សម្ដេចតេជោ ហ៊ុន សែន ស្នើឱ្យរដ្ឋមន្ត្រីក្រសួងកសិកម្ម និងអភិបាលខេត្ត ស្រាវជ្រាវ

ភ្នំពេញ៖ ថ្ងៃ សៅរ៍ ១២កើត ខែភទ្រទប ឆ្នាំឆ្លូវ ត្រីសក័ ពុទ្ធសករាជ ២៥៦៥ ត្រូវនឹងថ្ងៃទី១៨ ខែកញ្ញា ឆ្នា២០២១
។

ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានស្នើឱ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងអភិបាលខេត្តមួយ ស្រាវជ្រាវនិងបំភ្លឺជុំវិញករណីហាមឃាត់ប្រជាជនមិនឱ្យសម្លាប់ពពែយកសាច់ ដែលមានរូបថតវីដេអូឃ្លីបរយៈពេល ១៖ ៤៦នាទី ត្រូវបានផ្សព្វផ្សាយនាព្រឹកថ្ងៃទី១៨ខែកញ្ញាឆ្នាំ២០២១នោះ
។

នៅលើផេកហ្វេសប៊ុកផ្លូវការ នាព្រឹកថ្ងៃទី ១៨ ខែកញ្ញា ឆ្នាំៗ០២១ សម្ដេចតេជោនាយករដ្ឋមន្ត្រីបានសរសេរដោយលើកជាសំណួរថា “តើមន្ត្រីយើងធ្វើដល់ថ្នាក់នេះជាមួយប្រជាជនមែនទេ។ រដ្ឋមន្ត្រីក្រសួងកសិកម្ម និងអភិបាលខេត្តដឹងរឿងនេះឬទេ។ តើរាជរដ្ឋាភិបាលមានដែលហាមឃាត់ប្រជាជនមិនឱ្យសម្លាប់ពពែយកសាច់ជាអាហារពីពេលណាមក ទើបបានជាមន្ត្រីយើងធ្វើមកលើប្រជាជនបែបនេះ”។ សម្ដេចតេជោបនប្តថា យើងលើកទឹកចិត្តឱ្យប្រជាជនចិញ្ចឹមសត្វ មិនមែនទុកសម្រាប់ទុកតាំងពិព័រណ៍ទេ គឺសម្រាប់ជាចំណីអាហារ។ ហេតុអីបានប្រជាជនចិញ្ចឹមសត្វគ្មានសិទ្ធិសម្លាប់សត្វយកសាច់ទទួលទាន ហើយតម្រូវឱ្យសុំច្បាប់។ សម្ដេចតេជោគូសបញ្ជាក់ថា “បើមានក្នុងច្បាប់ គឺត្រូវធ្វើវិសោធនកម្មច្បាប់។ ខ្ញុំមិនដឹងថារូបភាពក្នុងវីដេអូនេះកើតនៅក្នុងខេត្តណាទេ។ សុំរដ្ឋមន្ត្រីក្រសួងកសិកម្ម និងអភិបាលខេត្តស្រាវជ្រាវហើយចូលមកបំភ្លឺឱ្យខ្ញុំតាមហ្វេសបុកនេះ ដើម្បីឱ្យប្រជាជនបានដឹងជាទូទៅ។ ខ្ញុំហួសចិត្តនិងអាណិតប្រជាជនជាទីគោរពស្រលាញ់របស់ខ្ញុំ”
។

គួរបញ្ជាក់ដែរថា ភ្លាមៗបន្ទាប់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាប្រតិកម្មចំពោះវិដេអូឃ្លីប ដែលបង្ហាញពីសកម្មភាពមន្រ្តីជំនាញក្រសួងកសិកម្ម ចុះទៅហាមឃាត់មិនឱ្យប្រជាពលរដ្ឋសម្លាប់ពពែយកសាច់នោះ ឯកឧត្ដម វេង សាខុន រដ្ឋមន្រ្តីក្រសួងកសិកម្មបានបំភ្លឺតបជូនសម្តេចតេជោអំពីករណីនេះថា «ក្នុងនាមក្រសួងកសិកម្ម រុក្ខាប្រមាញ់ និងនេសាទ ខ្ញុំសូមអនុញ្ញាតគោរពជម្រាបជូនសម្តេច តេជោ មេត្តាជ្រាបដ៏ខ្ពង់ខ្ពស់ថា ការចិញ្ចឹមសត្វ និងការសម្លាប់សត្វក្នុងគោលបំណងដើម្បីផ្គត់ផ្គង់ជីវភាពក្នុងគ្រួសារ គឺពុំមានទោសទណ្ឌ និងមានចែងនៅក្នុងច្បាប់ស្តីពីសុខភាពសត្វនិងផលិតកម្មសត្វនោះទេ ហើយក៏គ្មានជាប់ពាក់ព័ន្ធទៅការប្រព្រឹត្តបទល្មើសអ្វីដែរ លើកលែងតែការសម្លាប់សត្វក្នុងគោលបំណងធ្វើអាជីកម្មតែប៉ុណ្ណោះ។ ដោយឡែកទាក់ទងទៅនឹងបញ្ហាខាងលើ ខ្ញុំសង្ឃឹមថា អាជ្ញាធរមូលដ្ឋាន ខេត្តកណ្តាល ដែលបានធ្វើការកិច្ចការនេះផ្ទាល់និងផ្តល់ជូនរបាយការណ៍លម្អិតជូនសម្តេចតេជោ បានជ្រាបដ៏ខ្ពង់ខ្ពស់បន្ថែម។ ដោយក្តីគោរពដ៏ខ្ពង់ខ្ពង់បំផុតពីខ្ញុំបាទ»
។

គួររម្លឹកផងដែរថា ជាមួយនឹងរូបថតវីដេអូឃ្លីបដែលមានរយៈពេល១៖៤៦ នាទីនៅព្រឹកថ្ងៃទី១៨ ខែកញ្ញា ឆ្នាំ២០២១នេះ សម្តេចតេជោ ហ៊ុន សែន បានបញ្ចេញប្រតិកម្ម ចំពោះសកម្មភាពមន្ត្រីជំនាញនៃក្រសួងកសិកម្ម រុក្ខាប្រមាញ់ និង នេសាទដែលចុះទៅហាមឃាត់មិនឱ្យប្រជាពលរដ្ឋសម្លាប់សត្វពពែ។ សម្តេចតេជោក៏បានកំហិតឱ្យរដ្ឋមន្ត្រីក្រសួងកសិកម្ម និង អភិបាលខេត្តនោះ បំភ្លឺជូនសម្តេចតាមហ្វេសប៊ុក ដើម្បីឱ្យប្រជាជនបានដឹងទូទៅវិញ៕