នៅថ្ងៃទី២៨ ខែមីនា ឆ្នាំ២០២៥ វេលាម៉ោងប្រហែល ១ និង ៣០ នាទី រសៀល គ្រោះរញ្ជួយដីដ៏ខ្លាំងក្លាកម្រិត ៧.៧ រ៉ិចទ័រ បានអង្រួនទីក្រុងបាងកក និងតំបន់ក្បែរនោះ។ ខណៈស្ថានភាពរញ្ជួយដីនេះ ត្រូវបានគេមានអារម្មណ៍ញ័ររង្គើយ៉ាងទូលំទូលាយ ហើយជាលទ្ធផល បានបណ្តាលឲ្យអគារសំណង់មួយកន្លែង បាក់រលំដ៏រន្ធត់។
ជាក់ស្តែង កម្មវិធីទូរទស្សន៍មួយ ដែលកំពុងចាក់ផ្សាយ ត្រូវបញ្ឈប់កម្មវិធីទាំងកណ្តាលទី បន្ទាប់ពីត្រូវបានកត់សម្គាល់ឃើញយ៉ាងច្បាស់ថា ស្ទូឌីយោកំពុងញ័ររង្គើពីការរញ្ជួយដី។ ភ្លាមៗនោះ ទាំងពិធីករ និងភ្ញៀវក្នុងកម្មវិធី មានការភ្ញាក់ផ្អើល និងស្លុតរន្ធត់យ៉ាងខ្លាំង។ តែសំណាងល្អ បន្ទាប់មក អ្នកគ្រប់គ្នារួមទាំងបុគ្គលិក ត្រូវបានជម្លៀសទៅកាន់កន្លែងមានសុវត្ថិភាព។
ហេតុការណ៍ដ៏រន្ធត់នេះ បណ្តាញសង្គមបានចែកចាយវីដេអូឃ្លីបមួយ ដែលបង្ហាញពីការបាក់រលំសំណង់អគារដ៏ខ្ពស់សន្សឹមមួយ ដែលជាអគារកំពុងសាងសង់ ស្ថិតក្នុងសង្កាត់ Chatuchak។ អគារខ្ពស់ដែលមានអាងហែលទឹកនៅពីលើ បានញ័ររង្គើ បណ្ដាលឲ្យទឹកហូរហៀរបាចសាច លាយឡំបំណែកធូលីសំណង់ យ៉ាងផុសផុលតែម្តង។ ខណៈពេលនោះ មនុស្សជាច្រើនដែលភាគច្រើនជាកម្មករសំណង់ ត្រូវបានឃើញរត់ចាកចេញពីអគារទាំងភ័យស្លន់ស្លោយ៉ាងខ្លាំង រួមទាំងអ្នកនៅកន្លែងធ្វើការ ផ្ទះល្វែង និងផ្សារទំនើបក្បែរនោះផងដែរ។
ក្រុមអ្នកជួយសង្គ្រោះនៅទីក្រុងបាងកក បាននិយាយថា យ៉ាងហោចណាស់ មានកម្មករចំនួន ជា៣០ នាក់ កំពុងជាប់នៅក្នុងអគារដែលដួលរលំនោះ ដែលមានកម្ពស់ ៣០ ជាន់។
ក្រសួងការងារ និងបណ្តុះបណ្តាលវិជ្ជាជីវៈ និងស្ថានឯកអគ្គរាជទូតកម្ពុជាប្រចាំទីក្រុងបាងកក បានកំពុងតាមដានករណីនេះ និងបានធ្វើការទាក់ទងជាមួយស្ថាប័នពាក់ព័ន្ធថៃ ដើម្បីស្វែងរកព័ត៌មានលម្អិតអំពីផលប៉ះពាល់ និងជនរងគ្រោះនៅទីតាំងដែលមានការបាក់រលំ។ ព័ត៌មានបឋម គិតត្រឹមម៉ោង ៣៖១៥នាទីរសៀល ថ្ងៃទី២៨ ខែមីនា ឆ្នាំ២០២៥នេះ គឺនៅការដ្ឋានដែលបាក់រលំអាគារមួយកន្លែងមានពលករបរទេសចំនួនប្រមាណជា ៣០នាក់ អាចនៅជាប់គាំងក្នុងអាគារ ប៉ុន្តែមិនទាន់អាចបញ្ជាក់បានថាមានជនជាតិណាខ្លះ។ អាជ្ញាធរថៃកំពុងធ្វើការសង្រ្គោះ និងជន្លៀស។
ក្រសួង និងស្ថានទូតនឹងបន្តតាមដាន និងត្រៀមខ្លួនផ្តល់ការគាំពារក្នុងករណីចាំបាច់។ ក្រសួងសូមអំពាវនាវដល់បងប្អូនដែលកំពុងស្នាក់នៅទីក្រុងបាងកក សូមបង្កើនការប្រុងប្រយ័ត្ន និងសូមអនុវត្តតាមការណែនាំរបស់អាជ្ញាធរ និងមន្ត្រីបច្ចេកទេសរបស់ថៃ។
បងប្អូនប្រជាពលរដ្ឋខ្មែរដែលកំពុងស្ថិតនៅទីក្រុងបាងកក អាចទាក់ទងស្ថានឯកអគ្គរាជទូតកម្ពុជាដើម្បីសុំជំនួយតាមរយៈ ទូរសព្ទ៖
– លេខ 094 092 5905, 094 416 558
