ភ្នំពេញ៖ អ្នកសារព័ត៌មាន និងមន្ត្រីព័ត៌មានចំនួនចំនួន២១៥នាក់ ត្រូវបានអនុញ្ញាតឱ្យចូលយកព័ត៌មានក្នុងកិច្ចប្រជុំចង្អៀតរដ្ឋមន្ត្រីការបរទេសអាស៊ានដែលកម្ពុជាធ្វើជាម្ចាស់ផ្ទះ ចាប់ពីថ្ងៃទី១៦ ដល់១៧ ខែកុម្ភៈ ឆ្នាំ ២០២២ដើម្បីផ្តិតយករូបភាព និងខ្លឹមសារផ្សព្វផ្សាយទៅកាន់សាធារណជន។
ថ្លែងប្រាប់អ្នកសារព័ត៌មាន នៅព្រឹកថ្ងៃទី១៦ ខែកុម្ភៈនៅមណ្ឌលព័ត៌មាន ស្ថិតនៅសណ្ឋាគារសូហ្វីតែលភ្នំពេញ ឯកឧត្តម ផុស សុវណ្ណ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានព័ត៌មាន និងសោតទស្សន៍ ក្រសួងព័ត៌មាន និងជាសមាជិក អនុគណៈកម្មការព័ត៌មាន និងផ្សព្វផ្សាយនៃកិច្ចប្រជុំចង្អៀតរដ្ឋមន្ត្រីការបរទេសអាស៊ាន (អនុគណៈកម្មការទី៥) បានមាន ប្រសាសន៍ថា ក្រុមការងារបាន បើកទូលាយសម្រាប់អ្នកសារព័ត៌មាន ចុះឈ្មោះចូលរួមតាមប្រព័ន្ធ អនឡាញ គ្រាន់តែកំណត់ពេលវេលា ដោយបើកឱ្យចុះឈ្មោះចាប់ពីថ្ងៃទី០៧ កុម្ភៈហើយថ្ងៃទី១៤កម្ភៈ យើងបិទ ជាលទ្ធផលក្រុមការងារ បានអនុញ្ញាតឱ្យអ្នកសារព័ត៌មាន និងមន្រ្តីក្រសួងព័ត៌មានមកពីអគ្គនាយករដ្ឋានវិទ្យុជាតិកម្ពុជា AKP ទទក និងមន្ត្រីអគ្គនាយកដ្ឋានព័ត៌មាន និងសោតទស្សន៍ សរុបចំនួន២១៥នាក់។
ឯកឧត្តមបន្តថា រហូតមកពេលនេះ ក៏មានអ្នកបន្តចុះឈ្មោះដើម្បីយកព័ត៌មាននេះទៀតដែរ ក្រុមការងារ និងធ្វើការពិចារណា តើអ្នកណាខ្លះទៀតដែលត្រូវអនុញ្ញាត ព្រោះពេលវេលាដែលយើងបានកំណត់ឱ្យចុះឈ្មោះបានហួសទៅហើយ។
ឯកឧត្តម បានចាត់ទុក អ្នកសារព័ត៌មាន គឺបានដើរតួនាទីសំខាន់ ក្នុងការផ្សព្វផ្សាយស្តីពីកិច្ចប្រជុំចង្អៀតរដ្ឋមន្ត្រីការបរទេសអាស៊ានចាប់ពីថ្ងៃទី១៦ ដល់១៧ ខែកុម្ភៈ ឆ្នាំ ២០២២ ដែលកម្ពុជាធ្វើជាម្ចាស់ផ្ទះ។
«ខ្ញុំគិតថា ការងារនេះជាការងារចាំបាច់ អ៊ីចឹងហើយបានយើងខ្ញុំរៀបចំឱ្យមានទម្រង់បែបនេះ ។ យើងមិនកំហិតអ្នកសារព័ត៌មានទេ យើងចង់បានអ្នកសារព័ត៌មានច្រើន ដើម្បីផ្សព្វផ្សាយ។
អ៊ីចឹងការងារជោគជ័យបាននេះអាស្រ័យលើព័ត៌មានយើងជួយផ្សព្វផ្សាយ បើអ្នកសារព័ត៌មានយើងអត់ជួយផ្សព្វផ្សាយយើងប្រជាពលរដ្ឋមិនបានដឹងទេ» អ៊ីចឹងមានតែតួនាទីរបស់អ្នកសារព័ត៌មានយើងទេ សំខាន់ណាស់”។
សូមបញ្ជាក់ថា ប្រទេសកម្ពុជាធ្វើជាម្ចាស់ផ្ទះកិច្ចប្រជុំចង្អៀតរដ្ឋមន្ត្រីការបរទេសអាស៊ានចាប់ពីថ្ងៃទី១៦ ដល់១៧ ខែកុម្ភៈ ឆ្នាំ ២០២២ តាមទម្រង់ចូលរួមផ្ទាល់ និងតាមប្រព័ន្ធវីដេអូ នៅសណ្ឋាគារ សូហ្វីតែលភ្នំពេញ។
យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិបានឱ្យដឹងថា ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការ អន្តរជាតិ នឹងអញ្ជើញដឹកនាំកិច្ចប្រជុំចង្អៀតថ្នាក់រដ្ឋមន្ត្រីនេះ។
កិច្ចប្រជុំចង្អៀតរដ្ឋមន្ត្រីការបរទេសអាស៊ាន នឹងពិនិត្យមើលឡើងវិញនូវការសម្រេចនានារបស់ថ្នាក់ដឹកនាំនៅក្នុងកិច្ចប្រជុំកំពូលអាស៊ានលើកទី៣៨ និងលើកទី៣៩ធ្វើការផ្លាស់ប្ដូរទស្សនៈគ្នាលើមធ្យោបាយដើម្បីពង្រឹងបន្ថែមទៀតទំនាក់ទំនងខាងក្រៅជាមួយដៃគូសន្ទនានានា ខណៈ ពេលថែរក្សា និងលើកកម្ពស់មជ្ឈភាព សាមគ្គីភាព និងឯកភាពអាស៊ាន ព្រមទាំងពិភាក្សាគ្នាអំពីរបៀប និងវិធីសាស្ដ្រដើម្បីកៀរគរកិច្ចខិតខំប្រឹងប្រែងរួមគ្នាក្នុងការកសាងសហគមន៍អាស៊ានមួយដែលកាន់តែធន់រឹងមាំឡើង ប្រកបដោយថាមពល ពោរពេញដោយសន្តិភាព និងវិបុលភាព៕
