ឧត្តម ឃួង ស្រេង អភិបាលរាជធានីភ្នំពេញ បានលើកឡើងថា បើទោះបី ទឹកជំនន់ស្ទឹងព្រែកត្នោតបានស្រក ទៅអស់ពិតមែន ប៉ុន្តែក្នុងនាមអាជ្ញាធរដែលជាម៉ែ ជាឪ របស់បងប្អូនប្រជាពលរដ្ឋ នៅតែតាមមើលថែបងប្អូនប្រជាពលរដ្ឋជានិច្ច មានន័យថា លុះត្រាបងប្អូនប្រជាពលរដ្ឋបានសុខស្រួលជាធម្មតាវិញ ទើបយើងអាចលែង ដៃបាន ។ ការលើកឡើងរបស់ឯកឧត្តមអភិបាលរាជធានីភ្នំពេញនេះ ក្នុងពិធី ចែកអំណោយជូនប្រជាពលរដ្ឋរងគ្រោះដោយ សារជំនន់ទឹកភ្លៀងចំនួន៨៦៩ គ្រួសារ ស្ថិតក្នុងសង្កាត់សាក់សំពៅ ខណ្ឌដង្កោ រាជធានីភ្នំពេញ នៅព្រឹកថ្ងៃទី៣០ ខែតុលា ឆ្នាំ២០២១នេះ
។
ឯកឧត្តម ឃួង ស្រេង បានមានប្រសាសន៍ថា រដូវវស្សាឆ្នាំនេះ ក៏ដូចជាឆ្នាំកន្លងទៅ អាស្រ័យដោយកត្តាការប្រែប្រួលអាកាសធាតុ ដែលជាបញ្ហាប្រឈមជាសកល គួបផ្សំនឹងកត្តាភូមិសាស្ត្រសណ្ឋានដី បានធ្វើឱ្យតំបន់សណ្ដស្ទឹងព្រែកត្នោត ដែលតភ្ជាប់ពីខេត្តកំពង់ស្ពឺ មកកាន់ខេត្តកណ្តាល ដោយត្រូវឆ្លងកាត់រាជធានីភ្នំពេញ បានទទួលរងការគំរាមកំហែងជាថ្មីម្តងទៀតដោយសារជំនន់ទឹកភ្លៀង បណ្តាលមកពី ការហូរជន់ដោយគំហុកនូវបរិមាណទឹកភ្លៀងដ៏ច្រើន ពីតំបន់ភ្នំភាគនិរតី ជាហេតុធ្វើឱ្យបណ្តាខណ្ឌជាយក្រុង ជាពិសេស ខណ្ឌកំបូល និងខណ្ឌដង្កោ ត្រូវលិចលង់ផ្នែកខ្លួះដោយចៀសមិនរួច។ ជាក់ស្តែង កាលពីថ្ងៃទី២៤ ខែតុលា ឆ្នាំ២០២១ ទឹកស្ទឹងព្រែកត្នោតបានហក់ឡើងយ៉ាងខ្លាំង ធ្វើឱ្យមានការហូរ ច្រោះក្បាលហុងទឹក ហៀរហូរជន់លិចលំនៅឋាន និងបង្កឱ្យមានផលប៉ះពាល់ដោយផ្ទាល់ និងដោយប្រយោលដល់បងប្អូន ប្រជាពលរដ្ឋជាច្រើនគ្រួសារក្នុងសង្កាត់គងនយ។ នៅថ្ងៃទី២៥ និងទី២៦ ខែតុលា ឆ្នាំ២០២១ ជំនន់ទឹកភ្លៀងបានបន្ត ហូរជន់លិចភូមិចំនូន ៤ ក្នុងសង្កាត់ទៀន និងភូមិចំនួន ៦ ទៀត នៃសង្កាត់សាក់សំពៅ ខណ្ឌដង្កោ រាជធានីភ្នំពេញ
។
