គណៈកម្មាធិការជាតិសម្រាប់ការបង្ការ និងគ្រប់គ្រងជំងឺកូវីដ-១៩ របស់ប្រទេសឡាវ បានជំរុញឱ្យប្រជាពលរដ្ឋនាំកូនៗ និងសាច់ញាតិទៅកាន់មណ្ឌលសុខភាពដើម្បីចាក់វ៉ាក់សាំងការពារជំងឺកូវីដ-១៩ ឱ្យបានឆាប់តាមដែលអាចធ្វើទៅបាន ដើម្បីកាត់បន្ថយស្ថានភាពជំងឺធ្ងន់ធ្ងរ និងការស្លាប់ដោយសារជំងឺនេះ។
យោងតាមគណៈកម្មាធិការនេះបានឱ្យដឹងថា រដ្ឋាភិបាលឡាវបានលុបចោលវិធានការរឹតបន្តឹងដើម្បីបង្កើតលក្ខខណ្ឌអំណោយផលសម្រាប់ជីវភាពរស់នៅរបស់ប្រជាជន និងជួយស្តារសេដ្ឋកិច្ចរបស់ប្រទេសឡើងវិញ។
ទោះជាយ៉ាងណាក៏ដោយ ការលុបចោលនេះក៏បង្កហានិភ័យធ្ងន់ធ្ងរនៃការផ្ទុះជំងឺនេះឡើងវិញផងដែរ ប្រសិនបើប្រជាជនមិនបានទទួលការចាក់វ៉ាក់សាំង និងមិនបានការពារខ្លួន។
គណៈកម្មាធិការនេះបាននិយាយថា បើទោះបីជាចំនួនករណីឆ្លងថ្មីនៃជំងឺកូវីដ-១៩ នៅក្នុងប្រទេសឡាវមានការថយចុះក្នុងប៉ុន្មានសប្តាហ៍ថ្មីៗនេះក៏ដោយ ក៏អត្រានៃអ្នកធ្វើតេស្តវិជ្ជមានសម្រាប់ជំងឺកូវីដ-១៩ នៅតែមានកម្រិតខ្ពស់ដដែលបើប្រៀបធៀបទៅនឹងចំនួនសំណាកដែលបានធ្វើតេស្ត។
គិតត្រឹមថ្ងៃទី៤ ខែកុម្ភៈ ប្រមាណ ៦១,៤ភាគរយនៃកុមារដែលមានអាយុចន្លោះពី ១២ឆ្នាំដល់ ១៧ឆ្នាំនៅក្នុងប្រទេសឡាវបានទទួលការចាក់វ៉ាក់សាំងការពារជំងឺកូវីដ-១៩ ដូសទីមួយ ហើយ ៤០,២ភាគរយបានទទួលការចាក់វ៉ាក់សាំងពេញលេញគ្រប់ពីរដូស។
ក្រសួងសុខាភិបាលឡាវបានរាយការណ៍ថា ករណីឆ្លងសរុបនៅទូទាំងប្រទេសបានឡើងដល់ចំនួន ១៣៦ ៧២០នាក់ និងករណីស្លាប់សរុបចំនួន ៥៧៤នាក់៕
