ភ្នំពេញ ÷ថ្ងៃ ពុធ ១៣កើត ខែកត្ដិក ឆ្នាំឆ្លូវ ត្រីសក័ ពុទ្ធសករាជ ២៥៦៥ ត្រូវនឹងថ្ងៃទី១៧ ខែវិច្ឆិកា ឆ្នាំ២០២១
។
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានសម្តែងការអបអរសាទរស្វាគមន៍ ដំណើរមាតុភូមិនិវត្តន៍របស់កងអនុសេនាធំរាជអាវុធហត្ថលេខ១៨៦ ដែលបានវិលត្រឡប់មកដល់មាតុភូមិកម្ពុជាវិញប្រកបដោយសុវត្ថិភាព កាលពីថ្ងៃទី១៦ ខែវិច្ឆិកា ឆ្នាំ២០២១ ក្រោយបញ្ចប់បេសកកម្មមនុស្សធម៌នៅសាធារណរដ្ឋស៊ូដង់ខាងត្បូង
។
សម្តេចពិជ័យសេនា ទៀ បាញ់ បានមានប្រសាសន៍ថា កងអនុសេនាធំរាជអាវុធហត្ថលេខ១៨៦ គឺជាកងទី៩ ដែលមានកម្លាំងសរុប ៧៣នាក់ ក្នុងនោះមាននារីចំនួន ២៨នាក់ បានវិលត្រឡប់មកមាតុភូមិកម្ពុជាវិញ ក្រោយបញ្ចប់បេសកកម្មមនុស្សធម៌រក្សាសន្តិភាពអស់ រយៈពេល១ឆ្នាំប្រកបដោយជោគជ័យ ដូចបណ្តាកងមុនៗ នៅសាធារណរដ្ឋស៊ូដង់ខាងត្បូង។ រីឯ កងដែលត្រូវធ្វើការប្តូរវេន គឺកងអនុសេនាធំរាជអាវុធហត្ថលេខ៧៣៩ ជាកងទី១០ ដែលមានកម្លាំងសរុប៧៣នាក់ (នារី៣៤នាក់)។ អត្រាចូលរួមរបស់នារីក្នុងកងនេះស្មើ៤៦ភាគរយ លើសពីតម្រូវការរបស់ អ.ស.ប. ត្រឹម១៥ភាគរយ។ នេះសបញ្ជាក់ឱ្យឃើញថា កម្លាំងមួកខៀវកម្ពុជា ពិតជាបានធ្វើនវានុវត្តចំណេះជំនាញ ក្នុងបរិបទនៃការរស់នៅថ្មី និងសាមគ្គីភាព សហប្រតិបត្តិការ គោរពវិន័យល្អ និងភាពអង់អាច ក្លាហាន ក្នុងការអនុវត្តតួនាទីរបស់ខ្លួនគ្រប់ពេលវេលា និងគ្រប់ទីកន្លែង នៃតំបន់ដែលខ្លួនបានចូលរួម ពិសេសការអនុវត្តនូវវិធានការ នៃការការពារមេរោគកូវីដ-១៩៕
