ភ្នំពេញ៖នាថ្ងៃ ព្រហស្បតិ៍ ១០រោច ខែពិសាខ ឆ្នាំឆ្លូវ ត្រីសក័ ពុទ្ធសករាជ ២៥៦៤ ត្រូវនឹងថ្ងៃទី០៦ ខែឧសភា ឆ្នាំ២០២១
ឯកឧត្ដម ឃួង ស្រេង អភិបាលរាជធានីភ្នំពេញបានធ្វើការណែនាំឱ្យអាជ្ញាធរខណ្ឌ ក៏ដូចជាកម្លាំងមានសមត្ថកិច្ចដែលបាននិងកំពុងឈរជើងនៅតាមគោល ដៅបិទខ្ទប់ក្នុងតំបន់ក្រហម ត្រូវពង្រឹងការងារ ឱ្យបានម៉ឺងម៉ាត់បំផុត ពិសេសមិនអនុញ្ញាតឱ្យចេញ- ចូលទៅ ក្នុងតំបន់ក្រហមជាដាច់ខាត បន្ទាប់ពីមាន ការប្រកាសនៃការបិទខ្ទប់តំបន់ក្រហមនេះសារជាថ្មីទៀត នៅតាមបណ្ដាលខណ្ឌមួយចំនួន នៅក្នុងខណ្ឌមានជ័យ ខណ្ឌពោធិ៍សែនជ័យ ខណ្ឌឬស្សីកែវ ខណ្ឌទួលគោក ខណ្ឌច្បារអំពៅ និងខណ្ឌ៧មករា ជាដើម។
ការណែនាំបែបនេះ របស់ ឯកឧត្ដមអភិបាលរាជធានីភ្នំពេញបានធ្វើឡើង ក្នុងឱកាស អញ្ជើញចុះពិនិត្យស្ថានភាពជាក់ស្ដែង នៅតាមតំបន់ក្រហមមួយចំនួននៅក្នុងខណ្ឌមានជ័យ ខណ្ឌពោធិ៍សែនជ័យ និងខណ្ឌឫស្សីកែវ នារសៀលថ្ងៃទី០៦ ខែឧសភា ឆ្នាំ២០២១នេះ ។ ក្រៅពីការណែនាំ និងពង្រឹងនៅតាមគោលដៅខាងលើនេះ ឯកឧត្ដម ឃួង ស្រេង ក៏បានឧបត្ថម្ភនូវថវិកាមួយចំនួនជូនដល់អាជ្ញាធរ និងកងកម្លាំង ដែលបាននិងកំពុងឈរជើងនៅតាមទីតាំងគោលដៅបិទខ្ទប់ទាំងនោះ ផងដែរ។ ការផ្តល់ជាថវិកានេះ គឺដើម្បីជាការលើកទឹកចិត្តឱ្យអាជ្ញាធរ និងកងកម្លាំង មានស្មារតី ទទួលខុសត្រូវខ្ពស់ ក្នុងការបិទខ្ទប់តំបន់ក្រហមទាំងនេះឱ្យមានប្រសិទ្ធភាពខ្ពស់ ចៀសវាងបាននូវ ការរីករាលដាលជំងឺកូវីដ-១៩ ទៅតំបន់ផ្សេងទៀត ។
ជាមួយគ្នានេះដែរ ឯកឧត្ដមអភិបាលរាជធានីភ្នំពេញ ក៏បានឧបត្ថម្ភថវិកាមួយចំនួន ជូន លោក សាន្ត សំអាត មន្ត្រីប៉ូលីសប៉ុស្តិ៍ចោមចៅទី២ ខណ្ឌពោធិ៍សែនជ័យ ដែលរងរបួសក្បាលដោយខ្យល់ព្យុះកាលពីយប់ថ្ងៃទី ០៥ ខែឧសភា ឆ្នាំ២០២១ ក្នុងពេលកំពុងបំពេញការងារ។ ឯកឧត្ដម ឃួង ស្រេង ក៏បានណែនាំនិងបញ្ជាឱ្យអាជ្ញាធរខណ្ឌទាំងអស់ ធ្វើសកម្មភាព បាញ់ថ្នាំសម្លាប់មេរោគ នៅតាមតំបន់ក្រហមពិសេសនៅតំបន់ផ្ទះជួលរបស់កម្មករ កម្មការិនីរោងចក្រស្នាក់នៅ និងនៅតាមបណ្តារោងចក្រដែលមាន បញ្ហាប្រឈមខ្លាំងនៃការរីករាលដាលជំងឺកូវីដ-១៩។
