាក់ថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានត្រៀមខ្លួនរួចជាស្រេចក្នុងការបញ្ជូនគណៈប្រតិភូទៅកាន់រដ្ឋធានី Minsk របស់ប្រទេសបេឡារុស្ស ដើម្បីធ្វើកិច្ចចរចាជាមួយអ៊ុយក្រែនក្នុងកម្រិតតំណាងនៃក្រសួងការពារជាតិ ក្រសួងការបរទេស និងរដ្ឋបាលប្រធានាធិបតី៕
