ខេត្តព្រៃវែង៖នាថ្ងៃ អង្គារ ១៤កើត ខែមាឃ ឆ្នាំឆ្លូវ ត្រីសក័ ពុទ្ធសរាជ ២៥៦៥ ត្រូវនឹងថ្ងៃទី១៥ ខែកុម្ភៈ ឆ្នាំ២០២២
សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ជាផ្លូវការអគារសាលាបឋមសិក្សានាគរង្ស៊ី ចំនួន០១ ខ្នង ស្មើនឹង០៦បន្ទប់ និងអគារសាលាបឋមសិក្សាពងពស់ចំនួន ០១ខ្នង ស្មើនឹង ០៥បន្ទប់ ស្ថិតនៅឃុំរោងដំរី ស្រុកបាភ្នំ ខេត្តព្រៃវែង។
ក្រោយអំពីបានស្តាប់របាយការណ៍លោកអភិបាលស្រុករួចមក សម្ដេចក្រឡាហោម ស ខេង ឧបនាយករដ្ឋមន្ត្រី បានគូសបញ្ជាក់ថាអគារសាលាបឋមសិក្សាថ្មីទាំងពីរ ដែលសម្ពោធនាថ្ងៃនេះ គឺមានគុណតម្លៃខ្ពស់សម្រាប់លើកកម្ពស់ដល់វិស័យអប់រំនៅប្រទេសកម្ពុជា និងដើម្បីបង្កលក្ខណៈងាយស្រួលដល់ក្មួយៗ ចៅៗ ក្នុងសិក្សា រៀនសូត្រ ក្រេបយកចំណេះវិជ្ជា បង្កើនចំណេះដឹង ដើម្បីក្លាយខ្លួនជាសរសទ្រួងនៃប្រទេសជាតិ។
សម្ដេចក្រឡាហោម បានប្រសាសន៍លើកឡើងថា ប្រភពនៃចំនេះដឹង គឺកើតចេញពីការខិតខំប្រឹងប្រែងរបស់ ក្មួយៗចៅៗ ក្នុងការខិតខំសិក្សារៀនសូត្រក្រេបយកចំណេះដឹង គឺដើម្បីអភិវឌ្ឍន៍ខ្លួន ឲ្យក្លាយជាធនធានដ៏សំខាន់សម្រាប់ប្រទេសជាតិ។ ពិតណាស់ ការខិតខំប្រឹងប្រែង តែងតែទទួលបានជោគជ័យ ហើយគ្មានជោគជ័យណា កើតចេញពីការមិនខិតខំប្រឹងប្រែងនោះទេ ។ ដូច្នេះ ក្មួយៗ ចៅៗ សិស្សានុសិស្ស ត្រូវតែខិតខំប្រឹងប្រែង សិក្សារៀនសូត្រឲ្យបានពូកែ ដើម្បីក្លាយខ្លួនទៅជាកូនល្អ សិស្សល្អ នឹងជួយអភិវឌ្ឍប្រទេសជាតិយើងឲ្យកាន់តែរីកចម្រើនទៅមុខជាលំដាប់។
សម្តេចក្រឡាហោម បានផ្តាំផ្ញើដល់ ក្មួយៗ ចៅៗ ជាសិស្សានុសិស្សត្រូវចៀសឲ្យឆ្ងាយពីគ្រឿងញៀន ដែលជាឃាតករលាក់មុខយ៉ាងសាហាវ ដែលធ្វើឲ្យអ្នកដែលបានប្រើប្រាស់ ក្លាយជាមនុស្សមួយផ្សេងៗទៀត ធ្វើឲ្យបាត់បងសតិអារម្មណ៍ ហា៊នធ្វើអ្វីៗទាំងអស់ មួយវិញទៀតវាធ្វើឲ្យប៉ះពាល់ដល់កត្តិយសក្រុមគ្រួសារ និងសង្គមជាតិទាំងមូល។
សម្ដេចក្រឡាហោមក៏បានផ្ដាំផ្ញើដល់បងប្អូនប្រជាពលរដ្ឋទាំងអស់ត្រូវបន្តយកចិត្តទុកដាក់ អនុវត្តនូវវិធានការនាៗ ដើម្បីបង្កាការពារ និងទប់ស្កាត់ការរីករាលដាលឆ្លងជំងឺ covid-19 នៅក្នុងប្រទេសកម្ពុជាយើង។ សម្ដេច ក៏បានអំពាវនាវដល់បងប្អូនប្រជាពលរដ្ឋទាំងអស់ ត្រូវអញ្ជើញទៅចូលរួមបោះឆ្នោតឃុំសង្កាត់នាពេលខាងមុខឲ្យបានគ្រប់គ្នា។
ជាមួយគ្នានេះដែរ សម្ដេចក្រឡាហោមបានបន្តគូសបញ្ជាក់ជាថ្មីទៀតអំពីគោលនយោបាយភូមិឃុំសង្កាត់មានសុវត្ថិភាពទាំង៧ចំណុច ក្នុងនោះសម្ដេចបានសង្កត់ធ្ងន់អំពីភាពចាំបាច់នៃការរួមកម្លាំងសាមគ្គីគ្នាគាំទ្រការប្រយុទ្ធប្រឆាំងគ្រឿងញៀនខុសច្បាប់ ពិសេសការនាំចូលសារធាតុផ្សុំគីមីមកផលិតកែច្នៃជាគ្រឿងញៀន។
សម្ដេចបានចាត់ទុកបញ្ហាគ្រឿងញៀននេះជារឿងគ្រោះថ្នាក់ធំនាពេលខាងមុខ ប្រសិនបើមិនរួមគ្នាចាត់វិធានការនាពេលនេះនោះទេ៕
