កាលពីថ្ងៃទី២ ខែកុម្ភៈ គណៈកម្មាធិការជាតិសម្រាប់ការបង្ការ និងគ្រប់គ្រងជំងឺកូវីដ-១៩ របស់ប្រទេសឡាវបានប្រកាសថា ប្រទេសនេះបានទទួលវ៉ាក់សាំងការពារជំងឺកូវីដ-១៩ ជាង ១៨លានដូសហើយ ដែលគ្រប់គ្រាន់សម្រាប់ការចាក់វ៉ាក់សាំងដល់ប្រជាជនជាង ៧លាននាក់របស់ប្រទេសនេះ។
អាជ្ញាធរឡាវជឿជាក់ថា ការអនុវត្តយ៉ាងរហ័សនៃយុទ្ធនាការចាក់វ៉ាក់សាំងនេះ នឹងជួយដលើប្រទេសឡាវឱ្យសម្រេចបាននូវគោលដៅរបស់ខ្លួនក្នុងការចាក់វ៉ាក់សាំងឱ្យបាន ៨០ភាគរយនៃចំនួនប្រជាជន និងដើម្បីបើកព្រំដែនរបស់ខ្លួនឡើងវិញ ព្រមទាំងដាក់ចេញនូវយុទ្ធសាស្ត្រទេសចរណ៍ដែលសម្រួលដល់ការស្តារសេដ្ឋកិច្ចជាតិ។
គិតត្រឹមថ្ងៃទី២ ខែកុម្ភៈ ប្រជាជនឡាវជាង ៤,១លាននាក់ ដែលស្មើនឹង ៥៦,០៧ភាគរយនៃចំនួនប្រជាជនរបស់ខ្លួនបានទទួលការចាក់វ៉ាក់សាំងការពារជំងឺកូវីដ-១៩ ចំនួនពីរដូស។
នៅក្នុងសប្តាហ៍នេះ សាលារៀនជាច្រើនបានបើកដំណើរការឡើងវិញសម្រាប់សិស្សឆ្នាំចុងក្រោយ ស្របតាមនីតិវិធីដែលត្រូវបានអនុម័តដោយគណៈកម្មាធិការជាតិសម្រាប់ការបង្ការ និងគ្រប់គ្រងជំងឺកូវីដ-១៩។
ក្រសួងសុខាភិបាលឡាវបានប្រកាសកាលពីថ្ងៃទី៣ ខែកុម្ភៈថា ប្រទេសនេះបានកត់ត្រាករណីឆ្លងថ្មីនៃជំងឺកូវីដ-១៩ ចំនួន ៤០០នាក់ និងមានអ្នកស្លាប់ចំនួន ៥នាក់ក្នុងរយៈពេល ២៤ម៉ោងចុងក្រោយ ដែលនាំឱ្យចំនួនសរុបនៅទូទាំងប្រទេសកើនដល់ ១៣៣ ៣០១នាក់ ជាមួយនឹងអ្នកស្លាប់សរុបចំនួន ៥៥៨នាក់៕
