អ្នកដំណើរអន្តរជាតិដែលបានទទួលការចាក់វ៉ាក់សាំងការពារជំងឺកូវីដ-១៩ ដូសជំរុញ នឹងត្រូវបានអនុញ្ញាតឱ្យចូលទៅទស្សនាប្រទេសឥណ្ឌូណេស៊ីជាមួយនឹងការធ្វើចត្តាឡីស័ករយៈពេលត្រឹមតែបីថ្ងៃប៉ុណ្ណោះ។
ទន្ទឹមនឹងនេះដែរ អ្នកធ្វើដំណើរចូលទៅក្នុងប្រទេសនេះទាំងពលរដ្ឋឥណ្ឌូណេស៊ី និងជនបរទេស ដែលបានចាក់វ៉ាក់សាំងចំនួនពីរដូស នឹងត្រូវធ្វើចត្តាឡីស័ករយៈពេលប្រាំថ្ងៃ ហើយអ្នកដែលបានចាក់វ៉ាក់សាំងតែមួយដូសនឹងត្រូវធ្វើចត្តាឡីស័ករយៈពេលប្រាំពីរថ្ងៃ។
បទប្បញ្ញត្តិនេះនឹងចូលជាធរមានចាប់ពីថ្ងៃទី១៧ ខែកុម្ភៈនេះទៅ។
សម្រាប់ពលករចំណាកស្រុកឥណ្ឌូណេស៊ី និស្សិតដែលបានបញ្ចប់ការសិក្សានៅបរទេស មន្ត្រីរដ្ឋាភិបាលដែលធ្វើដំណើរទៅផ្ទះវិញពីដំណើរទស្សនកិច្ចផ្លូវការ និងប្រតិភូឥណ្ឌូណេស៊ីដែលត្រឡប់មកពីការប្រកួតកីឡា ឬពិធីបុណ្យអន្តរជាតិនានា ការចំណាយទៅលើការធ្វើចត្តាឡីស័កនឹងត្រូវទទួលខុសត្រូវដោយរដ្ឋាភិបាល។
