បន្ទាប់ពីទទួលបានព័ត៌មានពីការរកឃើញចំពោះអ្នកបើកបរយានយន្ដដែលមានផ្ទុកសារធាតុញៀននោះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្ដីក្រសួងមហាផ្ទៃបានលើកឡើងថា អ្នកបើកបរល្មើសច្បាប់គឺមានមិនតិចទេពាក់ព័ន្ធនឹងការប្រើប្រាស់គ្រឿងញៀន ដែលបញ្ហានេះ សមត្ថកិច្ច និងស្ថាប័នពាក់ព័ន្ធត្រូវតែមានវិធានការត្រួតពិនិត្យលើអ្នកបើកបរទាំងអស់នោះ។
ថ្លែងក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០២១ និងលើកទិសដៅការងារឆ្នាំ២០២២ នាព្រឹកថ្ងៃទី០៩ ខែកុម្ភៈ ឆ្នាំ២០២២នៅទីស្តីការក្រ សួងសាធារណការ និងដឹកជញ្ជូន សម្តេចក្រឡាហោម ស ខេង បានណែនាំឱ្យមានវិធានការ ចំពោះអ្នកបើកបរល្មើសច្បាប់ពីព្រោះថាមានអ្នកបើកបរមិនតិចនោះទេបានប៉ះពាល់នឹងគ្រឿងញៀន។
សម្តេចក្រឡាហោមបញ្ជាក់យ៉ាងដូច្នេះថា “អ្នកបើកបរដឹកទំនិញធំៗ និងក្រុមហ៊ុន ខ្ញុំជឿថា និងសូមឱ្យឯកឧត្តម ឧត្តមសេនីយ៍ អគ្គស្នងការនគបាលជាតិ បន្តដើម្បីឆែកមើលបន្តទៀត ក្នុងនោះភាគច្រើនគឺគ្រឿងញៀនតែម្តងគឺពាក់ព័ន្ធនឹងគ្រឿងញៀន។ អីចឹងហើយសូមឱ្យក្រុមហ៊ុន វិស័យឯកជនទាំងអស់ ឬស្ថាប័នពាក់ព័ន្ធសហការជាមួយអាជ្ញាធរជាតិប្រយុទ្ធប្រឆាំងគ្រឿងញៀន និងពិសេសនោះគឺអគ្គស្នងការដ្ឋាននគបាលជាតិ ដើម្បីធ្វើការពិនិត្យអ្នកបើកបរទាំងអស់”។
សម្តេចក្រឡាហោមបានថ្លែងបញ្ជាក់ថា “អ្នកបើកបរទាំងអស់ហ្នឹងខ្ញុំថាមិនតិចទេដែលពាក់ព័ន្ធនឹងគ្រឿងញៀន។ ដូច្នេះយើងត្រូវរៀបចំបែបបទនីតិវិធីដើម្បីធ្វើការត្រួតពិនិត្យបែបណា ដោយមានកិច្ចសហការរវាងសមត្ថកិច្ច ជាមួយវិស័យឯកជន ពិសេសក្រុមហ៊ុនដឹកជញ្ជូន។ រួចហើយយើងត្រូវរកវិធីដោះស្រាយ ដែលនេះជាបញ្ហាដែលខ្ញុំស្នើសុំឱ្យមានការយកចិត្តទុកដាក់។”
ជាមួយគ្នានេះដែរ សម្ដេចក្រឡាហោមក៏បានស្នើឱ្យបន្តបំពាក់ភ្លើងសញ្ញា ស្លាកសញ្ញា ចរាចរណ៍នៅតាមដងផ្លូវឱ្យបានគ្រប់គ្រាន់ដើម្បីធនាឱ្យការធ្វើចរាចរណ៍ប្រកបដោយសុវត្ថិភាព ក្នុងនោះត្រូវបន្តបំពាក់កាមេរ៉ាចល័តនៅតាមដងផ្លូវជាតិនានាតាមការបញ្ចូលគម្រោងបំពាក់កាមេរ៉ានៅក្នុងគម្រោងកសាង ឬជួសជុលផ្លូវ។
យោងតាមរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោកបានឱ្យដឹងថា ប្រតិបត្តិការត្រួតពិនិត្យការអនុវត្តច្បាប់ចរាចរណ៍ផ្លូវគោក ប្រចាំឆ្នាំ២០២១ គឺទទួលលទ្ធផល គឺត្រួតពិនិត្យយានយន្តសរុប ចំនួន ២ ១១២ ៦៧០គ្រឿង ក្នុងនោះ ម៉ូតូចំនួន ៦៤ភាគរយ។ រកឃើញយានយន្តល្មើស និងពិន័យចំនួន ២២៣ ៨៧៩ គ្រឿង (២២៤ ៤២២ករណី) ស្មើ១១ភាគរយ ក្នុងនោះ ម៉ូតូចំនួន ១៦៨ ៩៥៦ គ្រឿង (១៦៨ ៩៥៧ករណី) ស្មើ៧៥ភាគរយ និងរថយន្ត ចំនួន ៥៤ ៩២៣ គ្រឿង (៥៥ ៤៦៥ករណី) រថយន្តចំនួន២៥ភាគរយ។ ចំពោះការពិន័យចំពោះបទល្មើសចរាចរណ៍ឆ្នាំ២០២១ គឺបានចំនួន ១៩ ៩១១ ៨៩៥ ០០០ រៀល៕
