សាលាបឋមសិក្សាជាំក្សាន្ត បានរៀបចំប្រារព្ធពិធីបើកបវេសនកាលឆ្នាំសិក្សាថ្មី ២០២៦-២០២៧ យ៉ាងអធិកអធម និងប្រកបដោយបរិយាកាសរីករាយ ដោយមានការអញ្ជើញចូលរួមជាអធិបតីភាពខ្ពង់ខ្ពស់ពីសំណាក់ លោក ចិន ខន្តី អភិបាល នៃគណៈអភិបាលស្រុកជាំក្សាន្ត។
ពិធីនេះក៏មានការអញ្ជើញចូលរួមយ៉ាងកិត្តិយសពីសំណាក់ លោក លី ម៉េងសាន ប្រធានមន្ទីរអប់រំ យុវជន និងកីឡា ខេត្តកំពង់ចាម ព្រមទាំងសហការីអមដំណើរចំនួន ៤ រូប, លោក ជុំ ថឺង ប្រធានការិយាល័យអប់រំ យុវជន និងកីឡា ស្រុកជាំក្សាន្ត, លោក ឡេង គឹមឈៀង ប្រធានមន្ទីរពេទ្យបង្អែកស្រុកជាំក្សាន្ត, លោក ឈឿម សុមេធា អធិការរង នៃអធិការដ្ឋាននគរបាលស្រុកជាំក្សាន្ត និង លោក ម៉ៅ សុខជា តំណាងអង្គការទស្សនៈពិភពលោកអន្តរជាតិ (World Vision) ប្រចាំស្រុកជាំក្សាន្ត ព្រមទាំងលោក លោកស្រីជាមេភូមិទាំង ៥ ដែលស្ថិតក្នុងតំបន់សេវា នៃសាលាបឋមសិក្សាជាំក្សាន្ត។
អង្គពិធីទាំងមូលមានសមាសភាពចូលរួមសរុបចំនួន ១.១៧៤ នាក់ (ស្រី ៧៩៤ នាក់) រួមមាន៖
• លោកគ្រូ-អ្នកគ្រូ ចំនួន ៣២ នាក់ (ស្រី ២៧ នាក់)
• សិស្សានុសិស្ស ចំនួន ៩៦៩ នាក់ (ស្រី ៦៧៨ នាក់)
• អាណាព្យាបាលសិស្ស ចំនួន ១៤០ នាក់ (ស្រី ៨៩ នាក់)
ដើម្បីគាំទ្រដល់ដំណើរការរៀបចំកម្មវិធីឱ្យប្រព្រឹត្តទៅដោយរលូន អង្គការទស្សនៈពិភពលោកអន្តរជាតិ បានជួយឧបត្ថម្ភការជួលកៅអីចំនួន ១.០០០ កៅអី និងនំបុ័ងចំនួន ២៥០ ដើម គិតជាថវិកាសរុបចំនួន ១.០០០.០០០ រៀល ព្រមទាំងមានការចូលរួមចំណាយថវិកាផ្ទាល់ពីសាលាបឋមសិក្សាជាំក្សាន្តចំនួន ៩៤១.០០០ រៀល បន្ថែមទៀតផងដែរ៕
០២ វិច្ឆិកា ២០២៦
























