ខេត្តបាត់ដំបង៖កាលពីវេលាម៉ោង ៨:៣០ នាទីយប់ ថ្ងៃទី ២៦ ខែមេសា ឆ្នាំ ២០២៦ ស្ថិតក្នុងភូមិចក្រី ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង មានករណីនាំចេញទំនិញគេចពន្ធ (ស្រាបារី) ឆ្លងដែនទៅកាន់ប្រទេសថៃយ៉ាងអនាធិបតេយ្យ ដោយគេឃើញក្រុមឈ្មួញ និងកម្មករសម្រុកលីជញ្ជូនឆ្លងដែនយ៉ាងរលូនបំផុត។
អ្វីដែលជាចម្ងល់ដ៏ធំ និងជាសំណួររបស់មហាជននោះគឺ៖
អវត្តមានសមត្ថកិច្ចជំនាញ៖ នៅចំណុចកើតហេតុ ដែលជាច្រករបៀងស្ថិតក្រោមការគ្រប់គ្រងរបស់ វរសេនាតូចនគរបាលការពារព្រំដែនគោកលេខ ៨១៧ បែរជាមិនឃើញមានវត្តមានមន្ត្រីណាម្នាក់មកធ្វើការទប់ស្កាត់ ឬបង្ក្រាបឡើយ។
កម្លាំងចម្រុះនៅឯណា? បើទោះបីជាបច្ចុប្បន្ន មានការដាក់ពង្រាយកម្លាំង វរសេនាតូចលេខ ៥៥១ ដើម្បីយាមកាមតាមក្រវាត់ព្រំដែនយ៉ាងតឹងរ៉ឹងក៏ដោយ ប៉ុន្តែនៅយប់កើតហេតុ បទល្មើសបែរជាអាចប្រព្រឹត្តទៅបានយ៉ាងចំហរ ហាក់បីដូចជាគ្មានការយាមល្បាតទាល់តែសោះ។
តើនេះជាការធ្វេសប្រហែស ឬជាការ “បើកដៃ”?
មហាជនកំពុងដាក់មន្ទិលសង្ស័យថា តើការបាត់វត្តមានសមត្ថកិច្ចនៅកន្លែងកើតហេតុ ជាយុទ្ធសាស្ត្រ “ធ្វើមិនដឹង មិនឮ” ដើម្បីទុកផ្លូវឲ្យមេឈ្មួញនាំទំនិញចេញដោយសុវត្ថិភាពឬយ៉ាងណា? ចំណែកឯអត្តសញ្ញាណមេឈ្មួញវិញ កម្មករលីសែងហាក់មានការរុញរា និងមិនហ៊ានបង្ហើបឈ្មោះម្ចាស់ទំនិញនោះឡើយ ដែលនេះសបញ្ជាក់ថា ម្ចាស់ទំនិញអាចជាអ្នកមានឥទ្ធិពល ឬមានខ្សែស្រឡាយមិនធម្មតា។
ក្រុមអ្នកសារព័ត៌មានយើង នឹងរង់ចាំមើលថា តើអាជ្ញាធរពាក់ព័ន្ធ និងថ្នាក់ដឹកនាំអង្គភាពខាងលើ នឹងមានវិធានការស្រាវជ្រាវរកមុខសញ្ញាមេឈ្មួញដែលនៅពីក្រោយខ្នងមកផ្ដន្ទាទោសតាមច្បាប់ដែរឬទេ? ដើម្បីជៀសវាងការរិះគន់ថា សមត្ថកិច្ចឃុបឃិតជាមួយឈ្មួញ ចាត់ទុកបទល្មើសជា “ឆ្នាំងស៊ុប” សម្រាប់ចែកគ្នាទទួលទាន។ក្នុងនាមយើងជាអ្នកសារព័ត៌មាន យើងផ្សព្វផ្សាយផ្អែកលើការពិតជាក់ស្ដែងដែលបានឃើញផ្ទាល់ភ្នែក មិនមែនជាការញុះញង់ ឬរើសអើងឡើយ។ យើងប្រកាន់ខ្ជាប់នូវក្រមសីលធម៌វិជ្ជាជីវៈ៖
ទេ! ចំពោះសំណូកសូកប៉ាន់ដើម្បីលុបបំបាត់ព័ត៌មានពិត។
មិនបំភ្លៃការពិត និងមិនបៀតបៀនសិទ្ធិអ្នកដទៃ៕
ពាក់ព័ន្ធនឹងការចុះផ្សាយខាងលើ អង្គភាពយើងខ្ញុំ ធ្វើការផ្សព្វផ្សាយទៅតាមវិជ្ជាជីវៈអ្នកសារព័ត៌មាន គឺរិះគន់ក្នុងន័យស្ថាបនា មិនមានចេតនាញុះញង់បំបែកបំបាក់មួលបង្កាច់ បង្ខូចបុគ្គល ស្ថាប័ន ឬអង្គភាពណាមួយឡើយ។ យើងខ្ញុំរងចាំទទួលការបកស្រាយបំភ្លឺ ពីភាគីជាម្ចាស់ ស្ថាប័នពាក់ព័ន្ធ រៀងរាល់ម៉ោងធ្វើការ តាមច្បាប់ស្ដីពីរបបអ្នកសារព័ត៌មាននៅកម្ពុជា៕សូមអគុណ!
