កណ្ដាល៖ យ៉ាងហោចណាស់មានយុវជនយុវជន ៧នាក់បានស្លាប់ និងម្នាក់ទៀតរងរបួសធ្ងន់ ក្នុងគ្រោះថ្នាក់ដែលបង្កឡើងដោយរថយន្តស៊េរីទំនើបមួយគ្រឿងបានបើកបុករះម៉ូតូចំនួន៤ គ្រឿងហើយរថយន្តបង្កមិនទាន់អស់ល្បឿនបានបន្តទៅបុកបង្គោលភ្លើងបណ្ដាលឲ្យឆេះហើយត្រូវបានប្រជាពលរដ្ឋរស់នៅក្បែរនោះជួយពន្លត់ទាន់ពេល។
ចំណែងអ្នកបើកបររថយន្តបង្កនិងអ្នករួមដំណើរក្រោយពីបង្កហេតុរួចបាននាំគ្នាចុះគេចខ្លួនបាត់ស្រមោលបាត់។
ហេតុការណ៍ដ៏រន្ធត់នេះ បានកើតឡើងកាលវេលាម៉ោង ១២ និង៣០នាទីយប់រំលងអាធ្រាត្រ ឈានចូលថ្ងៃអាទិត្យទី ១៩ ខែធ្នូ ឆ្នាំ ២០២១ ស្ថិតតាមបណ្ដោយផ្លូវ ១១០ ក្នុងភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្ដាល។
យោងតាមប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកើតហេតុគេឃើញបុរស ២នាក់ បើករថយន្តមួយគ្រឿងម៉ាក TUNDRA ពណ៌ក្រហម ពាក់ស្លាកលេខភ្នំពេញ 2BM.4386 ធ្វើដំណើរតាមបណ្តោយផ្លូវ ១១០ ក្នុងទិសដៅពីកើតទៅលិច បោះពួយយ៉ាងលឿន។លុះបើកមកដល់ចំណុចកើតហេតុខាងលើ បានជ្រុលទៅបុកម៉ូតូ ៤គ្រឿង ជិះដោយយុវជន ៨នាក់ ពេញទំហឹង បណ្ដាលឲ្យស្លាប់នៅនិងកន្លែង ៥នាក់ភ្លាមៗ និង៣នាក់ទៀតរងរបួសធ្ងន់ ត្រូវបានរថយន្តសង្រ្គោះបន្ទាន់មកដឹកយកទៅកាន់មន្ទីរពេទ្យ។តែជាអកុសលយុវជន២នាក់អ្នកបានដាច់ខ្យល់ស្លាប់នៅតាមផ្លូវនិងម្នាក់ទៀតកំពុងស្ថិតនៅសង្គ្រោះបន្ទាន់នៅមន្ទីរពេទ្យ។
ក្រោយកើតហេតុ សមត្ថកិច្ចជំនាញចរាចរណ៍ នៃស្នងការដ្ឋាននគរបាលខេត្តកណ្ដាល បានចុះទៅវាស់វែងនិងធ្វើកំណត់ហេតុរួចយករថយន្តបង្ក និងម៉ូតូរងគ្រោះទៅរក្សាទុក រង់ចាំធ្វើការស្រាវជ្រាវរកម្ចាស់រថយន្តដើម្បីនាំខ្លួនយកមកដោះស្រាយនិងបន្តតាមនីតិវិធី។
ចំណែក សពទាំង៧នាក់ត្រូវបានសមត្ថកិច្ចទាក់ទងទៅសាច់ញាតិនិងក្រុមគ្រួសារមកទទួលយកទៅចាត់ចែងរៀបចំធ្វើបុណ្យតាមប្រពៃណីរៀងៗខ្លួន៕
