ភ្នំពេញ ៖ អាជ្ញាធរខេត្តស្វាយ រៀង បានអះអាងថា ខេត្តស្វាយរៀងបញ្ឈប់ការបន្ទោបង់គ្មានរបៀបត្រឹមដំណាច់ឆ្នាំ២០២១ ដោយសារការប្ដេជ្ញារបស់អាជ្ញាធរខេត្ត និងអាជ្ញាធរមូលដ្ឋានបញ្ជ្រាបការយល់ដឹងដល់ប្រជាពលរដ្ឋ ដែលជោគជ័យនេះមានការឧបត្ថម្ភពីអង្គការដៃគូផងដែរ។
អ្នកយកព័ត៌មានយើងធ្វើសេចក្តីរាយការណ៍បន្ថែម ថ្លែងក្នុងសន្និសីទសារព័ត៌មាន ស្តីពី វឌ្ឍនភាពមូលដ្ឋានឃុំ សង្កាត់និងទិសដៅការងារបន្តរបស់រដ្ឋបាលខេត្តស្វាយរៀង នៅព្រឹកថ្ងៃទី០៣ ខែកុម្ភៈ នាទីស្តីការគណៈរដ្ឋមន្រ្តី លោក រស់ ផារិទ្ធ អភិបាលរងខេត្តស្វាយរៀងបានមានប្រសាសន៍ថា ខេត្តស្វាយរៀងបានទទួលជោគជ័យជាខេត្តដំបូងគេបង្អស់ដែលបញ្ឈប់ការបន្ទោបង់ពាសវាលពាសកាល ខណៈប្រជាពលរដ្ឋបានផ្លាស់ប្តូរទម្លាប់ពីការកាន់ចបចូលក្នុងព្រៃ បត់ដៃបត់ជើង ផ្តេសផ្តាស មកយល់ដឹងពីសុខភាព អនាម័យ ដោយបន្ទោបង់នៅ បង្គន់អនាម័យត្រឹមត្រូវវិញ។
លោកបានបញ្ជាក់ថា ការទទួលបានជោគជ័យនេះកើតឡើងដោយសារ ការប្តេជ្ញាពីអាជ្ញាធរគ្រប់លំដាប់ថ្នាក់ ព្រមទាំងអង្គការដៃគូចូលរួមគាំទ្រ ធ្វើការចុះពន្យល់ពលរដ្ឋឱ្យយល់ពីអនាម័យជនបទ ពិសេសគឺការចូលរួមពីសំណាក់ប្រជាពលរដ្ឋខ្លួនផងដែរ។
លោក អភិបាលរងខេត្តស្វាយរៀង បានបន្តថា ការបញ្ឈប់ការបន្ទោបង់ពាសវាលពាសកាល ដោយសារការធ្វើបង្គន់គ្រប់ខ្នងផ្ទះ និងគ្រប់ក្រុមគ្រួសារ។ ប៉ុន្តែនៅសល់តិចតួច ដោយសារខ្នងផ្ទះមាន២គ្រួសារ ប្រើបង្គន់រួមមួយ ។
លោក អភិបាលរងខេត្តស្វាយរៀង បានបន្តទៀតថា ក្រសួងអភិវឌ្ឍន៍ជនបទក៏ដូចជាមន្ទីរ ក៏មានការប្តេជ្ញាខ្ពស់ផងដែរ ក្នុងការធ្វើយ៉ាងណាឱ្យមួយគ្រួសារមានបង្គន់មួយតែម្តង ។
សំឡេង « ខេត្តស្វាយរៀងជាការមោទនភាព ទទួលបានការសម្រេច១០០ភាគរយនូវការ បញ្ឈប់ការបន្ទោបង់ពាសវាលពាសកាលនេះហើយ។
ក្រសួងអភិវឌ្ឍន៍ជនបទ បានចេញវិញ្ញាបនបត្របញ្ជាក់ជូនហើយបញ្ឈប់ការបន្ទោបង់ពាសវាលពាសកាលត្រឹមដំណាច់ឆ្នាំ២០២១ហ្នឹងឯង។ មិនមានការបន្ទោបង់ពាសវាលពាសកាល ពីដើមទម្លាប់ប្រជាជនតាមព្រៃ តាមប្រឡាយទឹកមិនមែនទេ គឺបញ្ចប់អស់ហើយ »។ ឯកឧត្តម ជុំ ហាត ប្រធានក្រុមប្រឹក្សាខេត្តស្វាយរៀង បានបញ្ជាក់ថា កត្តាដែលនាំឱ្យការធ្វើការបញ្ឈប់បន្ទោបង់ពាសវាលពាសកាលទទួលបានជោគជ័យ ១០០ភាគរយ គឺមានកត្តាសំខាន់ៗចំនួន៥
ទី១.ការសម្របសម្រួល : ដោយមានការសហការល្អប្រសើររបស់ក្រុមការងារអនាម័យជនបទថ្នាក់ខេត្ត ក្រុង ស្រុក ក្នុងការផ្សព្វផ្សាយតាមខ្នងផ្ទះ។
ទី២.ផែនការយុទ្ធសាស្រ្ត : ការធ្វើបច្ចុប្បន្នភាពផែនការជាប្រចាំ និងការលើកទឹកចិត្ត(ថវិកា និងសម្ភារ)ដល់អ្នកអនុវត្តផ្ទាល់ជាមួយប្រជាពលរដ្ឋក្នុងសហគមន៍ ។
ទី៣.ពិនិត្យ និងតាមដាន : ការធ្វើបច្ចុប្បន្នភាពសៀវភៅទិន្នន័យអនាម័យ ការគូសលើផែនទីអនាម័យភូមិ(កំណើនបង្គន់ និងកន្លែងលាងសម្អាតដៃថ្មីៗ) និងការរកដំណោះស្រាយខ្នងផ្ទះដែលគ្មានបង្គន់។
ទី៤.ការផ្តល់សេវាកម្ម : ការជំរុញ និងលើកទឹកចិត្តឱ្យសាងសង់ និងការស្វែងរកការគាំទ្រពីអង្គការដៃគូក្នុងការឧបត្ថម្ភធន ។
ទី៥.ការពង្រឹងសមត្ថភាព : ការពង្រឹងសមត្ថភាពដល់មន្ត្រីថ្នាក់ខេត្ត ក្រុង ស្រុក ឃុំ សង្កាត់ ក្នុងការចុះ ធ្វើការអប់រំ ផ្សព្វផ្សាយ និងការកត់ត្រាសៀវភៅទិន្នន័យអនាម័យ និងការគូសផែនទីអនាម័យភូមិ ៕
