ឯកឧត្ដម ឃួង ស្រេង អភិបាលរាជធានីភ្នំពេញបានស្នើដល់អ្នកវិនិយោគជប៉ុន តាមរយៈសមាគមជប៉ុន-កម្ពុជា មកវិនិយោគលើវិស័យកសិកម្ម និងបន្ថែមលើវិស័យផ្សេងៗទៀត ដែលជប៉ុនបានធ្វើកន្លងមក។ ការស្នើរបស់ឯកឧត្ដមអភិបាលរាជធានីភ្នំពេញនេះ បានធ្វើ ឡើងក្នុងជំនួបពិភាក្សាការងារជាមួយ ឯកឧត្ដម Takahashi Fumiaki ប្រធានសមាគម ជប៉ុន-កម្ពុជា និងជាអតីតឯកអគ្គរាជទូតជប៉ុនប្រចាំកម្ពុជា នារសៀលថ្ងៃទី០៣ ខែកុម្ភៈ ឆ្នាំ២០២២ នៅសាលារាជធានីភ្នំពេញ។
ឯកឧត្ដម ឃួង ស្រេង បានគូសបញ្ជាក់ថា នៅក្នុងប្រទេសកម្ពុជា ក៏ដូចជានៅរាជធានីភ្នំពេញមានសក្ដានុ ពលខ្លាំងលើវិស័យកសិកម្មក្នុងនោះបានសង្កត់ធ្ងន់លើការចិញ្ចឹមត្រី និងការដាំខ្ទឹមបារាំងសម្រាប់នាំចេញទៅទីផ្សារសំខាន់ៗ ក្នុងនោះ ជប៉ុនមានបច្ចេកទេសច្បាស់លាស់ក្នុងការចិញ្ចឹមត្រីនាំចេញ រួមទាំងផលដំណាំផ្សេងៗទៀត។ ដូច្នេះ ជប៉ុនអាចបញ្ជូនអ្នកវិនិយោគមកសិក្សាលើវិស័យកសិកម្មនៅកម្ពុជាប្រកបដោយសក្តានុពល។ ពាក់ព័ន្ធនឹងបញ្ហាសំរាមក្នុងរាជធានីភ្នំពេញ ឯកឧត្ដម ឃួង ស្រេង បានជម្រាបជូនថា បញ្ហានេះ រដ្ឋបាលរាជធានីភ្នំពេញបានដោះស្រាយរួចរាល់ និងបានល្អប្រសើរហើយដោយមានក្រុមហ៊ុនប្រមូលសំរាមចំនួន៣ ដែលកំពុងធ្វើសកម្មភាពប្រមូលសំរាមនៅក្នុងរាជធានីភ្នំពេញបច្ចុប្បន្ន ក្រៅពីរថយន្តប្រមូល និងដឹកជញ្ជូនសំរាមដែលជប៉ុនបានផ្តល់ដល់រាជធានីភ្នំពេញ។ ទន្ទឹមនេះ រដ្ឋបាលរាជធានីភ្នំពេញក៏ត្រូវការជាចាំបាច់រថយន្តពន្លត់អគ្គីភ័យនៅរាជធានីភ្នំពេញ សម្រាប់ជួយសង្គ្រោះប្រជាពលរដ្ឋ ខណៈពេលជួបគ្រោះអគ្គិភ័យពិសេសលើសំណង់អាគារខ្ពស់ៗ។
ឯកឧត្ដម Takahashi Fumiaki បានឱ្យដឹងថា សមាគមជប៉ុន-កម្ពុជា នឹងត្រៀមខ្លួនជួយដល់រាជធានីភ្នំពេញទៅតាមសំណើរបស់ឯកឧត្ដមអភិបាលរាជធានីភ្នំពេញ ក្នុងការរួមចំណែកអភិវឌ្ឍន៍ក្នុងរាជធានីភ្នំពេញ។ ឯកឧត្ដមបានលើកឡើងថា កាលពីឆ្នាំ២០១៩ អ្នកវិនិយោគជប៉ុនប្រមាណ២០០ក្រុមហ៊ុន បានមកទស្សនកិច្ចនៅរាជធានីភ្នំពេញ ហើយនៅខែមេសា ឆ្នាំ២០២២ ក្រោយបុណ្យចូលឆ្នាំខ្មែរខាងមុខ សមគមមានបំណងនាំអ្នកវិនិយោគជប៉ុនមកទស្សនកិច្ចនៅរាជធានីភ្នំពេញជាលើលើកទី២ និងរៀបចំឱ្យមានវេទិកាពិគ្រោះយោបល់ និងពិភាក្សាលើការវិយោគនៅកម្ពុជាផងដែរ។
ជាមួយគ្នានេះដែរ ឯកឧត្ដមក៏បានប្រគល់ប្លង់ដីមួយហិកតាដែលអំណោយរបស់ជនជាតិជប៉ុនម្នាក់ដល់ ឯកឧត្ដម ឃួង ស្រេង អភិបាលរាជធានីភ្នំពេញសម្រាប់ធ្វើជាសួនច្បារសាធារណៈមួយដើម្បីអបអរសាទរខួបលើកទី៣០ឆ្នាំ ដែលជប៉ុនបានបញ្ជូន កងកម្លាំង របស់ខ្លួនមករក្សាសន្តិសុខអន្ដរជាតិនៅកម្ពុជា៕
