ខេត្តត្បូងឃ្មុំ៖ព្រឹកថ្ងៃពុធ ៨កើត ខែមាឃ ឆ្នាំឆ្លូវ ត្រីសក័ ពុទ្ធសរាជ ២៥៦៥ ត្រូវនឹងថ្ងៃទី០៩ ខែកុម្ភៈ ឆ្នាំ ២០២២
នេះ ឯកឧត្តម ឈួន ចាន់ថន អនុប្រធានលេខាធិការជាតិប្រឆាំងភេរវកម្ម (លគជបភ) និងឯកឧត្តម ពាង ណារិទ្ធ អភិបាលរងខេត្តតំណាងឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ បានអញ្ជើញជាអធិបតីភាពក្នុងអង្គសិក្ខាសាលាផ្សព្វផ្សាយ អំពីសៀវភៅផែនការជាតិប្រឆាំងភេរវកម្ម ស្ថិតនៅសាលប្រជុំ គ សាលាខេត្តត្បូងឃ្មុំ ។
ក្នុងនោះក៏មានការអញ្ជើញចូលរួម ពីសំណាក់ ឯកឧត្តមប្រតិភូអមដំណើរ ប្រធាន-អនុប្រធានមន្ទីរជុំវិញខេត្ត នាយក-នាយករងទីចាត់ការសាលាខេត្ត អង្គភាពមានសមត្ថកិច្ចទាំង៣ប្រភេទ និងអ្នកពាក់ព័ន្ធ។
មានប្រសាសន៍នាឪកាសនោះ ឯកឧត្តម ឈួន ចាន់ថន បានលើកឡើងថា សិក្ខាសាលាដែលរៀបចំឡើងនាថ្ងៃនេះ ដើម្បីផ្សព្វផ្សាយបញ្ជ្រាបការយល់ដឹងដល់មន្ត្រីជំនាញ អាជ្ញាធរ និងសមត្ថកិច្ចជំនាញ ឲ្យកាន់តែច្បាស់ និងស៊ីជម្រៅទៅលើពួកភេរវករ ដែលប្រព្រឹត្តភេរវកម្មតាមគ្រប់រូបភាព ដើម្បីឲ្យកម្លាំងយើងក្តាប់សភាពការ សហការគ្នាគ្រប់គ្រងស្ថានការណ៍ និងដោះស្រាយឲ្យបានទាន់ពេលវរលា។
អនុប្រធាន លគជបភ បានបញ្ជាក់ឲ្យដឹងថា អំពើភេរវកម្ម កើតឡើងដោយបញ្ហាជម្លោះនយោបាយក្នុងនិងក្រៅប្រទេស ជនជាតិ និងសាសនាដែលជ្រុលនិយម។ ក្នុងនោះវិធីវាយប្រហារមានច្រើនរូបភាពដូចជា ការធ្វើឃាត ការចាប់ជំរិត ការចាប់ជាចំណាប់ខ្មាំង ការប្រើប្រាស់រថយន្តអត្តឃាត ការដាក់គ្រាប់បែកបំផ្ទុះក្នុងរថយន្តតូច រថយន្តដឹកទំនិញ ទូក និងយន្តហោះ ដោយមនុស្សផ្ទាល់ និងដោយឧបករណ៍ទូរបញ្ជាពីចម្ងាយ ការធ្វើឃាតដោយអត្តឃាតមនុស្ស និងការវាយប្រហារដោយមីស៊ីល។ ក្រុមអាល់កៃដា និងក្រុមជាសមាជិក បានរៀបចំហ្វឹកហ្វឺន និងត្រូវបានគេចាត់ទុកថាជាក្រុមធំមួយ ដែលមានវិធីសាស្ត្រនៃអំពើភេរវកម្មជាច្រើនប្រភេទ។
ឯកឧត្តម ឈួន ចាន់ថន គូសបញ្ជាក់ទៀតថា បើទោះបីកម្ពុជាមិនទាន់មានអពើភេរវកម្មណាមួយដូចប្រទេសមួយចំនួននៅលើពិភពលោកក៏ដោយក្តី តែយើងបានត្រៀមខ្លួនទុកជាមុនក្នុងករណីណាមួយដែលអាចកើតឡើង។
ក្នុងនោះក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធាន លគជបភ ក៏ដូចជាឯកឧត្តមបណ្ឌិត ហ៊ុន ម៉ាណែត អនុប្រធាន បានយកចិត្តទុកដាក់ខ្ពស់ក្នុងការងារនេះ លើការងារផ្គត់ផ្គង់ថវិកា សម្ភារៈ និងបង្វឹកកងកម្លាំងពិសេសយ៉ាងស្ទាត់ជំនាញ ដោយបានបញ្ជូនទៅហ្វឹកហាត់នៅបរទេសថែមទៀតផងដែរ។
ជាមួយគ្នានោះដែរ ឯកឧត្តម ពាង ណារិទ្ធ អភិបាលរង នៃគណៈអភិបាលខេត្តត្បូងឃ្មុំ បានថ្លែងអំណរគុណយ៉ាងជ្រាលជ្រៅដល់ លេខាធិការជាតិប្រឆាំងភេរវកម្ម ដែលបានបញ្ជ្រាបចំណេះដឹងថ្មីបន្ថែមពាក់ព័ន្ធបញ្ហានេះ ក៏ដូចជាបានអំពាវនាវដល់សិក្ខកាចូលរួមទាំងអស់ បន្តអនុវត្តន៍វិធានការ៣កុំ ៣ការពារ ដើម្បីការពារខ្លួនពីជំងឺកូវីដ១៩ ពិសេសវីរុសបំប្លែងថ្មី អូមីក្រុង ដែលកំពុងឆ្លងរាលដាលជុំវិញពិភពលោក៕
