ចេញផ្សាយ៖ ថ្ងៃទី២២ ខែតុលា ឆ្នាំ២០២២
ដោយ៖ហ្វេសប៊ុកផេកអធិការដ្ឋាននគរបាលស្រុកលើកដែក
ទូរស័ព្ទលេខ៖ ០៩៧ ៧៧៨០ ០៥៨
ស្រុកលើកដែក ៖ ក្រុមការងារព័ត៌មាន និងប្រតិ
កម្មរហ័ស នៃអធិការដ្ឋាននគរបាលស្រុកលើកដែក សូមឆ្លើយតបចំពោះគណនីហ្វេសប៊ុក ឈ្មោះ មេរៀនជីវិត ឥន្ទធនូគ្មានពណ៌ ដែលបានចុះផ្សាយ កាលពីថ្ងៃទី២១ ខែតុលា ឆ្នាំ ២០២២ ដែលមានខ្លឹមសារថា៖
« សូមជម្រាបដល់សាធារណៈជន ទាំងអស់អោយបានជ្រាបថា គិតចាប់តាំងពី ថ្ងៃកើតហេតុរហូតមកដល់ត្រឹមថ្ងៃនេះ យើងខ្ញុំជាក្រុមគ្រួសារជនរងគ្រោះទាំង ១១នាក់នៅ ពុំទាន់មានការដោះស្រាយពីសំណាក់ម្ចាស់អាជីវកម្មទូកដរ ឈ្មោះ សួគ៌ សុីម គឺគាត់បានសង្ងំលាក់ខ្លួនបាត់ឈឹង តាំងពីថ្ងៃកើតហេតុមកម៉្លេះ ចំណែកខាងអាជ្ញាធរ មានសមត្ថកិច្ចក៏មិនទាន់ឃើញមានចំណាត់ការអ្វីដែរ ហើយគួរភ្ញាក់ផ្អើលណាស់ខណៈក្រុមគ្រួសារសពទាំង ១១ រវល់មមាញឹកក្នុងការរៀបចំបុណ្យសពមិនទាន់បានខ្វល់ខ្វាយរឿងដំណោះស្រាយចំណាត់ការអ្វីទេ តែឃើញមានការបង្ហោះជាហូរហែពីសំណាក់មន្ត្រីនគរបាលមួយចំនួន និយាយអះអាងជំនួសអាណាព្យាបាលសព ទាំងយើងខ្ញុំជាក្រុមគ្រួសារមិនបាននិយាយអ្វីឡើយទេ ហើយរឹតតែភ្ញាក់ផ្អើលថែមទៀតនៅពេលដែលយើងខ្ញុំ ជាក្រុមគ្រួសារជនរងគ្រោះទៅប៉ុស្តិ៍នគរបាល បែជាមន្រ្តីនគរបាលប្រាប់ថាសំណុំរឿងនេះដោះស្រាយចប់ហើយ ដូច្នេះសូមសាធារណជនជួយតាមដានឃ្លាំមើល នីតិវិធីរឿងនេះផង ជៀសវាងមានគេបំបិតចោលដោយឥតមានចំណាត់ការអ្វីសោះ »។
ក្រោយពីទទួលបានព័ត៌មានខាងលើភ្លាម និងដោយមានការចង្អុលបង្ហាញផ្ទាល់ពីលោកចាប ច័ន្ទវិទ្យា អភិបាល នៃគណៈអភិបាលស្រុកលើក
ដែកនិងជាប្រធានគណៈបញ្ជាការឯកភាពស្រុក និងអនុសាសន៍លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល លោកវរសេនីយ៍ឯក អាំ ធូ អធិការនគរបាលស្រុកលើកដែក បានចាត់ លោកវរសេនីយ៍ទោ យឹង សាឡាត់ ជាតំណាង ដឹកនាំកម្លាំងប៉ុស្តិ៍នគរបាលរដ្ឋបាលកំពង់ភ្នំ ចុះស្រាវជ្រាវករណីខាងលើ។
