លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស បានបញ្ជាក់ថា រាល់វ៉ាក់សាំងទាំងអស់ដែលត្រូវបានទទួលស្គាល់ដោយអង្គការសុខភាពពិភពលោក (WHO) សុទ្ធតែមានសមត្ថភាពអាចទប់ទល់នឹងវីរុសកូវីដ-១៩ គ្រប់ប្រភេទទាំងអស់ រួមទាំងពពួកបំប្លែងថ្មីបំផុត អូមីក្រុង (Omicron)។
លោកជំទាវបានបញ្ជាក់ប្រាប់ទីភ្នាក់ងារសារព័ត៌មានកម្ពុជា (AKP) នៅរសៀលថ្ងៃទី៣១ ខែធ្នូ ឆ្នាំ២០២១នេះ តាមរយៈបណ្តាញតេឡេក្រាម ដោយបានសង្កត់ធ្ងន់ថា នេះហើយជាមូលហេតុដែលបងប្អូនប្រជាពលរដ្ឋកម្ពុជាត្រូវតែមកទទួលការចាក់វ៉ាក់សាំងឱ្យបានគ្រប់ៗគ្នា ចំពោះអ្នកដែលមិនទាន់បានចាក់ សូមរួសរាន់ទៅចាក់នៅមន្ទីរពេទ្យជាតិ មណ្ឌលសុខភាព ឬមន្ទីរពេទ្យបង្អែកដែលនៅជិតកន្លែងរស់នៅ ហើយសម្រាប់អ្នកដែលបានចាក់ដូសទី១ហើយ សូមប្រញាប់ទៅចាក់ដូសទី២ ទៅតាមថ្ងៃខែកំណត់។ ដោយឡែកសម្រាប់អ្នកដែលបានចាក់២ដូស ឬដូសមូលដ្ឋានរួច សូមស្វះស្វែងរកការចាក់ដូសទី៣ ឬដូសជំរុញ ដើម្បីបង្កើនអង្គបដិបក្ខការពារខ្លួនបន្ថែមទៀត។
សូមបញ្ជាក់ថា វីរុសបំប្លែងថ្មី អូមីក្រុង មានសមត្ថភាពបំប្លែងខ្លួនច្រើនជាងវីរុសដទៃទៀត ដែលធ្វើឱ្យវាមានលទ្ធភាពឆ្លងលឿនជាងវីរុសកូវីដ-១៩បំប្លែងថ្មីមុនៗ មានដូចជា ដែលតា អាល់ហ្វា ហ្គាមម៉ា ជាដើម តែវ៉ាក់សាំងកូវីដ-១៩ នៅតែជាឧបករណ៍ដ៏មានប្រសិទ្ធភាពក្នុងការការពារគ្រប់បុគ្គលពីការធ្លាក់ខ្លួនឈឺធ្ងន់ ការចូលសម្រាកពេទ្យ និងការស្លាប់។
លោកជំទាវ បានមានប្រសាសន៍បន្ថែមថា ជាមួយនឹងការចាក់វ៉ាក់សាំងគ្រប់ដូសរួច វិធានការ ០៣ការពារ និង០៣កុំ នៅតែជាវិធានការដ៏មានប្រសិទ្ធភាព ដើម្បីទប់ទល់ការចម្លងវីរុសកូវីដ-១៩ រួមនឹងវីរុសបំប្លែងថ្មីអូមីក្រុង ផងដែរ។
ហេតុដូច្នេះ សូមបុគ្គលគ្រប់រូបកុំមានការភ័យស្លន់ស្លោរ និងព្រងើយកន្តើយ ឬធ្វេសប្រហែសនោះទេ តែត្រូវបន្តប្រុងប្រយ័ត្ន និងរៀនរស់ក្នុងគន្លងប្រក្រតីភាពថ្មី ក្នុងបរិបទនៃការប្រយុទ្ធប្រឆាំងនឹងវីរុសកូវីដ-១៩ ដើម្បីទប់ស្កាត់ការផ្ទុះឡើងវិញនូវការឆ្លងរាលដាលវីរុសនេះ ដែលអាចកើតមានឡើងគ្រប់ពេលវេលា ដែលនឹងនាំឱ្យមានគ្រោះថ្នាក់ដល់សហគមន៍ និងនាំឱ្យមានការស្លាប់បន្ថែមទៀត ជាពិសេសលើជនចាស់ជរាដែលមានជំងឺប្រចាំកាយ និងអ្នកដែលមិនបានចាក់វ៉ាក់សាំង៕