ឯកឧត្តមអភិបាលរាជធានីភ្នំពេញបន្ដថាស្ថិតក្នុងស្ថានភាពមហន្តរាយនេះ កងកម្លាំង ចម្រុះ និងអាជ្ញាធរមូលដ្ឋានគ្រប់លំដាប់ថ្នាក់ មានភាពម្ចាស់ការខ្ពស់ បានសហការរួមគ្នាផ្តល់ការសង្គ្រោះបានទាន់ពេលវេលា ដោយជម្លៀសបងប្អូនប្រជាពលរដ្ឋចេញពីតំបន់រងគ្រោះ ទៅកាន់ទីទូលសុវត្ថិ ភាព ពោលគឺមិនមានប្រជាពលរដ្ឋណាមួយ រងគ្រោះដល់អាយុជីវិតឡើយ។ ជាមួយគ្នានេះ រដ្ឋបាលរាជធានីភ្នំពេញ ក៏ដូចជាអាជ្ញាធរមូលដ្ឋានគ្រប់លំដាប់ថ្នាក់ បាន បង្កើនការយកចិត្តទុកដាក់ ផ្ដល់នូវអំណោយមនុស្សធម៌របស់ សម្តេចតេជោនាយករដ្ឋមន្ត្រី និង សម្តេចកិត្តិព្រឹទ្ធ បណ្ឌិត ជូនដល់បងប្អូនប្រជាពលរដ្ឋរងគ្រោះជាបន្តបន្ទាប់ ដោយគ្មានការរើសអើង ឬ ប្រកាន់បក្សពួកឡើយ
។
ឯកឧត្តមបានបញ្ជាក់ថា ជាក់ស្ដែង ថ្ងៃនេះ សម្តេចតេជោនាយករដ្ឋមន្ត្រី និង សម្តេចកិត្តិព្រឹទ្ធបណ្ឌិត បានបន្តផ្តល់អំណោយមនុស្សធម៌មករដ្ឋបាលរាជធានីភ្នំពេញ សម្រាប់ចែកជូនបងប្អូនប្រជាពលរដ្ឋរងគ្រោះដោយសារជំនន់ទឹកភ្លៀង ចំនួន ៨៦៩ គ្រួសារ ស្ថិតក្នុងភូមិសាក់សំពៅ, ភូមិខិត, ភូមិសំបូរ, ភូមិក្រាំងតាផូ, ភូមិពាម និងភូមិពោធិ៍រលំនៃសង្កាត់សាក់ សំពៅ ខណ្ឌដង្កោ ក្នុងនោះ អំណោយដែលត្រូវផ្តល់ជូនក្នុងមួយគ្រួសារ រួមមាន មី១កេស, ត្រីខ ១ យូរ,ទឹកស៊ីអ៊ីវ ១យូរ និង អង្ករ១បាវ
។
ឯកឧត្តម ឃួង ស្រេង ក៏បានអំពាវនាវឱ្យប្រជាពលរដ្ឋគ្រប់ មជ្ឈដ្ឋាន ជាពិសេសបងប្អូនប្រជាពលរដ្ឋរងគ្រោះទាំងអស់ សូមបន្ត និងបង្កើនការប្រុងប្រយ័ត្នចំពោះបញ្ហាសុខភាព ដោយ ត្រូវអនុវត្តន៍ឪនូវរាល់វិធានការទាំងឡាយ តាមការណែនាំរបស់ក្រសួងសុខាភិបាល និងត្រូវប្រកាន់ខ្ជាប់ជានិច្ចនូវវិធានការ “៣ ការពារ និង ៣ កុំ” របស់ សម្តេចតេជោនាយករដ្ឋមន្ត្រី ដើម្បីចៀសឆ្ងាយផុតពីជំងឺកូវីដ-១៩
។
លោកស្រី គឹម ញឹប អភិបាលខណ្ឌដង្កោ បានឱ្យដឹងថា នៅថ្ងៃទី២៤ ខែតុលា ឆ្នាំ២០២១ ទឹកស្ទឹងព្រែកត្នោតបានហក់ឡើងយ៉ាងខ្លាំង ធ្វើឱ្យមានការហូរ ច្រោះក្បាល ហុងទឹក ហៀរហូរជន់លិចលំនៅឋាន ចំនួន ១០សង្កាត់ស្មើនឹង៣៥ភូមិ ។ ចំណែកនៅក្នុងសង្កាត់សាក់សំពៅនេះ ផ្ទះបងប្អូនប្រជាពលរដ្ឋចំនួន៨៦៩ខ្នង ស្មើនឹងប្រជាពលរដ្ឋ ២ ៣២៧ នាក់ បានទទួលរងនូវការលិចលង់ ហើយត្រូវបាន ឯកឧត្តម ឃួង ស្រេង អភិបាលរាជធានីភ្នំពេញ នាំយកអំណោយមកប្រគល់នៅថ្ងៃនេះ ៕