ជាលទ្ធផល៖
នៅព្រឹកថ្ងៃសៅរ៍១២រោច ខែអស្សុជ ឆ្នាំខាលចត្វាសក័ព.ស២៥៦៦ ត្រូវនិងថ្ងៃទី២២ ខែ តុលា ឆ្នាំ២០២២ វេលាម៉ោង ៨ និង ៣០
នាទី កម្លាំងប៉ុស្តិ៍នគរបាលរដ្ឋបាលកំពង់ភ្នំបានកោះអញ្ជើញគ្រួសារទាំង ១១នាក់ ដែលបានរងគ្រោះលិចទូកដរទទឹងស្លាប់ កាលពីថ្ងៃទី ១៣ ខែតុលា ឆ្នាំ ២០២២ វេលាម៉ោង ១៨ និង៤៥
នាទីយប់ ព្រមទាំងម្ចាស់អាខោនហ្វេសប៊ុក មេរៀនជីវិត ឥន្ទធនូគ្មានពណ៌(ដែលមានឈ្មោះពិត លន់ សារ៉ាត់)មកធ្វើការសម្របសម្រួល។
+ សមាសភាពចូលរួមមាន ៖
– លោក នៅ ទូច មេឃុំកំពង់ភ្នំ
– លោកនាយប៉ុស្ត៍ នាយរងប៉ុស្តិ៍ និងមន្ត្រី
– ឪពុកម្ដាយគ្រួសារសពទាំង ១១នាក់
ចំណាត់ការ៖
– សុំឲ្យម្ចាស់អាខោនឈ្មោះ មេរៀនជីវិត ឥន្ទធនូគ្មានពណ៌ កែតម្រូវអត្ថបទរបស់ខ្លួន ដែលបានបង្ហោះកាលពីថ្ងៃទី ២១ ខែតុលាឆ្នាំ ២០២២ វេលាម៉ោង ១៦ និង ១០នាទីឡើងវិញ។
– ម្ចាស់អាខោន បានយល់ព្រមទទួលកំហុសឆ្គង ដែលខ្លួនបានចុះផ្សាយដែលគ្មានមូលដ្ឋានច្បាស់លាស់។
ជាសំណូមពរ :
– តំណាងប្រជាពលរដ្ឋទាំង ១១ គ្រួសារ ស្នើរទៅ លោកមេឃុំ និងអាជ្ញាធរពាក់ព័ន្ធ ឲ្យកោះហៅម្ចាស់ទូកដរឈ្មោះ សួរ សុីម មកពិភាក្សា ជួយជាសំណង ដល់គ្រួសាររងគ្រោះ ក្នុងមួយគ្រួសារចំនួន $១០,០០០ (មួយមុឺនដុល្លារ)។
– តំណាងគ្រួសារទាំង១១ ទុកពេលឱ្យម្ចាស់ទូកដរ ចំនួនបីថ្ងៃ (ពីថ្ងៃទី ២៤ ដល់ ថ្ងៃទី ២៦ ខែតុលា ឆ្នាំ២០២២)ក្នុងការចូលខ្លួនមកសម្របសម្រួលការងារ ជាមួយគ្រួសារសពទាំង ១១។
– ក្នុងរយៈពេល ០៣ថ្ងៃខាងលើ បើម្ចាស់ទូកដរ មិនចូលខ្លួនដោះស្រាយទេ គ្រួសារទាំង ១១ នឹងអញ្ជើញមក សាលាឃុំសាជាថ្មីម្តងទៀត ដើម្បីស្នើសុំលោកមេឃុំ និង អាជ្ញាធរពាក់ព័ន្ធ ជួយដោះស្រាយបន្តជូនពួកគាត់ តាមនីតិវិធីច្បាប់ ។
អាស្រ័យហេតុនេះ សូមសាធារណជន មេត្តាជ្រាបជាព័ត៌មាន៕
