ត្បូងឃ្មុំ៖ រដ្ឋបាលខេត្តត្បូងឃ្មុំ នារសៀលថ្ងៃទី២៤ ខែតុលា ឆ្នាំ២០២២ បានប្រារព្ធពិធីបិទមហោស្រពសិល្បៈប្រឡងចម្រៀងបុរាណ-សម័យ ឆ្នាំ២០២២ ក្រោមអធិបតីភាពឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ។
កម្មវិធីលើកស្ទួយសិល្បៈចម្រៀងខ្មែរនេះ ធ្វើឡើងនៅសាលប្រជុំធំសាលាខេត្តត្បូងឃ្មុំ ក្រោមការរៀបចំដោយមន្ទីរវប្បធម៍ និងវិចិត្រសិល្បៈខេត្ត ដោយមានការអញ្ជើញចូលរួមពីសំណាក់ អភិបាលរងខេត្ត នាយក-នាយករងរដ្ឋបាលសាលាខេត្ត នាយក-នាយករងទីចាត់ការសាលាខេត្ត ប្រធាន-អនុប្រធានមន្ទីរអង្គភាពជុំវិញខេត្ត សិស្សនិស្សិត សាកលវិទ្យាល័យ ហេង សំរិន ត្បូងឃ្មុំ បេក្ខជនប្រឡង និងអ្នកពាក់ព័ន្ធ។
មានប្រសាសន៍នាឱកាសនោះ ឯកឧត្តមបណ្ឌិត ជាម ច័ន្ទសោភ័ណ បានថ្លែងការកោតសសើរចំពោះមន្ទីរវប្បធម៌ និងវិចិត្រសិល្បៈខេត្ត ដែលបានខិតខំស្វែងរកធនធានមនុស្សដែលមានសម្លេងពិរោះ មានទឹកដម ចូលរួមប្រកួត និងទទួលជ័យលាភី តំណាងឲ្យខេត្ត ជាពិសេសបានខិតខំប្រឹងប្រែង ក្នុងការចូលរួមអនុវត្តការងារឲ្យទទួលបានជោគជ័យ ដោយយកចិត្តទុកដាក់ខ្ពស់ ក្នុងការអនុវត្តសកម្មភាពការងារឱ្យបានកាន់តែប្រសើរឡើងថែមទៀត ដើម្បីឈានទៅសម្រេច ឱ្យបាននូវគោលនយោបាយជាតិស្តីពីវប្បធម៌ “អភិរក្ស និងអភិវឌ្ឍន៍ វប្បធម៌ជាតិ” ដោយអនុវត្តន៍ស្របតាម គោលនយោបាយដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំ ធ្វើអោយប្រទេសជាតិមានការរីកចម្រើន និង អភិវឌ្ឍន៍ លើគ្រប់វិស័យ។
ឯកឧត្តមបណ្ឌិត អភិបាលខេត្ត ក៏បានជំរុញដល់មន្ទីរវប្បធម៌ខេត្ត ក៏ដូចជាបេក្ខជន បេក្ខនារីទាំងអស់ បន្ទាប់ពីទទួលបានជ័យលាភីហើយ ត្រូវប្រឹងប្រឹងប្រែងបន្ថែមទៀត បង្ហាញឲ្យអស់ពីសមត្ថភាព និងទេពកោសល្យ ក្នុងការប្រកួតប្រជែងប្រឡងចម្រៀងខ្មែរជាសកល និងបន្តទៅប្រកួតប្រជែងក្នុងព្រឹត្តិការណ៍មហោស្រពថ្នាក់ជាតិ ដើម្បីទទួលបាននូវជ័យលាភី ក្លាយជាអ្នកបន្តវេនពីរៀមច្បងបន្តទៀត លើកកិត្តិយសដល់ខេត្តត្បូងឃ្មុំរបស់យើង។
លោក កួ ហុក ប្រធានមន្ទីរវប្បធម៌ និងវិចិត្រសិល្បៈខេត្ត បានឲ្យដឹងថាបេក្ខជន បេក្ខនារី ដែលមកដាក់ពាក្យប្រឡងសរុបចំនួន ៣៣ រូប អវត្តមាន ០៣ រូប មានបេក្ខជនចូលរួមប្រឡង ៣០ នាក់ក្នុងនោះបេក្ខនារី ១៤ នាក់ ដូចជា : អ្នកចម្រៀងសម័យ មានចំនួន ១៣ នាក់ បេក្ខនារី ០៧ នាក់ អ្នកចម្រៀងបុរាណ មានចំនួន ១៧ នាក់ បេក្ខនារី ០៧នាក់។
លោក បញ្ជាក់ថា ចំពោះជ័យលាភីប្រឡងទាំងបុរាណនិងសម័យ មានចំនួន០៦នាក់ ចំណាក់ថ្នាក់លេខ ១ មានចំនួន ០២ នាក់ ទទួលបានថវិកាចំនួន ៨០ម៉ឺនរៀល ចំណាត់ថ្នាក់លេខ ២មានចំនួន០២នាក់ ទទួលបានថវិកាចំនួន ៦០ម៉ឺនរៀល និងចំណាត់ថ្នាក់លេខ៣មានចំនួន០២នាក់ ទទួលបានថវិកាចំនួន៤០ម៉ឺនរៀល និងទទួលបានប័ណ្ណជ័យលាភីម្នាក់មួយ។ ដោយឡែក បេក្ខជន បេក្ខនារី ដែលមិនបានជាប់ចំណាក់ថ្នាក់ ម្នាក់ៗ ទទួលបានថវិកា ១០ ម៉ឺនរៀលផងដែរ៕
