លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស នៅរសៀលថ្ងៃទី០១ ខែកុម្ភៈ ឆ្នាំ២០២២នេះ បានចេញសារអំពាវនាវចំនួន ០២ចំណុច ដើម្បីធានានូវនិរន្តរភាពនៃការរស់នៅតាមបែបគន្លងប្រក្រតីភាពថ្មី នៅកម្ពុជា។
តាមរយៈសារជាសម្លេងនេះ លោកជំទាវ បានបញ្ជាក់ថា ៖ “ខ្ញុំសូមអំពាវនាវដ៏ទទូច និងជាថ្មី ដល់បងប្អូនជនរួមជាតិ ទី១ គឺសូមបន្តអនុវត្តវិធានការ០៣ការពារ និង០៣កុំ ឱ្យបានខ្ជាប់ខ្ជួន និងទី២ គឺសូមអញ្ជើញមកទទួលការចាក់វ៉ាក់សាំងបង្ការជំងឺកូវីដ-១៩ ឱ្យបានគ្រប់ៗគ្នា ជាពិសេសនោះគឺការចាក់ដូសជំរុញ (ដូសទី៣) ដើម្បីបង្កើនកងការពារខ្លួនបន្ថែមទៀត ដើម្បីទប់ទល់នូវពពួកវីរុសបំប្លែងថ្មី អូមីក្រុង ដែលបាននិងកំពុងឆ្លងរាលដាលជាប្រចាំថ្ងៃកន្លងមកនេះ”។
ការចេញសារអំពាវនាវនៅថ្ងៃនេះ ដោយលោកជំទាវបានសង្កេតឃើញថា បងប្អូនប្រជាពលរដ្ឋមួយចំនួនធំបានបន្តអនុវត្តវិធានការ០៣ការពារ និង០៣កុំ បានល្អប្រសើរហើយ តែបងប្អូនយើងមួយចំនួនទៀត ហាក់ដូចជាចាប់ផ្តើមមានការធ្វេសប្រហែស និងមិនយកចិត្តទុកដាក់ ហើយអនុវត្តវិធានការនេះមិនបានត្រឹមត្រូវ ខណៈដែលមួយចំនួនទៀតមិនសូវមានការប្រុងប្រយ័ត្នក្នុងការការពារខ្លួន នៅក្នុងបរិបទដែលព្រះរាជាណាចក្រកម្ពុជាយើង បាននិងកំពុងបើកដំណើរការសង្គម និងសេដ្ឋកិច្ចឡើងវិញ។ ហេតុដូច្នេះហើយដើម្បីឱ្យប្រទេសជាតិយើងអាចធានាបាននូវនិរន្តរភាព នៃការរស់នៅជាប្រចាំថ្ងៃជាធម្មតា តាមបែបគន្លងប្រក្រតីភាពថ្មីនេះ គឺដាច់ខាតត្រូវតែមានការចូលរួមអនុវត្តវិធានការនានាឱ្យបានត្រឹមត្រូវ និងជាប់ជាប្រចាំពីសំណាក់បងប្អូនប្រជាពលរដ្ឋទាំងអស់គ្នាបន្ថែមទៀត។
សូមរម្លឹកថា ក្នុងរយៈពេលប្រមាណ៤សប្តាហ៍ចុងក្រោយនេះ ព្រះរាជាណាចក្រកម្ពុជា មានករណីនាំចូល និងឆ្លងនៅក្នុងសហគមន៍ ដែលសុទ្ធសឹងជាពពួកវីរុសបំប្លែងថ្មី អូមីក្រុងទាំងអស់ ប៉ុន្តែក៏ពុំមានករណីស្លាប់ថ្មីនោះទេ ដែលនេះជាដំណឹងដ៏ល្អ ក៏ដូចជាការបង្ហាញឱ្យឃើញយ៉ាងជាក់ច្បាស់នូវប្រសិទ្ធភាពនៃវ៉ាក់សាំងផងដែរ៕
