សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានណែនាំ ឱ្យអាជ្ញាធរ រាជធានី-ខេត្ត ត្រូវបង្កលក្ខណៈសម្បត្តិ ឱ្យបណ្តាគណបក្សនយោបាយ ដែលទទួលស្គាល់ដោយក្រសួងមហាផ្ទៃចូលរួមការបោះឆ្នោត ឃុំ សង្កាត់ មានឱកាសជួបជុំសមាជិក សមាជិការបស់ខ្លួន ។
ថ្លែងក្នុងពិធីសម្ពោធស្ពាន៧កន្លែងក្នុងខេត្តក្រចេះ និងព្រៃវែង តម្លៃ៣៥លានដុល្លារ ជាជំនួយរបស់រដ្ឋាភិបាលជប៉ុន នាថ្ងៃទី១៦ ខែកុម្ភៈ ឆ្នាំ២០២២នេះ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបាន អំពាវនាវដល់ គណបក្សនយោបាយទាំងអស់ ត្រូវគោរពតាមច្បាប់ដែលមានជាធរមាន ឬច្បាប់កំណត់ដោយគណៈកម្មាធិការជាតិរៀបចំ ការបោះ ឆ្នោត។
សម្តេចតេជោបន្តថា ទោះបីយុទ្ធនាការបោះឆ្នោតមិនទាន់មកដល់ក៏ពិតមែន ក៏ប៉ុន្តែគ្រប់គណបក្សទាំងអស់មានឱកាសជួបជុំ សមាជិក សមាជិកា ដោយមិនចាំបាច់ដល់ថ្ងៃឃោសនាបោះឆ្នោតនោះទេ។ ដូច្នោះគ្រប់គណបក្សទាំងអស់ គឺមានលទ្ធភាព សុំការអនុញ្ញាត ដើម្បីលើកស្លាកក្នុងមូលដ្ឋាន ព្រោះមិនមែនមានតែបក្សកាន់អំណាចមួយ ដែលមានសិទ្ធលើកស្លាកនោះទេ បក្សដ៏ទៃទៀតក៏អាចមានសិទ្ធដែរ។ ហេតុដូចនេះ សម្តេចតេជោ បានដាក់ចេញនូវបទបញ្ជាឱ្យអាជ្ញាធរគ្រប់ជាន់ថ្នាក់ បង្កលក្ខណៈ ឱ្យបណ្ដាបក្សនយោបាយ ដែលចុះបញ្ជីទទួលស្គាល់ដោយក្រសួងមហាផ្ទៃ មានសេរីភាពក្នុងការធ្វើសកម្មភាព ខណៈដែលការ បោះឆ្នោតនឹងត្រូវប្រព្រឹត្តទៅនៅក្នុងខែមិថុនា ហើយនៅខែមីនា គ្រប់គណបក្សទាំងអស់នឹងត្រូវរៀបចំដាក់សមាសភាព ក្រុមប្រឹក្សា ឃុំសង្កាត់ ដើម្បីប្រកួតប្រជែងក្នុងការបោះឆ្នោតនៅពេលខាងមុខ។
« ខ្ញុំសូមអំពាវនាវឱ្យអាជ្ញាធរគ្រប់លំដាប់ថ្នាក់ បង្កលក្ខណៈសម្បត្តិឱ្យបណ្ដាបក្សនយោបាយ ដែលនឹងត្រូវ ចូលរួមការ បោះឆ្នោតនៅពេលខាងមុខនេះ ទទួលបាននូវឱកាសសម្រាប់ការជួបជុំការ ចុះទៅជួបប្រជាជន ដែលជាសមាជិកសមាជិកា របស់ពួកគេ ដោយគ្មានការរំខានណាមួយពីមូលដ្ឋាន ហើយយើងត្រូវខិតខំជួយការពារសុវត្ថិភាព នៃបណ្ដាបក្សនយោបាយនេះ ឱ្យបាន ដើម្បីកុំឱ្យមានការបោះឆ្នោតណាមួយញាំញីដោយអំពើហិង្សា ជម្លោះរហូតទៅដល់មានមនុស្សរងគ្រោះថ្នាក់ ដែលបណ្តាល មកពីការបោះឆ្នោតនេះ។ ហើយក្នុងរយៈពេលចុងក្រោយនេះ យើងគ្មានមនុស្សស្លាប់និងរងបួសដោយសារការបោះឆ្នោតនោះទេ។ ខណៈនៅក្នុងចំណោមអ៊ុនតាក់ ហើយក្រោយមកក៏នៅមាន ប៉ុន្តែក្រោយមកតាំង២០០៣មក ដូចជាមិនមានអ្នកស្លាប់ និងរបួស ដោយសារការបោះឆ្នោតនោះទេ៕»
