ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានគាំទ្រ គម្រោងរៀបចំកម្មវិធី « យុវជន និងវប្បធម៌ »របស់ក្រុមការងារ ស្រមោល Fashion & Creative ដែលកម្មវិធីនេះនឹងជួយលើកកម្ពស់វិស័យវប្បធម៌នៅកម្ពុជា។ ការគាំទ្របែបនេះនៅក្នុងឱកាសទទួលជួប ក្រុមការងារគណៈកម្មការ ក្រុមស្រមោល Fashion & Creative ដឹកនាំដោយ លោក ថាច់ សេរីវុឌ្ឍ នៅព្រឹកថ្ងៃទី ២៥ ខែសីហា ឆ្នាំ ២០២២។
ឯកឧត្តម រដ្ឋមន្រ្តី ខៀវ កាញារីទ្ធ បានសំដែងក្តីរីករាយដែលយុវជនខ្មែរចេះរួមគ្នាធ្វើកម្មវិធី« យុវជន និង វប្បធម៌ » នាចុងខែវិច្ឆិកា ឆ្នាំ២០២២ នេះ ដែលជាផ្នែកមួយដ៏សំខាន់ ក្នុងការរួមចំណែកលើកកម្ពស់វិស័យវប្បធម៌ឱ្យកាន់តែរីកចម្រើន។ តាមរយៈកិច្ចការងាររៀបចំកម្មវិធីខាងលើនេះ ឯកឧត្តម រដ្ឋមន្រ្តី ខៀវ កាញារីទ្ធ បានចូលរួមថវិកាគាំទ្រចំនួន ២ លានរៀល។
លោក ថាច់ សេរីវុឌ្ឍ បានឱ្យដឹងថា ក្រុមស្រមោល Fashion & Creative ដែលត្រៀមនឹងរៀបចំធ្វើនៅថ្ងៃទី២៧ ខែវិច្ឆិកាខាងមុខនេះ គឺទាក់ទងនឹងសិល្បៈវប្បធម៌ខ្មែរ ហើយជាសំខាន់គឺធ្វើឡើងក្នុងគោលបំណង ចង់បង្ហាញនូវសម្បត្តិមរតកវប្បធម៌ជាតិ ដែលជាកេរ ដំណែលដ៏មានតម្លៃមហាសាលនៃបុព្វបុរសខ្មែរជំនាន់មុនយកមកបង្ហាញ និងផ្សព្វផ្សាយ ដើម្បីឱ្យកូនខ្មែរជំនាន់ក្រោយបានស្គាល់ព្រមទាំងចូលរួមអភិរក្សកុំឱ្យបាត់បង់ ។
កម្មវិធីក៏នឹងបានបង្កើតនូវផ្ទាំងទស្សនីយភាពសិល្បៈគ្រប់ទម្រង់ មានល្ខោនខោល ល្ខោនស្បែកធំ របាំបុរាណ និង ប្រពៃណី ព្រមទាំងការដើរបង្ហាញនូវឈុតសម្លៀកបំពាក់តំណាងជាតិជាដើម៕
