ខេត្តបន្ទាយមានជ័យ៖ប្រភពពីប្រជាពលរដ្ឋបានរាយការណ៍មកថា មានទីតាំងសង្វៀនជល់មាន់ដ៏ធំ កំពុងតែបើកដំណើរកាលេងយ៉ាងអនាធិបតេយ្យ ដែលមានទីតាំងស្ថិតនៅក្បែរ «ក្លិបថេកដោនចាស់» ចំនុចមាត់អូរ ស្រះទឹក ជាប់ព្រំប្រទល់«កម្ពុជា-ថៃ» ភូមិក្បាលស្ពាន សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ កំពង់បើកអោយប្រជាពលរដ្ឋខ្មែរ លេងយ៉ាងសប្បាយ មិនខ្វល់ពីសមត្ថកិច្ចពាក់ពន្ធ័ឡើយ។
តាមការបង្ហើបពីប្រជាពលរដ្ឋនៅក្បែរនោះបានរៀបរាប់ថា ទីតាំងខាងលើនេះ បានគៀងគរក្រុមអ្នកញៀនល្បែងអោយចូលលេងយ៉ាងគគ្រឹកគគ្រេង ជាយូរមកហើយ ដោយពុំឃើញមានសមត្ថកិច្ចនៅក្នុងមូលដ្ឋានចុះមកធ្វើការទប់ស្កាត់និងបង្ក្រាបឡើយ សង្ស័យថា ទីតាំងសង្វៀនជល់មានខាងលើ មានខ្នងធំ និងខ្សែក្រាស់ហើយមើលទៅ បានជាបើកលេងចំកណ្តាលក្រុងហើយ គ្មានអ្នកណាហ៊ានបង្ក្រាបសោះ។
ជាក់ស្តែងនៅថ្ងៃទី ២៨ ខែតុលា ឆ្នាំ២០២៣ ក្រុម អ្នកសារព័ត៌មានយើងបានចុះទៅដល់ទីតាំង ក៏បានឃើញនៅអ្វីដែលគាត់រាតការណ័ពិតមែន ហើយក៏បានថតផ្តិតយករូបភាព និងបានរាយការណ៍ទៅលោកវីរៈសេនីយ៍ឯក សៅ សារឿន អធិការក្រុងប៉ោយប៉ែត តាមរយៈលេខទូរស័ព្ទលោកបានមានប្រសាសន៍ថា «ជាប់ប្រជុំ ចាំហើយ ចាំលោកខលមកវិញ»តែលោកមិនបានខលមកតាមដែលលោកមានប្រសាសន៍នោះទេឬមួយនេះគ្រាន់តែជាលេសដោះស្រាយដើម្បីយករួចខ្លួនតែប៉ុណ្ណោះ។
ប្រជាពលរដ្ឋរងចាំមើលថា តើសមត្ថកិច្ចក្នុងក្រុងប៉ោយប៉ែត មានវិធានការណ៍ទប់ស្កាត់ទីតាំងសង្វៀនជល់មាន់នៅចំណុចខាងលើបានដែររឺយ៉ាងណា?
ប្រជាពលរដ្ឋបានសំណូមពរដល់លោក ឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ពិសេស ឯកឧត្តម អ៊ុំ រាត្រី អភិបាលខេត្តបន្ទាយមានជ័យ មេត្តាចាត់កម្លាំងក្រោមឱវ៉ាតចុះត្រួតពិនិត្យ នូវទីតាំងសង្វៀនជល់មាន់ខាងលើផងទាន! ដើម្បីរក្សាបាននូវភូមិ ឃុំ មានសុវត្ថិភាពទាំង០៧ចំណុច របស់រាជរដ្ឋាភិបាល សូមអរគុណ៕
អង្គភាពអ្នកសារព័ត៌មានយើងខ្ញុំផ្សព្វផ្សាយគ្រាន់តែជា កញ្ចក់ឆ្លុះបញ្ចាំង រិះគុនក្នុងន័យស្ថាបនា ចូលរួមចំណែកជាមួយរាជរដ្ឋាភិបាល។ជុំវិញការចុះផ្សាយខាងលើនេះអង្គភាពសារព័ត៌មានយើងខ្ញុំ នឹងរងចាំទទួលការស្រាយបំភ្លឺ ពីសំណាក់សមត្ថកិច្ចពាក់ពន្ធ័ នឹងម្ចាស់ទីតាំងរៀងរាល់ម៉ោងធ្វើការ ដើម្បីឆ្លុះបញ្ចាំងពីការពិត សុក្រឹតនិងយុត្តិធម៌តែប៉ុណ្ណោះ សូមអរគុណ!!!
