ខេត្តបាត់ដំបង៖កាលពី ថ្ងៃសុក្រ ទី១៦ ខែកុម្ភៈឆ្នាំ ២០២៤
នៅសាលាខេត្តបាត់ដំបង ក្រោម អធិបតីភាព ឯកឧត្ដម សុខ លូ បានបើកកិច្ចប្រជំុស្តីពីការជំរុញឲ្យអាជ្ញាធរ សមត្ថកិច្ចចុះបង្ក្រាបល្បែងស៊ីសងខុសច្បាប់ និងរៀបចំសន្តិសុខសណ្ដាប់ធ្នាប់ក្នុងភូមិសាស្ត្រខេត្តបាត់ដំបង។
ក្នុងឱកាសនោះដែរឯកឧត្តមសុខ លូ ក៏បានលើកឡើងអំពីការបើកអាជីវកម្មល្បែងតាមប្រព័ន្ធអនឡាញនៅតាមបណ្ដា ក្រុង ស្រុក ដែលគ្មានអាជ្ញាបណ្ណអនុញ្ញាតត្រឹមត្រូវ។ ដោយក្នុងនោះលោកបានដាក់បញ្ជាឲ្យរដ្ឋបាលក្រុង ស្រុក អធិការក្រុង ស្រុក ត្រូវធ្វើការបង្ក្រាបជាបន្ទាន់នូវរាល់អាជីវកម្មដែលបង្កប់នូវល្បែងស៊ីសងខុសច្បាប់ ដោយមិនមានអាជ្ញាប័ណ្ណ ឬច្បាប់អនុញ្ញាតឲ្យទាន់ពេលវេលា ព្រោះបញ្ហាល្បែងនេះក៍ជាមេរោគក្នុងសង្គមមួយដែលត្រូវធ្វើការព្យាបាល ដែលល្បែងនាំឲ្យបង្កជារឿងអសន្តិសុខជាច្រើនដូចជា ការលួចឆក់ប្លន់អំពើហិង្សាជាដើម។
ឯកឧត្តម សុខ លូ អភិបាល នៃគណអភិបាលខេត្ត បានបន្តថា មិនត្រឹមតែការងារបង្ក្រាបល្បែងស៊ីសងតែមួយមុខទេ ក្នុងនោះក៏ត្រូវតែមិនភ្លេច ក្នុងការបន្តចុះបង្ក្រាបការជួញដូរនិងប្រើប្រាស់គ្រឿងញៀន ដែលជាបញ្ហាមួយក្នុងចំណោមបញ្ហាដែលកើតមាននៅក្នុងសង្គមត្រូវធ្វើការដោះស្រាយ គ្រឿងញៀនអាចប្រែក្លាយ សង្គមអសន្តិសុខបង្កភាពភ័យខ្លាចដល់ប្រជាពលរដ្ឋ។
ឯកឧត្តមបានបន្ថែមថា ក្នុងនោះដែរ ក៏ត្រូវបន្តកិច្ចការងាររបស់ខ្លួនហើយបន្ថែមទៀតពាក់ព័ន្ធ ទៅនឹងសន្តិសុខសណ្ដាប់ធ្នាប់ក្នុងភូមិសាស្ត្ររបស់ខ្លួនឲ្យកាន់តែល្អប្រសើរបន្ថែមទៀត ដេីម្បីធានានូវ សុខសុវត្ថិភាព នៅក្នុងការរស់នៅរបស់ប្រជាពលរដ្ឋនៅក្នុងភូមិសាស្ត្រទទួលខុសត្រូវរបស់ខ្លួនផងដែរ ភូមិសាស្ត្រ៕
វណ្ណៈ ព័ត៌មាន ប្រចាំខេត្តបាត់ដំបង
