ឯកអគ្គរដ្ឋទូតចិនប្រចាំកម្ពុជា និងអភិបាលខេត្តព្រះវិហារ ចុះសួរសុខទុក្ខ និងនាំយកអំណោយចែកជូនប្រជាពលរដ្ឋភៀសសឹកនៅមណ្ឌលសុវត្ថិភាពវត្តបាក់កាំ ស្រុកត្បែងមានជ័យ

ព្រះវិហារ៖ នាព្រឹកថ្ងៃទី០៣ ខែសីហា ឆ្នាំ២០២៦ ឯកឧត្តម Wang Wenbin ឯកអគ្គរដ្ឋទូត នៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា រួមជាមួយឯកឧត្តម គីម រិទ្ធី អភិបាលខេត្តព្រះវិហារ បានអញ្ជើញចុះសួរសុខទុក្ខ និងនាំយកអំណោយមនុស្សធម៌ចែកជូនប្រជាពលរដ្ឋភៀសសឹក ដែលកំពុងស្នាក់នៅបណ្តោះអាសន្នមណ្ឌលសុវត្ថិភាពវត្តពើងអង្កាម «ហៅវត្តបាក់កាំ» ស្ថិតក្នុងភូមិបាក់កាំ ឃុំឈានមុខ ស្រុកត្បែងមានជ័យ ខេត្តព្រះវិហារ។

នៅក្នុងឱកាសនោះ ឯកឧត្តម Wang Wenbin បានសម្តែងនូវការយកចិត្តទុកដាក់ចំពោះសុខទុក្ខប្រជាពលរដ្ឋដែលរងផលប៉ះពាល់ដោយសារស្ថានភាពនៅតំបន់ព្រំដែន និងបានអះអាងថា ប្រទេសចិននឹងបន្តគាំទ្រកម្ពុជា តាមរយៈកិច្ចសហប្រតិបត្តិការលើវិស័យមនុស្សធម៌ និងការអភិវឌ្ឍន៍នានា ហើយលោកជឿជាក់ថា បងប្អូនប្រជាពលរដ្ឋផៀសសឹកនឹងបានត្រឡប់ទៅលំនៅដ្ឋានវិញ បន្ទាប់ពីសន្តិភាពកើតមាននៅតាមព្រំដែន។

ជាមួយគ្នានេះឯកឧត្តម គីម រិទ្ធី អភិបាលខេត្តព្រះវិហារ បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនចិន ដែលតែងតែផ្តល់ការគាំទ្រ និងជួយដល់ប្រជាជនកម្ពុជាក្នុងគ្រប់កាលៈទេសៈ ជាពិសេសក្នុងគ្រាដែលប្រជាពលរដ្ឋកំពុងជួបការលំបាក។
គណៈប្រតិភូក៏បាននាំយកអំណោយមនុស្សធម៌ប្រគល់ជូនប្រជាពលរដ្ឋភៀសសឹក ដើម្បីជួយសម្រាលការខ្វះខាតក្នុងជីវភាពប្រចាំថ្ងៃ ព្រមទាំងបានលើកទឹកចិត្តឱ្យប្រជាពលរដ្ឋថែរក្សាសុខភាព អនាម័យ និងបន្តស្នាក់នៅតាមការរៀបចំរបស់អាជ្ញាធរ ដើម្បីធានាសុវត្ថិភាពរហូតដល់ស្ថានភាពវិលមករកភាពប្រក្រតីឡើងវិញ។

សូមបញ្ជាក់ថា រដ្ឋបាលខេត្តព្រះវិហារ បានបន្តសហការជាមួយក្រសួង ស្ថាប័នពាក់ព័ន្ធ អង្គការដៃគូ និងសប្បុរសជន ដើម្បីផ្តល់ការគាំទ្រជាបន្តបន្ទាប់ដល់ប្រជាពលរដ្ឋដែលកំពុងស្នាក់នៅតាមមណ្ឌលសុវត្ថិភាព ដោយធានាឱ្យពួកគាត់ទទួលបានអាហារ ទឹកស្អាត សេវាសុខាភិបាល និងការថែទាំចាំបាច់ផ្សេងៗ៕ដោយ ខៀវ ផល្លា​